1 Petras 1
1
Tjietthie ke soeroe
1Ham Petras baatie aur ie tjietthie liekhiela. Ham Jiesoe Kriest ke ekgo pathaawal waala baatie.
Ie tjietthie oe iesaai log khaatien hai djaun pardesie ghat hia hoewa Pontas, Gaalaatsia, Kapaadosia, Aasia aur Bietienia diehaat me rahe hai. 2Pieta Parmeswar agahie se djaanat raha kie oe toelogke tjoeniega. Aur okar Pawietr Aatma toelogke alag karies hai djeme toelog Parmeswar ke baat soeniehe aur toelogke diel Jiesoe Kriest ke khoen dwaara safa karal djaai.
Parmeswar toelogke hardam auro djaada bhalaai kare aur sjaantie dewe.
Parmeswar kaise iesaai logan ke bieswaas poera kariega
3Aaw, hamlog aapan Prabhoe Jiesoe Kriest ke Pieta Parmeswar ke aadar karie dja. Oe oke maut me se djie oethaais hai. Aur aise karke oe hamlogke aapan barka daaja me ek naawa djiewan deis hai. 4Ie naawa djiewan se hamlog ab sab biesaal tjiedj ke agor sakiela djaun oe hamlogke deiga. Ie sab tjiedj hamlog khaatien swarag me rakhal hai djaaha oesab kabhie na sariega, koi na naksaan kar sakiega aur bhie na poeraan hoiga. 5Toelogke bieswaas dwaara Parmeswar aapan maahaan saktie se toelogke batjaawe hai djab lek ie djoeg ke ant me oe aapan biesaal soekh na dekhaaiga.
6Ie sab baat ke biese me khoesie rahiehe, tjaahe ab toelog koetjh dien khaatien bharmaawal dja hai aur ohie se toelogke har ek rakam ke doekh oethaawe ke pare hai. 7Ie moesiebat ke dwaara dekhaaiga kie toelog sattje ke Jiesoe Kriest ke oeppar bharosa kare hai kie na. Djaise barte aagie me ek toekkara sona djaraawe se dekha hai kie oe sona hai kie na, aisahie moesiebat me dekha hai kie iesaai log ke bieswaas satj hai kie na. Aur djab satj hai, tab toelogke bieswaas sona se auro biesaal hai. Sona poeraan hoi djaaiga, bakie sattja bieswaas sada rahiega. Aur djab toelogke bieswaas satj hai tab Parmeswar toelogke sab koi ke aage barka kariega aur biesaal banaaiga aur bhie okar raadj me ekgo oetja dardja par baithaaiga oe dien par djab Jiesoe Kriest lautke aaiga. 8Toelog oke biena dekhe tjaahe hai. Aur tjaahe toelog oke aadj tak na dekhle hai, tabbo okare oeppar bharosa kare hai. Aur toelog etana khoesie baate kie dher baat na bol paawe hai. Toelog etana khoesiaalie se bharal baate kie djaise swarag me pahoetj gaile. 9Ek dien Parmeswar toelogke bieswaas Jiesoe Kriest me poera kariega, tab toelog okar soekh me pahoetj djaihe.
10Pahiele ke sanesian agahie se bataais raha kie Parmeswar aapan bhalaai se toelogke batjaaiga aur toelogke bieswaas poera kariega. Bakie oesab na samadjh paawat raha kie oe kaise kariega. 11Tab oesab auro aage khodj karat raha kie kab aur kaun tem par ie sab kaam hoiga. Kriest ke Aatma oelogke diel me rahat raha aur oesabke agahie se djanaawat raha kie Kriest bahoet doekh oethaaiga aur ekare baad aapan maahaanta dekhaaiga. 12Pawietr Aatma oelogke bhie djanaais kie ie sanesa oesab khaatien na hai, bakie toelog khaatien. Aur oe swarag me se pathaawal gail hai ab ke tem ke sanesian ke djanaai dewe khaatien kaun baat bataawe ke tjaahie. Aisahie oesabhan toelogse Kriest ke biese me khoes khabar bataais. Ie khoes khabar etana biesaal hai kie swarag ke parie logan auro maange hai djaane.
Iesaai logan ke naawa aur safa djiewan
13Ie sab baat jaad karke aapan sotj-bietjaar ekattha kar, aapan djiewan ekdam se samhaar, aur aapan diel bhar se bharosa karke agor djab talak Parmeswar aapan sab bhalaai toelogke na deiga oe dien par djab Jiesoe Kriest lautke aaiga. 14Toelog Parmeswar ke larkan baate, ohie se okar baat soen. Aur na phien aapan kharaab laalietj poera kar djaise toelog pahiele karat rahiele djab toelog Jiesoe Kriest ke na djaanat rahiele. 15Parmeswar pawietr hai aur oe toelogke aapan khaatien bolaais hai. Oe maange hai kie tohoelog aapan djiewan ekdam safa se bietaaw. 16Parmeswar to apane biese me liekhwaais hai kie:
„Djaise ham pawietr baatie, oisane toelog bhie pawietr ban.”
17Toelog Parmeswar ke aapan Baap bolaawe hai. Bakie jaad kar kie oe bhie djadj hai aur djab oe faisala kare hai tab oe koi ke moeh na taake hai. Oe har ek iensaan ke rahan-tjalan dekhe hai. Ohie se toelog doenia par pardesie ghat aapan djiewan Parmeswar ke aage batjaaike bietaihe. 18Toelog djaane hai kie Parmeswar toelogke oe be-kaamiel djiewan me se kienies hai djaun toelog aapan baap-daada se apanaile hai. Aur oe toelogke tjaanie aur sona se na kienies hai. Ie sab poeraan hoi djaaiga. 19Bakie oe toelogke Kriest ke mahanga khoen se kienies hai. Ohie apane ke baliedaan karies hai djaise ekdam poera bhera ke battja begar bemaarie ke.
20Parmeswar doenia banaawe se pahiele sallaah karies raha kie Kriest apane ke baliedaan karwaaiga hamlogke paap hataawe khaatien. Aur ab ie djoeg ke ant me oe toelogke dekhaawe hai kie Kriest Ke hai. 21Tab okar kaam dekhke toelog ab Parmeswar me bieswaas kare hai. Ohie Kriest ke phien se maut me se djie oethaais hai aur oke maahaanta deis hai. Ohie khaatien ab toelog Parmeswar ke oeppar bharosa kare hai aur khoesiaalie se agore hai kie oe aapan sab kaam poera kariega.
22Toelog Parmeswar ke sattja baat Kriest ke biese me bieswaas karle hai. Tab toelog aapan diel safa karwaile hai aur ab ek safa diel se aapan bhaai-bahien ke pjaar kar sake hai. Ohie se rodj ek doesare ke diel bhar se pjaar kar. 23Parmeswar aapan baat dwaara toelogke naawa djiewan deis hai. Oe baat kabhie na miet djaaiga, bakie sada khaatien satj rahiega. Djab toelog soeroe karle ie sab baat me bieswaas kare ke, tab toelog djaise phien se paida bhaile rahiele. Toelogke dehie na phien se paida bhail, oe to mar djaaiga. Bakie Parmeswar ke baat toelogke aatma me ek naawa djiewan oegaais hai djaun sada khaatien rahiega. 24Okar poestak me liekhal hai kie:
„Djaise ghaas aur phoel djhar dja hai, oisahie iensaan logan ek tjhota tem khaatien djieje hai, tab mar dja hai.
Aur oesabke soendarta haldie se biet dja hai.
25Bakie Parmeswar ke baat sada khaatien rahiega.”
Aur ehie khoes khabar hai djaun toelogke khaatien soenaawal gail hai.
Currently Selected:
1 Petras 1: hns
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.