Proverbios 24
24
1Saishet qome da 'auqopitta'a na qauemaicpi,
qataq saishet da 'auyaqta'a da 'aualectaigui namayepi,
2cha'aye namayepi nda'a't da iuennatapega da ỹo'ot ca loquiaxac,
qataq da detaqtac qalaq nda'a't na qauem.
3Cha'aye da qano'oxoosheguem ca nỹec
qalaq qairolec da naỹaanec,
qataq da qalapaxañi ca lo'oxonaxala',
qalaq qairolec da nauattonaxanaxac,
4qataq chegoqchigui da nauattonaxanaxac da qaiỹoxoigui
ca nỹec na no'on nogoxoshetpi maye ỹataqta huo'o da lyac.
5Cha'aye ca ỹaanaxanaxaic ỹataqta huo'o da la'añaxac,
qataq ca huattonaxanaxaic nquictasheguem da la'añaxac,
6cha'aye da huo'o ca alaataxac qalaq qaỹaỹamaxatchiguiñi da qaỹo'ot ca llec,
qataq ishet da qaivira'a da nauegaxanaxac
da qalota na nqataxac lo'opi.
7Ca qaica ca ỹaỹaanapec sa ỹaỹaten
ca llec ca la'aqtac da dataỹot ca nmit na nasouaxashet,
cha'aye saishet da naloua'a de'era naỹaanec.
8Ca nache 'eetai' da qauema naua lhuennataxaco,
qalaq camaye nache le'enaxat qanqa'en da qauema na lhuennataxaco.
9Na lhuennataxacpi ca qaica ca ỹaỹaanapec
qalaq ndotec na nasouaxashetpi,
qataq ca sairen ca lỹa qalaq qaica ca isheteguet camaye.
10Da 'auqalvi qom huo'o ca qouaigui,
qache saq 'amaqtaq da 'ara'añaxac.
11'Anca'alaxatec qome ca tata'a da l-leuaxa,
qataq 'anca'alaxateeguesop da lchec ca ileetapigui'.
12Cha'aye na'aictoxo' da qonapec sa 'auaỹaten de'era,
qalaxaye Ñi nmit 'enauacna, Ñimaye ỹaỹateetac damaye
qataq Ñim 'am ilotague' ỹaỹateeta de'era,
Ñim isheeten qome ca lo'onatac ñi 'oonolec shiỹaxaua.
13'Am ỹalcolec, qollec qome na te'esaq lli'i maye ỹoqta no'on,
cha'aye da lamaicỹaxac da taigui na 'ap qalaq ama naqa'en.
14Qaq de'era lamaicỹaxac nache 'eeta'am qome 'anqa'en
da naỹaanec qataq da nauattonaxanaxac,
qaq da 'auanata damaye nache ishet da no'on da 'icỹaxac,
qataq da 'anaquitaxac saishet da nlaguiñi.
15Saishet qome da 'oicnapec da 'auo'otec
ca qauem ca lma' ca shiỹaxaua ỹo'oxoraic,
qataq saishet da 'auotaxanec ca lma' camaye,
16cha'aye na'aictaxa da siete da huañi ca no'on da lataxac,
qalaxaye nache 'ena'am ishet da qaltaq ñisheguem,
qaq nam qauemaicpi qalaxaye nache taỹañicra da lachoxoyec.
17Qaq saishet qome da 'antootapeguec
qom huañi ca 'am ipa'agueetac,
qataq qom quia'aqañi camaye nache saishet da 'antootalec,
18cha'aye saiuena'a da ỹauaachigui de'era
Ñim Nataxala' nache saỹaỹamaxaren,
nache da lalemataic Ñimaye ishet da ca'ai naqa'en camaye.
19Saishet qome da 'aualemata souaxat na 'etaxaloxoicpi,
qataq saishet da 'auqopitta'a na qauemaicpi,
20cha'aye ca 'etaxaloxoic saishet da no'on ca loga't,
qataq ca qauemaic 'eeta'am aca ncoỹaraxanaxaqui da 'om.
21'Am ỹalcolec, huo'o naq 'enec 'anqa'en Ñim Nataxala' qataq ca nta'a,
qataq saishet da 'aualecta'aguet qome na pa'aguenataxanaxaicpi,
22cha'aye namayepi nque'elaxatta qome da nlaguiñi,
qataq qom ivita da ỹan ca lhuaxanaxanaxac Ñim Nataxala',
qataq ca nta'a qalaq saishet da huo'o ca ỹaỹaten.
23Qaq 'ena nataqa'en na la'aqtacpi na ỹaanaxanaxaicpi, 'eeta':
Saỹaỹamaxañi da qalca'atagui na shiỹaxauapi da hueta'a
ca huaña da qanmit na nasouaxashet.
24Cha'aye ca 'eetega qaica ca ỹasouaxat cam huo'o ca lasouaxashet,
nache na nhuo' le'ecpi isheuen camaye
qataq na ỹotta'a't shiỹaxauapi ỹo'otan camaye.
25Qalaxaye ca ỹo'ot ca nhuaxanaguec
ca huo'o ca ỹasouaxat, camaye machiguiñi,
qataq talec da lta'araic nchoxonnataguec.
26Naua ỹaỹamaqchiyiñi nasataxaco,
qalaq machiguiñi naqa'en ca nỹa.
27'Auaỹamaxaañi qome na pa'aỹauec 'aro'onatacpi,
qataq 'auo'ot ca 'anaxanqa' maye huauga ca 'ano'onaxa,
qaq da ime, nache 'ano'oxoosheguem ca 'arma'.
28Saishet da 'auasaxalec ca saq 'en 'ara'aqtaxanaxac ca 'arỹa,
qataq saishet da saq 'en ca 'aua'axat.
29Saishet qome da 'arhuennataxa da 'apalaique ca 'arvi',
da 'aue'enaxata'aguet ca 'am ỹo'otec co'ollaxa ca 'arỹa.
30Aỹem satelec ye no'onaxa so hualaic,
qataq ye lma' ana lañiguishe uva so qaica ca ỹaỹaanapec:
31nache sela'a da ndotec ana ỹaxat nlaqtelec,
qataq ivira'a na lapoxonaxat coma' hua'axauec.
32Qaq can sela'a de'era nache ỹataqta soxotoigui da ñetoonaxac,
qataq de'era sauaachigui aỹem ỹapaxaguen.
33Qaq cha'aye 'auo'ocheta qataq taqteguelo 'anqa'en na 'arqaic,
qataq 'ansoxoreuo naua 'arhua'q da yaqto' no'on da 'aro'ochaxa,
34nache da nachoxoyec 'am nata'a da 'am icogaxanapec, 'eeta'am ca cachaxaic,
qataq da 'arhuenaxanaxa 'eeta'am ca shiỹaxaua
da na'atchigui ca lo'ogoxonaxat.
Currently Selected:
Proverbios 24: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.