San Marcos 4
4
Xcuent ngon
(Mt. 13:1‑9; Lc. 8:4‑8)
1Lëë Jesús bislo bluuy xtiits Dios chu nistoo stub. Aan como lëë meñ ptyopbe, lëë Jesús kwyo tu leñ barkw nii so siko aan lëë xaa kwsob leeñgo. Lëë meñ kwche chu nis. 2Tsigo lëë xaa bislo beeñ kseedy xaa meñ nonsyke con cuent. Aan lo xiwseedy xaa xñee xaa:
3—Kol kon tu xcuent ngon nii pchoo kwey kon. 4Aan tsiñee lëë xaa bislo lo wlaal xob, grol xoob xaa byab kexka chu nëz aan kuktop kaa mguiño. 5Lëë stub lugar lëë xob byab lady kyo laañee nchedy ndaly yu. Blyëëdy pchukë xob ko lyu porñee nxijty kwyow. 6Per tsiñee lëë ngbidz kwlañ, lëë ngbidz psaayo, aan como kindy luw lëëw pidzy. 7Lëë stub lugar lëë xob byab lady yakitsy aan lëë yakitsy kwroob aan lëëw kwtiño koktyo. 8Per lëë stub lugar lëë xob byab laañee neely lyu aan lëëw kwroob. No ladyo kwsob tsongalyo ni tu kyoowo. Buen koko.
9Aan loxsye ngo lëë Jesús chëb:
—Kchësy to siñee chakladzy to kyeñ do, kol jkëëtyag.
Lëë xpëëdscuel Jesús xñabtiits penak nii nonsyke con cuent chuuñ kseedy Jesús
(Mt. 13:10‑17; Lc. 8:9‑10)
10Tsiñee lëë Jesús byaan nonsy, lëë kchësy meñ nii nak ksa xaa ni ksa tsiipchop xpëëdscuel xaa kwnabtiits chëb:
—¿Xa nak cuent nii lox psool?
11Tsigo lëë xaa kwëb chëb xaa:
—Kchë lo meñ tiemp gon kwyolan xa nak xkyalwnabey Dios. Lëë na lëëw xluuy xaa lo do. Per lëë meñ nii nche tublad nonsyke con cuent no nii kseedy meñ go 12parñee nikxe xaapee kuy meñ go, per kandy me, ni nikxe mastre kon meñ go, per kyeñdy me, ni parñee kpikchedy styoo meñ go lo Dios tsiin ktsily Dios xtol meñ go.
Lëë Jesús xñee xa nak xcuent ngon
(Mt. 13:18‑23; Lc. 8:11‑15)
13Lëë Jesús chëb:
—¿Xyeñdy to cuent re lë? ¿Xa kyeñ do nii sëëdre tsigo? 14Lëë meñ nii chan xob nak sinak meñ nii xluuy xtiits Dios. 15No meñ nii nak sinak xob nii byab lo nëz, nii chon xtiits Dios, aan xlyëëdyak lëë xaatox chiklaats nii bñaa leñ styoo meñ go. 16No gaa meñ nii nak sinak xob nii blyaal lady kyo, nii xle chon xtiits Dios, 17per como kindy luw xsyob lidyo. Singo nak meñ go tsiñee chan meñ go nii lëë kyalnë sëëd por xtiits Dios. Xchoso gaa styoo meñ go. 18No gaa stubla meñ nii nak sinak xob nii blyaal lady yakitsy, nii chon xtiits Dios, 19per mastre sini kchë cos lo kislyu re kik meñ go. Choki meñ go kap kchëlo cos, per xaktyee xkëëtiw. Kchë ngo xsyëëb leñ styoo meñ go aan xkiño xtiits Dios, ni xkaw jkiiñ meñ go lo Dios. 20Per no gaa meñ nii chon xtiits Dios aan xniladzyo. Aan chak meñ go sinak kok xob nii blyaal laañee neely lyu. No meñ go nak sinak xob nii kwsob kalyptsii xob lady, ni tsongaly xob, ni tu kyoow xob.
Xcuent bini
(Lc. 8:16‑18)
21Ni chëbak xaa:
—¿Pe mod xyooy tu bini nayak parñee tsow leñ tu cajón o leñ lon gaa? Lëdyo gon. Klaa xsyob tu bini parñee ksaaniw. 22Por nody ni tu cos nii chak tsilaan nii kchukëdy, ni nody ni tu cos ngueetsy nii kak ndoondy. 23Kchësy to siñee chakladzy to kyeñ do, kol jkëëtyag.
24Ni chëbak xaa:
—Kol ksal nii xkëëtyag to, porque sinak nii xsee gak to chan do xcombañer do, singo gak ksee Dios kan xaa lëë do, ni stsiibre xaa stublaw loo go. 25Por meñ nii chap palalo, lëë Dios kteerew. Per lëë meñ nii pe chapty, lëë Dios kla axte nii wiñ nii chapsye meñ go.
Xcuent xob nii xroob
26Ni chëbak Jesús:
—Nak laañee xñabey Dios sinak tu xaa nii xlaal xob. 27Loxsye ngo lëë xaa xyey kuutkesy aan tsi lëë lyu xyaani lëë xaa chische, xtye kyool ni xtye tse, per nandy xaa dyon xa kwlañ xoob xaa ni xa kwroobo. 28Aan xaly lyu xroobo xob. Klo xlyañ xikwo. Loxsye ngo lëëw xchukë to aan xlyëëdyak lëëw xsyo xob. 29Aan tsiñee lëëw lox chal, lëë xaa chiktopo, porñee lëë xtiemp kwlaap kol.
Xcuent medzy martas
(Mt. 13:31‑32; Lc. 13:18‑19)
30Ni chëb Jesús:
—¿Pe cos nak sinak laañee xñabey Dios dyon, ni pe cos chak si chako? 31Nako sinak tu medzy martas nii xñaa lo kislyu. Lëë medzy ko nak tu medzy nii mastre wiich lo kislyu. 32Per tsiñee lëëw lox xñaa, xroobo aan mastre chak ngolo lo kchësy kizh. Chak nxii xikwo ni axte mguiñ schilo ko xipchoos lo xingalo.
Lëë Jesús xñee penak nii nonsyke con cuent chuuñ kseedy xaa
(Mt. 13:34‑35)
33Nonsyke con cuent beeñ kseedy Jesús meñ, axte laañee byeñ xaa nii schilo kyeñ meñ. 34Per ni tu pe bluuydy xaa singosy, sink nonsyke con cuent, nikxe tseyladzy xñee xaa xa nak cuent ko lo xpëëdscuel xaa.
Lëë Jesús xkwëës me nii xpi lo nistoo
(Mt. 8:23‑27; Lc. 8:22‑25)
35Tsiñee lëë lyu pkyey misme tse go, lëë Jesús chëb lo xpëëdscuel:
—Kol tsoo stublad chu nistoo.
36Tsigo lëë xpëëdscuel Jesús psaan meñ, aan lëë xaa sini Jesús leñ tu barkw nii nol Jesús. Aan wi stubla barkw si ksa xaa. 37Per lëë tu me dox bislo xpi xchëëp barkw, aan lëë nis bislo chisoli xchoon leñ barkw. Singo lëë barkw no kyatsë nis. 38Aan lëë Jesús nixyesy xan barkw ngookwsye xaa tublë yag. Lëë xpëëdscuel xaa beeñ kna xaa chëb xaa lo xaa:
—¡Maestre! ¿Pe xyeñdyoo nii lëë no kety lo nis re?
39Tsigo lëë Jesús kuxche aan lëë xaa kwëntseeb lo me ni lëë xaa chëb lo nistoo:
—¡Kwlës! ¡Tsesy!
Lëë me kwlës aan tsesy byak. 40Loxsye ngo lëë Jesús chëb lo xpëëdscuel:
—¿Penak xtsyeb to? ¿Pe karty kap to Dios confians?
41Per loñee singootyee bii xtsyeb xpëëdscuel Jesús, lëë xaa xñabtiits lsa xaa lo xcombañer xaa xñee xaa:
—¿Cho nak xaa re nii axte me ni nistoo xsoob xtiits xaa?
Currently Selected:
San Marcos 4: ztq
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.