2 Tim. 1
1
1Wi Pápruitjiai. Yus wakerakui Jesukrístu akatrámuri̱ ajasuitjiai. Ashí Jesukrístuja̱i̱ tsaniṉkiarun “Nekas iwiaaku átinian susattajai” tíniuiti Yus. Tuma asa nuna etserkat tusa akuptúkuiti. 2Aneamu uchiru, Timiutéu, ju̱ papin áateajme. Yus Apasha tura ii Uuntri̱ Jesukrístusha ti anenma ásar waitnentramainiak aṉkant shiir pujustinian yaintmakarti.
Krístunu takastiniaitjinia nu
3Tsawai̱sha káshisha Yusan áujeakun ámin tuke enentáimtusan ti shiir Yusan yúmiṉkiajai. Winia we̱a̱tur túrawarmia nútiksanak Yusan enentáimtakun ti shiir awajeajai. 4Kanakmiaj nui̱ e̱a̱ntramiam nuna tuke enentáimtajme. Ataksha wararnaisatai tusan íitniun wakerajme. 5Yus nekas shiir enentáimtiniaitmena nuna nékajai. Nukuchrum Ruítiasha tura ame nuku Eunisiasha emka Yusan nekas enentáimtin ármiayi. Amesha núnisketme.
6Tuma asakmin tájame Yusna takasái tusan winia uwejrun ámin awanteakui Yus kakarman suramsamia nuja̱i̱ atak kakaram takasta. 7Yuska sápij enentáin suramsachuitji. Antsu kakaram ajastinniasha anenaitniuncha tura iik íimiasar naka wekasatniun suramsaitji. 8Ii Uuntri̱ Jesukrístunu etserkatin natsantraip. Níniun étserkun sepunam pujamusha étserkum natsantruraip. Antsu Yus kakaram awajtamkui ame étseream nuja̱i̱ shuar yajauch turamainiakui surimiamtsuk wáitsatin enentáimtumarta. 9Ii péṉker túrichu árini̱ṉ Yus iin anenma asa uwemtikramar péṉker túratniunam apujtamsaitji. Iisha Jesukrístuja̱i̱ tsaniṉkiaru asakrin tura Yus nuna túratniun wakerak túramiayi. Yaunchu ju̱ nuṉka atsai̱sha iin tuke waitnentrampramiaji. 10Tura yamái iin Uwemtikkiartin Jesukrístu támatai nu anenmamu paant ajasuíti. Nisha jákatniun nupetak emesramiayi. Tura uwempratin chichamja̱i̱ jáchatai iwiaakman paant awajtúrmaji.
11Nuna etserkat tusa Yus anaitiukmiayi. Tura akattúr Israer shuarchanum akuptúkmiayi.
Yus waitnenkartin asamtai Papru yumiṉsamiayi
12Túruta asamtai ti wáitiajai. Túrasha Yusan nekas enentáimta asan natsaamatsjai. Imiá kakaram asa amuukatin tsawant jeatsa̱i̱ṉ ashí wínian susamaj nuna tí peṉker waitruktatui.
13Shiir chichaman jintintiamajmena nuke emetata. Jesukrístuja̱i̱ tsaniṉkiu asar Yus nekas enentáimtaji tura nuja̱i̱ aneṉkratniuitji. Tuke núnismek túrata. 14Yus ámin takasat tusa suramsamu shiir takasta. Tura Yusa Wakaní̱ iin pujurtamaj nuna kakarmari̱ji̱a̱i̱ túrata.
15Asia nuṉkanmaya̱ shuar mash iniaitiusarmai. Nu nekaachmaashum. Nu shuarnumia̱ Pijirusha Ermujenessha armai. 16Antsu Unisépuru niisháa shuar amai. Tí nukap shiir enentáimtikrurmai. Tura wi sepunam pujamuncha natsantrurchamai. Ii Uuntri̱ Kristu ni shuari̱ncha waitnentrarti. 17Rúmanam taasha natsantrutsuk e̱a̱tak wáittsuk iniaitiuschamiayi. 18Ipisiunam pujarin tí yaintmakmiaj nu paant nékame. Tuma asamtai amuukatin tsawant jeamtai nincha Uunt Yus waitnentrati.
Currently Selected:
2 Tim. 1: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.