Proverbios 4
4
Nqataxac da yaqto' qanayectegue da no'on ñecỹaxac
1Qami' ñalaqpi, ỹataqta qana'axaỹaxañiỹalo qome
naua lapaxaguenataxanaxaco ca qarta'ai,
qataq qaloitegueta yaqto' qauauattoñi da naỹaanataxanaxac.
2Aỹem, qami' sanema na ỹataqta no'on ỹapaxaguenataxanaxacpi,
qaq saishet qome da qoquiỹa'ai ne'ena iqataxacpi.
3Cha'aye aỹem nataqa'en huo'o co'ollaxa so ita'a,
qataq aso ỹate'e ỹataqta aỹem lauotaxat co'ollaxa,
4so ita'a naxa da aỹem ỹapaxagueetac nache, 'eeta':
«ỹataqta 'oxotoiguilo qome añi 'arquiyaqte naua ỹa'aqtaqa,
qataq 'aualaxagueta naua ỹamaxasoxonaxaco
yaqto' nache 'eetai' da 'anca'altauec.
5'Auaconeguet qome da naỹaanec,
qataq da naỹaanataxanaxac,
qataq saishet da 'aucoua'aisalo naua ỹa'aqtaqa,
qataq saishet da qoca'aisalo naamaye.
6'Auauotec qome de'era naỹaanec,
qataq saishet da qoca'ai damaye yaqto' damaye 'am npaxattalec.
7'Aua'auaxaañi qome da 'auaconeguet da naỹaanec,
qataq ỹactec 'anqa'en da 'auaconeguet da naỹaanataxanaxac.
8Qataq 'auauotec qome da naỹaanec,
yaqto' damaye ỹo'ot da 'am 'amaqtaqaic,
ỹataqta 'ansoxouo qome damaye yaqto' ỹo'ot da 'ayo'oxoyec,
9damaye ỹanagui na 'arqaic ca 'onaxaic llo'oxoraxat,
qataq 'am ỹaatem da ỹataqta no'on 'ayo'oxoyec.»
10'Am ỹalcolec, 'ana'axaỹaxanalo qome naua ỹa'aqtaqa,
qataq 'auaỹamaxatteque yaqto' nquictrauec naua vi'iye da 'anachaalataxac.
11Aỹem 'am sachaxaategue da llec de'era naỹaanec,
yaqto' qoquetegue ñaqa'en da no'on ñecỹaxac,
12qaq da qoquetegue damaye nache qaica ca nqanaxattac da 'arqauaxac,
qataq saishet da huo'o ca 'auquia'aqaisop da 'anqalgoqta.
13'Anasoqchiyiñi qome naua ỹapaxaguenataxanaxaco,
qataq saishet da qoca'aisalo naamaye,
'auaỹamaxatteque cha'aye nachenaua nam ỹo'o't da 'arca'alaxa.
14Saisheto' da 'auca'ategue da lqauaxac na 'etaxaloxoicpi,
qataq saishet da qoquegue da qauem lataxac.
15'Avita'a qome da qoquegue so llec namayepi,
qataq 'auỹoolec qome somaye nacherata da 'anapactalec,
16cha'aye namayepi saishet da lactapiguiñi da sa ỹo'ot ca qauem,
qataq sa do'oche da saxanaxa da ỹo'otec ca qauem ca lỹa.
17Namayepi aloq na qauem qataq na laquip da sarecheraqtaxan.
18Da nqa'aicỹaxac nam no'on da lataxac,
qalaq 'eeta'am na le'eraxa ca dalaxaic na'a'q,
damaye nache nquictauec na le'eraxa,
choche ivitta'a da ỹataqta yo'oqchiguiñi.
19Qaq so nqa'aic na qauemaicpi qalaq napalñi,
qataq saishet da ỹaỹaten ca quia'aqaisop.
20'Am ỹalcolec, 'aloteleguete qome naua ỹa'aqtaqa,
qataq 'ana'axaỹaxaachiguilo naua shena'ape.
21Saishet qome da sa 'auloleguete naamaye,
ỹataqta 'oxotoiguilo da 'antoonaxac.
22Cha'aye naamaye ỹanem da lca'alaxa ca ỹanatalo,
qataq nataren 'enauac da lo'ocỹaxac.
23Qataq ỹataqta 'antela'a da 'antoonaxac,
cha'aye damaye qaica ca lỹa 'eeta'am,
damaye nache chegaqaigui da achaalataxac.
24'Avito'o' qome da qonapec ca saq'en,
qataq 'axanec qome da natenataxanaxac.
25Nacherato' da ỹalemaqtec 'anqa'en da 'armeenaxanaxac,
qataq 'alotegue da 'ata'ague.
26Qataq 'alochiguinguilo naua piguiñalo naua 'arapia'ate,
qataq 'auaỹamaxatchiguiñi 'enauac da 'arqauaxac.
27Saishet da 'axanec so 'anqa'aic,
qataq 'avita'a da qoquegue ca qauem.
Currently Selected:
Proverbios 4: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.