Zacarías 1
1
Ñim Nataxala' iỹaxana som lalamaxat nhuo' le'ecpi
1Qaq huetoigui so ca'agoxoic ocho, co'ollaq mashe dos vi'iye da nta'a so Darío, nache Ñim Nataxala' ỹami' so la'aqtac so la'aqtaxanaxanec Zacarías maye llalec so Berequías qataq laual so Iddo, nache 'enapec: 2«Aỹem Nataxala', maye Qaica ca Seqalanapec, ỹataqta salemataỹa som hua'au qarta'ailpi. 3Qaq ỹoqo'oye nagui, 'aua'aqtaxanem qome nam ỹalamaxat nhuo' le'ecpi da ỹa'aqtac, 'eeta': Aỹem qañe'eguelaqaỹa qome, nache Aỹem qami' she'eguelaxagueta. Qaq 'era da ỹa'aqtac Aỹem Nataxala'. 4Qaq saishet qome, da qaue'enaxache da lataxac so hua'au qarta'ailpi, maye so hua'au na'aqtaxanaxanecpi da'aqtaxanem co'ollaxa da ỹa'aqtac, da yaqto' ỹaxanec da qauem lataxac, qataq nam qauem maye ỹo'ottacpi, qalaxaye somayepi saishet co'ollaxa da Aỹem na'axaỹaxana, qataq saishet da Aỹem ỹalaxaguet. Qaq 'era da ỹa'aqtac Aỹem Nataxala'. 5Qaq cam qarta'ailpi ¿ca hueta'ague nagui? ¿Peta'a nache 'eetai' da nca'altauec so na'aqtaxanaxanecpi? 6Qalaxaye naua ỹa'aqtaqa, qataq naua ỹamaxasoxonaxaco, maye sanema som ỹamaxashecpi maye ỹa'aqtaxanaxanecpi, iviro'ot co'ollaxa so hua'au qarta'ailpi. Qaq somayepi aỹem ỹe'eguelaxa co'ollaxa, cha'aye ỹaỹateeteguet da Aỹem Nataxala' maye Qaica ca Saqalanapec, sero'oguet co'ollaxa dam naigui da maiche lataxac, qataq nam ỹo'otpi somayepi.»
Da nauanaqchec co'ollaq qaila'a so caipi
7Qaq 'era da la'aqtac Ñim Nataxala', maye saconeguet co'ollaxa, aỹem na'aqtaxanaxanec Zacarías, maye aỹem llalec so Berequías, qataq aỹem laual so Iddo, huetoigui so na'a'q veinticuatro som ca'agoxoic once, co'ollaq mashe dos vi'iye da nta'a so Darío. 8Qaq huo'o so pe, nache huo'o so ỹauanaqchec: Aỹem sela'a so ỹale netalec so caaỹo togaxaraic. Somaye netangui so ca'amegue nachattanguilo soua 'epaq le'enaxat arrayanes, qataq hueta'ague na l-laq somaye so laỹepi caipi, huo'o so togaxaraicpi, tocalecpi, qataq so lapaxaxaicpi. 9Nache aỹem senataxan, sheeta': «'Am Nataxala', ¿negue't de'era ỹalleppi maye netasheguem?» Qaq som namaxashec piguem le'ec maye aỹem detaqtague', aỹem ỹasateguet, 'eeta': «Aỹem 'am sa'aqtaxanem qome negue't damayepi.» 10Huaña, nache som ỹale maye nachattanguilo soua 'epaq le'enaxat arrayanes, 'enapec: «De'erapi nachera da namaq Ñim Nataxala', da yaqto' queuolec 'enauac ana 'alhua.» 11Nache som netasheguempi da'aqtaxanem som lamaxashec Ñim Nataxala' maye nachattanguilo soua 'epaq le'enaxat arrayanes, somayepi, 'eeta': «Qomi' mashe seconnaqteguelec 'enauac ana 'alhua, qaq anamaye selaqalec da ỹe'emaqtac, qataq huo'o da nlagaxayec.» 12Nache som lamaxashec Ñim Nataxala', 'enapec: «'Am Nataxala' maye Qaica ca 'Auqalanapec, mashe ivi' naua setenta vi'iye da 'aunotega na Jerusalén, qataq ye huaqta'a't nỹecpi maye ỹotta'a't naua nañalo ye Judá. Qaq ¿chaq lcate' vi'iye qome caua inoxoorec, nache 'avi'eguelaxa da 'auchoxoren namayepi?» 13Qaq Ñim Nataxala' ỹasateguet ỹauota'aisalo naua huesotte' la'aqtaqa da ỹa'añaqchet, som lamaxashec maye aỹem detaqtague', 14qaq ime, nache som namaxashec piguem le'ec aỹem 'enapega, 'eeta': «'Era da la'aqtac Ñim Nataxala' maye Qaica ca Ỹaqalanapec: ‹Aỹem ỹataqta sauotec na Jerusalén, qataq añi qaỹoqotcheguemec qasoxonaxa ye Sión. 15Qaq ỹoqo'oye da ỹalemataic, 'eroigui da talec nam ỹotta'a't shiỹaxauapi maye qaica ca lhuogoxo, cha'aye co'ollaq ñaq saq 'amaqtaq da ỹayeloxo, nache namayepi nquigaxatec dam lle'etaxaloxo. 16Qaq ỹoqo'oye Aỹem Nataxala', sheeta': Aỹem nagui she'eguelaxa da sechoxoren ye Jerusalén, qataq so'otec qome da qaltaq qanauaxaỹaxaasheguem añi atamnaxaqui, qataq 'enauac yem huaqta'a't nỹecpi.›» 17Qaq som namaxashec piguem le'ec, qaltaq aỹem 'enapega, 'eeta': «'Aua'axat nataqa'en qome de'era maye 'eeta': Aỹem so'otec qome nam ỹalamaxat nỹecpi da qaltaq nquictasheguem da lyacỹaxac; qataq sanem da dalaxaic la'añaxac ye Sión, qataq ỹoltaq she'eguelaxalec da sa'axatec ye Jerusalén da nacheye ye lleca'aguishec.»
Da lỹa lauanaqchec so Zacarías
18Qaq aỹem, qaltaq huo'o so lỹa ỹauanaqchec, co'ollaq ñamatasheguem nache sela'alo soua cuatro shiguiỹac lcoue. 19Nache senat som namaxashec piguem le'ec maye aỹem detaqtague', da chaq negue't ca naiguilo se'esoua shiguiỹac lcoue, nache somaye, 'eeta': «Se'esoua shiguiỹac lcoue naiguilo da la'añaxac nam ilagaxatapec co'ollaxa na lma' ye Judá, Israel qataq ye Jerusalén.» 20Ime, nache Ñim Nataxala' qaltaq aỹem ỹachaxanalo soua cuatro shiỹaxau' maye lcat lo'ol. 21Nache aỹem senataxan sheeta': «¿Chaq negue't ca huo'omshe ana'c ne'enaua lcat lo'ol?» Nache Ñim Nataxala' aỹem ỹasateguet, 'eeta': «Naamaye 'eeta'ama soua shiguiỹac lcoue, maye naiguilo som ilagaxattac co'ollaxa na lma' ye Judá, nache ivira'a co'ollaxa da qaica ca ishet da dataỹa'aguet, qaq ne'enaua lcat lo'ol ana'c da iviloxolaqchet naqa'en da lcolanaxa, qataq nlaxaañi da la'añaxac nam ỹotta'a't shiỹaxauapi maye iquetogoqtapigui co'ollaxa ye Judá qataq ilagaxattac na lma' yemaye.»
Currently Selected:
Zacarías 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.