JOBE 1
1
Satana ki uhungia o Jobe
1Ta na mane o Jobe na atana ma ki oga i na agua i Usu. Ngaia ki rahesia God ma ki totosuria. Ngaia ki na mane koro. Ngaia ki hagatogo suria marena, hanana siana ki tasitasi. 2Ngaia ki aparara o karena gi pi ma ka karena gi oru. 3Ngaia ki nahunira na rehagaro gi pi na sipi, na rehagaro gi oru na kamelo, na rehagaro gi tage na puruka ma na tangarê gi rima na tonki. Ngaia ki nahunira nikâ gahu na enoni tagara. Ngaia ki ruruguha ngavê teharira hato i kerekê.
4O karena o Jobe ka heheuri ka magoto, manga bani hanana, ma ngaira hato o vahegoata ka arâ me ma ka guhira tare nikâ kesita. 5Igê na mahogotana i murini na ara ni magotoha, o Jobe ki bani riterite, hanana i tagarenia na vogasiha ni bonoteniha ni tasi iana na ara ni hitangita na karena, hanana i hagamatarotarora. Ngaia ki katokato tare vikana, suria i takusia vi ta na hitangita vari ki tasi ma ki pe hagakoro obana God.
6Matena i râ me na tangiana tangara na angero, hanana viga arâ me i pasina na Araha, Satana ki oga i berarogata. 7Na Araha ki hagatea, ki vi: “I he go râ me igê?”
Satana ki arami, ki vi: “Inê kê barebare kê atani arârâ ma i maveta.”
8Na Araha ki hagate, ki vi: “I hega, igo ko bâsia vari o Jobe na kariaku? I mareha rârâ ta na enoni i maveta, vige totosuriê ma ke koro manga ngaia. Ngaia ki rahesiê ma ki hagatogo suria marena, hanana siana ki tasitasi.”
9Satana ki arami, ki vi: “Ngaia ki pe rahesigo hagaborâ ma. 10Igo ko anumasira tare ngaia ma na ahemata iana ma na nahuninga hato iana. Igo ko haganahunia renira rako teha ngavê na togoha, ga sugi manasia na agua hagenani. 11Hoita, manga gu hagamagahurugi tenia na ara ni nahuninga iana, e, ngaia ke tê erasigo ngavê i maamu!”
12Na Araha ki vi tanga Satana, ki vi: “Hoita, igo ma! Gu katogi vigana na nahuninga iana, ma ko naka mavê ngaia o Jobe.” Hoi, Satana ki râ.
13I ta na tangiana, matena na karena o Jobe ka magoto i pasina o veogata, 14ta na mane tagara iana o Jobe ki gaha me ma ki vi tanga o Jobe, ki vi: “Igami kami hagatagarahira na puruka ka horoa na mako i mu. Na tonki ka ngêngê igê na pariki ni go hgarangigi na mu. 15Ka parama na Sabeo ma ka taharigami ma ka hanagora hato vê na tonki ma na puruka. Ngaira ka mutera hato vê na mane tagara iamu, nga noga ma inê kanigê tahi. Inê gitageku ma kanigê gava, hanana gê hagarongogo.”
16Matena i tamasi mênga, ma tani nikâ na mane tagara ki râ me ma ki vi: “Na marangeia ki suhira na sipi ma na mane ga bâsurira ma ngaira ka mute hato. Inê gitageku ma kanigê gava, hanana gê hagarongogo.”
17Matena i tamasi mênga, ma tani nikâ na mane tagara ki râ me ma ki vi: “Na apaneni me gi oru na Kalateo ka taharigami ma ka hanagora na kamelo ma ka mutera na kariamu hato, nga noga ma inê kanigê tahi. Inê gitageku ma kanigê gava, hanana gê hagarongogo.”
18Matena i tamasi mênga, ma tani nikâ na mane tagara ki râ me nogana ki vi: “Na karemu ka magoto i pasina o karemu hagenago. 19Na roga raha ki hita me tenia na bagamasusu raha. Ngaia ki hogea na ruma ka me hato igê na karemu. Inê gitageku ma kanigê gava, hanana gê hagarongogo.
20Hoi, o Jobe ki aharaga ma ki tarisigi na tuguni iana, suria i rugu na obana. Ngaia ki goro bêhuri ma ki ehu ki râ ki aba i ano. 21Ngaia ki vi:
“Inê kê vora rupaturi
ma kê page meme rupaturi.
Na Araha ki votongiê,
ma ki tavotavo aporo teniê.
Ge hagarahasia na Araha.”
22Henaka na ara ni tarani vigana ka tarahua o Jobe, ma o Jobe ki pe torahuria rârâ God ma ki pe tasi.
Currently Selected:
JOBE 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific