Proverbios 3
3
Nqataxac da yaqto' qaivi' da naỹaanec
1'Am ỹalcolec, saisheto' qome da 'aucoua'ai na ỹapaxaguenataxanaxacpi,
'oxotoigui qome da 'antoonaxac na ỹamaxasoxonaxacpi,
2yaqto' qaỹoqtrec naua na'axa'te
qataq naua vi'iye da 'anachaalataxac,
qataq 'am nlaqchigui da 'al-lagaxayec.
3Saisheto' qome da 'aỹa'axanec
da nsoxoyec, qataq da 'eesa lataxac,
qataq 'auachetac qome 'eeta'am 'anqa'en aca 'arqola.
Qataq 'oxotoigui da 'antoonaxac.
4Yaqto' 'am huetalec da lqouagaxanaqtaic Ñim Lo'onatac 'Enauacna,
qataq no'on da 'ana'aqtaguec da 'aualectaigui nam shiỹaxauapi.
5Ỹataqta 'aumato'ot da 'arquiyaqteỹaxac
da 'aupi'iỹa'a Ñim Nataxala',
qaq saishet da 'aupe'etega da maiche 'araỹaanataxanaxac.
6'Auacho'ot Ñim Nataxala' 'enauac nam 'auo'otpi,
yaqto' Ñimaye ỹo'ot da no'oitegue da 'icỹaxac.
7Saisheto' qome da 'aupettega da 'am ỹaanaxanaxaic,
nacherata da huo'o naq 'enec 'anqa'en Ñim Nataxala'
qataq qoca'ai nam qauemsat,
8cha'aye nachera da ỹoqta no'on natannaxanaxat,
maye ỹa'añaqchet da 'aro'ocỹaxac.
9Huo'o naq 'enec 'anqa'en Ñim Nataxala' maye chegoqo'ot da 'arsallaxa,
qataq 'aỹa'anem ca la'auaxanec ala ca 'añiguishecpi,
10huaña nache ỹataqta nlaqchigui,
ca naỹamaqtaxaqui na ala ca 'añiguishec, qataq ca laỹe' na lataxa.
11'Am ỹalcolec, saishet qome da qaica ca naigui 'anqa'en
cam lapaxaguenataxanaxac Ñim Nataxala',
qataq saishet da 'aunoỹa'aguet Ñimaye da 'am ntenaxaalec,
12cha'aye Ñim Nataxala', ỹataqta ỹapaxaguen cam ỹauotec,
'eeta'am ca nta'a da ỹapaxaguen cam lauotaxat llalec.
13Ỹataqta machiguiñi qome ca ỹanata da naỹaanec,
cam ỹaconeguet da naỹaanataxanaxac,
14cha'aye damaye napacalec da lashiichiỹaxac aca lcat plata,
qataq napacalec da lashiichiỹaxac ca oro.
15Da naỹaanec napacalec da lashiichiỹaxac ca ỹataqta 'onaxaic coma',
qataq napacalec ca ỹataqta qanqopita,
cha'aye saishet da ivi' da lyacỹaxac da qanaloqneguet damaye.
16Na aloiguishec lhuaq ỹan da logoraic achaalataxac,
na ne'emaxashec lhuaq qalaq ỹan da nsallaxa qataq da ño'oxoyec.
17Da llecỹaxac damaye ỹataqta 'onaxaic,
da qanayecteguelo naua lleco qalaq ỹo'ot da nlagaxayec.
18Da naỹaanec chegaqaigui da nachaalataxac cam ỹaconeguet,
qaq ỹataqta machiguiñi cam ỹaỹamaxattec damaye.
19Ñim Nataxala' do'onataxana co'ollaxa da laỹaanec da ỹo'ot ana 'alhua,
qataq do'onataxana da lauattonaxanaxac co'ollaq ỹo'ot na piguem.
20Qataq ỹauota'a dam laỹaanec co'ollaq iỹottecache na 'etaxat aso auaxai,
qataq da 'eetec na lo'oc na piguem da chegaqaigui naqa'en na sheue.
21'Am ỹalcolec, saishet qome da 'aỹa'axanec da ỹaỹamaqchiguiñi lataxac,
qataq 'alotelec da ntelaqchec,
22cha'aye damaye chegaqaigui da 'arca'alaxa,
qataq 'am ỹo'oxoren 'eeta'am aca nqola.
23Yaqto' qaica ca tatapigui 'arhuel da qoquetague' ca nqa'aic,
qataq saishet da 'auquia'aqañi.
24Da 'anmatec qalaq qaica ca 'añe'etaique,
qataq da 'annaañi qalaq qaica ca machaqca da 'aro'ochaxa.
25Qataq saishet da 'aye'etega ca nque'elaxatta lchec,
qataq cam ñaq naỹa'a da nlaxaañi na qauemaicpi,
26cha'aye Ñim Nataxala', nache 'eetai' qome da 'am hueta'aguet,
qataq 'am ivitaqna'a da 'auapiỹangui aca nqoina.
27Saishet qome da sa 'anqouaguec ca 'am iỹaxanot da 'autauan,
lamaaxa da 'am hueto'ot cam iueetaique camaye.
28Qataq saishet da 'auatta'a ca lỹa na'a'q
da huo'o ca 'artaunaxanaxac maye ishet da 'aỹa'an nagui.
29Saishet qome da 'auo'otec ca saỹaỹamaxañi,
ca 'arỹa maye huo'o da lpi'iỹaxac da qoneta.
30Qataq saishet da 'anmitta'a da 'ancotaỹapegue' camachaqca
da saishet da 'am qaỹo'otec ca saỹaỹamaxañi.
31Saishet qome da 'aupa'agueetac ca sancherapec,
qataq saishet da 'aue'enaxat da lataxac,
32cha'aye Ñim Nataxala' ỹataqta ỹaỹemec na qauemaicpi,
qalaxaye nauochaxaua ca no'on da lataxac.
33Ñim Nataxala' ỹasaxalec ca qauem ca lma' ca qauemaic,
qalaxaye ỹasaxalec da lchoxonnataxanaxa ca lma' ca no'on da lataxac.
34Ñim Nataxala' ỹataqta ỹe'enai' na 'enaxanaxaicpi,
qalaxaye ỹanem da nqouagaxa ca qaica la'amaqchec.
35Na ỹaanaxanaxaicpi qalaq huo'o da la'amaqchec,
na qaica ca ỹaỹaana'a qalaq qaica ca la'amaqchec.
Currently Selected:
Proverbios 3: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.