2 SAMUELE 1
1
O Tavite ki rongo vi o Saulo ki me
1I murina i bani me o Saulo ma o Tavite ki bani teharira na Amalekita, ngaia ki aporo i Sikilage ma ki oga igê surigi na tangiani gi rua. 2Igê na oruta na tangiana ta na mane ni me ki ata me. Ngaia ki râ me tenia na tênga iana o Saulo. Ngaia ki bani tarisia na tuguni iana ma ki bani makuia na bêna, suria i mesia o Saulo. Ngaia ki râ i pasina o Tavite, ki susure ma ki tubê so i ano, ki hagahigasia.
3O Tavite ki hagatea, ki vi: “Go râ me tenia i he?”
Na mane ki arami, ki vi: “Inê kê gava me tenia na tênga iata na Isiraelita.”
4O Tavite ki vi: “Suria i hega?”
Na mane ki arami, ki vi: “Na mane ni me iamami ka gava tenia na hearihatana. Rako na me iamami ka me. O Saulo ma o Jonatane o karena karu me nikâ.”
5O Tavite ki hagatea, ki vi: “Tanu hega kanigo girararerua vi o Saulo mo Jonatane karu me?”
6Na mane ki arami, ki vi: “Inê kê oga i hungana i Giliboa ma kê bâsia o Saulo, i maroro ki matarigia na ora iana. Na kati ni me ma na me igê na hosi na merongana ka ura hagarangia ka rihuia. 7Ngaia ki ahoro me ki bâsiê. Ngaia ki uniê. Inê kê arami, kê vi, ‘Oi, maneraha!’ 8Ngaia ki hagateê, ki vi: “Ti kanigo?’ Inê kê hagarongoa, vi inê ka na Amalekita. 9Ngaia ki vi, ‘Râ me ku nahuiê be me! Inê kê mamari ngavê ma kê sugi meme noga.’ 10Tahema inê kê râ tanga ma kê nahuia ki me, suria inê kê girara, vi ngaia ki sugi vota ke me. Inê kê tavoa na tarepuri i bêna ma kê tarasia râ na rabu i rimana. Inê kê migirâ me tangago, maneraha.”
11O Tavite ki hetaki ma ki tarisigi na tuguni iana marena ma na me hato iana ka kato vikana nogata. 12Ngaira ki rugu na obata, ka hari rârâ mataro me ki bungi ma ka mesira o Saulo, o Jonatane ma na Isiraelita na kariana na Araha, suria ga rako na ani ga me igê na hearihatana.
13O Tavite ki hagatea na mane i torea me na rongoha, ki vi: “Pasimu i he?”
Na mane ki arami, ki vi: “Inê ki na Amalekita ma kê oga i na apanena iamu.”
14O Tavite ki hagatea, ki vi: “Go pe magu ma kanigo nahuia ki me na maneraha, na Araha i atea?” 15Hoi, o Tavite ki unia me na hitangita na me iana ma ki bonasia, ki vi: “Nahuia ke me!” Na me ki ahura hunia. 16O Tavite ki vi tanga na Amalekita, ki vi: “Igo maremu kanigo hagaratemu. Igo ko naka tangago maremu, suria go ranganigo maremu, vi igo kanigo nahuia ki me na maneraha, na Araha ki atea.”
O Tavite ki angi maramara renirerua o Saulo mo Jonatane
17O Tavite ki kiria na ki ni angiha maramara renirerua o Saulo mo Jonatane o karena. 18Ngaia ki bonasira na ai ni Juta ka hagesuringenia. Na ki ni angiha ngekê ki oga igê na Buka iana o Jasare. I râ vikê:
19“Isiraelita, na mane ga bêngenigamu
ka me ka tâ surigi na hungani.
Na mane ni me ramo iami
ka me igê na hearihatana
20Siana kamu hagarongo i Gate,
se vi igê na mahera i Asekelone.
Siana kamu hagakoro obata na gete na Pilisitina.
Siana kamu katora ka vagevage
ka kareta na ahuroto.
21Siana ki rangirangi se na korupu
igê na hungani i Giliboa.
Na mako igê ke bêratega tare,
suria na bêata iata na me ramo
ka babarogani ka tâ i ngekana.
Na bêata iana o Saulo ki hato
vige togatoga nikâ renia na oile.
22Na epage iana o Jonatane
ki haritake tare.
Na tatapa borahu iana o Saulo
ki henahu tare.
Ngairerua karu mutera na merongaterua
ma karu ohegi na obata.
23Saulo mo Jonatane
muru hetakuiheri ma kamuru hekorokoro tare.
Muru hetarisurige
igê na ogaha ma igê na mera.
Muru gaha teharira na ahetaronga.
Muru ramo teharira na laione.
24Gete na Isiraelita, mu mesia o Saulo.
Ngaia ki hagatugunigamu
renigi na gahu rotorotoaga memera.
Ngaia ki hagarênigamu
renigi na rêni ma na golo.
25Na me ramo ka mute,
ka me igê na hearihatana.
O Jonatane ki me ki tâ
igê na hungani.
26Goaku o Jonatane, inê kê mesigo.
Inê kê takuigo ngavê.
Na hetakuiha iamu tangê
ki teharia na anita na gete.
27Na me ramo ka me.
Na tangaruha iata ka tasi vê.”
Currently Selected:
2 SAMUELE 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific