2 Tesalonicabo 1
1
Raannoxon Pablo betan huishahibo
1Pablo, Silvano, Timoteo noque rahsibi hihxon tah non mato qui joi raanai, noque huetsabon. Man noquen Papa Dios betan hihquibo, man noquen Hihbo Jesucristo betan hihquibo qui tah non joi raanai, Tesalónica jema janin. 2¿Noquen Hihbo Jesucristo betan Papa Diosen jahuen shinan mato hinanyamahihquin? ¿Jahuen shinan bichish man sirijaquin shinanax sca jihueyamahin?
Tiromabo Papan casticanyaxihqui
3Papan joi nincacoinquin tah man shinan hihti caibojahi, noque huetsabon. Jatihixonbi tah man joni huetsahon shinanax hahxonnannanai yanapanhanani. Jaa copi tah hen jascabijaquin Hahxon tah min jai Papan hahcai, mato yocaxonxon. Hahxoncoinquin ta mato coshi hinanihqui. 4Tiromabaan mato hohmis hohmisjaxon tiromajahibaan bi man tenexon jenexonma shinancoinai tah non noquen huetsabo tocanxon noquenbi jato yohihi. 5Mato tiromajahiboya honannahue. Papan ta ponte shinanihqui. Janoxon jan jihuemahi janin man hihyaxahnon ta mato sirijahiqui. Jaa copi tah man yomanahaquehtai.
6Mato tiromajahibo copixonquin ta Papan jato hihti tiromajayaxihquiqui, jascajaha ta ponte qui hihxon. 7Hihti perehihnatai chihiyahpa ta naihoh quehax noquen Hihbo Jesus sanarenenyaxihquiqui, jahuen coshi yonotibo betan. Joxon ta matoyabi noque tantimayaxihquiqui, man rahma tenehibo. 8Noque tantimaxon bi ta copixonquin noquen Papa Dios honancatsihyamahibo, noquen Hihbo Jesucristo joi siri nincayosmabo jaan casticanyaxihquiqui. 9Jaan casticana ta jascabi sca queyonihbo hihyaxihcanihqui. Noquen Hihbo janin ta jaabo jahuentianbi jatimahiqui. Jahuen xabapan xabataima qui ta jato potayaxihquiqui. 10Jaa noquen Hihbo jahuiya tah non noque huetsabo rahsixon jaa hihti coshi non jisyaxihqui, nete hihbo. Hihti coshihiya tah non rahte rahteyaxihqui, jahuen joi nincacoinnihbo. Mato rihbi tah man janobi hihtihi, non yohihah nincacoinnish.
11Jaa copi tah non mato jascabijaquin yocaxonai: Min jato yohini betanbi senenahbo jato sirijahue Papan, pishinyamahahbo. Sirijaquin shinanxon hahcatsihquibo jatihibi hahcábo miin coshin jato jascajamahue, shinancoinax teetai tihibi rihbi hahcábo jato coshi hinanhue Papan, hah tah non jai mato yocaxonquin. 12Jascapahboxon tah man jato noquen Hihbo Jesucristo hihti shinanyahi man jismatihi, mato rihbi jahuen shinanyahpabo jisíbo. Noquen Papan ta mato jascajaxonihqui, noquen Hihbo Jesucristonen rihbi.
Currently Selected:
2 Tesalonicabo 1: kaq
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.