2 Tis. 3
3
1Nuyá̱ yatsuru, Yusa Chichame̱ shiir pamparti tusarum Yus áujtursatarum. Átum Yus Chicham wakerukmarmena áintsaṉ ashí nuṉkanam wakerukarti tusarum Yus seatarum. 2Tura yajauch shuar péṉker ana nuna ti nakitiáinia nu iincha yajauch awajtámsacharti tusarum Yus áujkartustarum. Kame chíkich aents Yusan umirkacharu áiniawai. 3Túrasha Uunt Jesusak atumín iniaitsuk waitmaktatrume. Tura atumín ikiakátmartatrume. Tura íwianch anaṉkramataj takui̱ kíishturmaktatrume. 4Kame Yus atumín yaintmaktatrume, taji. Ii tájinia nu yamái umíarme. Tura tuke umirkattarme. Nusha nekaar shiir enentáimji. 5Uunt Yus ni aneṉkrattairi̱n nekaatniun yaintmakarti. Kristu itiurchatan katsuntramia núnisaṉ atumniasha katsuntratniun Yus yaintmakti.
Takastiniaitji
6Yatsurtiram, antuktarum. Ii Uuntri̱ Jesukrístu chichame̱ja̱i̱ ju̱ taji “Nuyá̱ Yus shuar wi jintintrámun nakitiak aya wékana nu ikiuktiarum.” 7-8Ii túrajnia núnisrumek túratin nékarme. Ju̱i̱ti, atumji̱a̱i̱ pujusmaj nui̱ tuke takakmasmiaji. Atumí yurumkari̱ iisha akikmakar yurummiaji. Atumji̱a̱i̱ itiurchat áchati tusar tsawai̱sha káshisha tuke takakmasmiaji. 9Kame iisha Kristu akatrámu asar “yáintkiatarum” tíminiuji. Túrasha nu tútsuk ii túrajnia núnisrumek túratin nekaatarum tusar iisha tuke tsawant takaamiaji. 10Warí, atumji̱a̱i̱ pujumiaj nui̱ “Takastinian nakitiana nuka yurumáshti” tíchamkajⁱ. 11Iis, atumíiya̱ wea náṉkamas enentáimiainiak tura náṉkamas túruiniak peṉké takatsuk pujuiniawai turamainiaji. 12Nú shuaran ii Uuntri̱ Jesukrístu chichame̱ja̱i̱ “Tákamtak shiir takakmasarti” tajai.
13Yatsurtiram yawe̱tsuk shiir túratarum. 14Ju̱ papinium ii tájinia nuna, shuar umiktinian nakitiakuiṉkia “umichuiti” tákuram ni natsa̱a̱rat tusarum ikiuktiarum. 15Túrasha “Yus shuara nemasri̱nti” tiip. Áyatik jintintrata tura ame nekas yátsumea áitkiasmek Yusai̱ enentáimtikrata.
Papru áujmamas ikiuamu
16Uunt Yuska aṉkant átin enentái suramsati. Jú̱ Yus itiurchatnum pujarmini̱ṉ atumín tuke aṉkant shiir pujustin enentáimtikramsarti. Uunt Yuska atumín pujurtamsarti, tajai.
17Ju̱i̱ wi Papru ju̱na aajai. Wi papin akupeaj nui̱ wíniaiti tusan jú̱nisnak winia náarun áaran ápujeajai. 18Ii Uuntri̱ Jesukrístu atumín ashí yaintmakarat tusan wakerajrume.
Nu atí.
Currently Selected:
2 Tis. 3: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.