Proverbios 2
2
1'Am ỹalcolec, 'auaỹamaxatteque qome naua ỹa'aqtaqa,
ỹataqta 'oxotoiguilo qome da 'antoonaxac naua ỹamaxasoxonaxaco.
2'Ana'axaỹaxaachigui qome de'era naỹaanec,
qataq ỹataqta 'aneguet da 'arquiyaqteỹaxac da naỹaanataxanaxac.
3Da 'auỹaxanaique da naỹaanataxanaxac,
qalaq 'anmatasheguem da 'ara'añaxac,
qataq da 'auỹaxanaique da qaica ca qanqalaate',
4da 'anmitaique damaye qalaq 'eeta'am 'anqa'en,
da 'anmitaique aca nlayiguishe plata maye qoỹoxooñi.
5Qaq huaña qome nache 'auaỹaten da 'eetec
da huo'o naq 'enec qanqa'en Ñim Nataxala',
¡qataq 'auaỹaten da 'eetec da nauattonaguec Ñim Lo'onatac 'Enauacna!
6Cha'aye Ñim Nataxala', nacheñi ñi ỹan da naỹaanec,
cha'aye naua la'aqtaqa nache chegaqaiguilo
da nauattonaxanaxac qataq da naỹaanataxanaxac.
7Ñimaye itauan qataq ntela'a ca ỹaỹamaqchiguiñi da lataxac
qataq ca qaica ca ỹasouaxat,
8qataq ntela'a da llecỹaxac ca nalochiguiñi da lataxac,
qataq npaxattalec ca ỹataqta quetegue Ñimaye.
9Huaña nache 'auaỹaten da no'oitegue lataxac, no'on nataxac,
qataq qaica ca qaiỹotauga, qataq da no'on ñecỹaxac,
10cha'aye da naỹaanec da taigui añi 'arquiyaqte
nache da nauattonaxanaxac ỹo'ot da lamaicỹaxac da 'arquiyaqteỹaxac.
11Da ntelaqchec 'am ntela'a
qataq da naỹaanataxanaxac 'am npaxattalec.
12Naamaye 'am nca'alaxateeguesopa ca qauem nqa'aic,
qataq na shiỹaxauapi maye qauemaicpi,
13nam ca'ai so no'on nqa'aic
qataq quegue so nqa'aic maye napalñi,
14qataq nqopita da ỹo'ottac na qauem,
qataq ntootalec nam qauem ỹo'otpi,
15qataq quetague' so nqa'aic namaqtapigui,
qataq dasheueeguesop so ỹaỹamaqchiguiñi nqa'aic.
16Qataq nataqa'en 'am nca'alaxateeguesop aca ỹaqa'a 'alo,
acam saqaỹauanapega maye amai' naqa'en naua la'aqtaqa,
17acam ỹalat co'ollaxa ca lhua maye naloxoua,
nache icoua'ai so naỹamaxataxac
maye ỹanot co'ollaxa Ñim Lo'onatac 'Enauacna.
18Da qaica'ata ca lma' acamaye,
qalaq 'eeta'am da qanayeegue ca nqa'aic maye taỹa'a da nleuaxa,
19cam inoxoneua'a ca lma' acamaye qalaq saishet da ñe'eguelaq,
qataq saishet da ỹe'eguelaxa da quegue so nqa'aic maye huetangui da nca'alaxa.
20Ỹoqo'oye 'am qoquetegue qome so no'on nqa'aic,
qataq 'anapaxaguena da lataxac na no'on shiỹaxaua.
21Cha'aye na no'oitegue da lataxac qataq qui'itta,
namayepi nache 'eetai' qome da netalec ana 'alhua,
22na qauemaicpi qataq na que'emaqtaxanaxaicpi,
qalaq qanapogosheguem qome qataq qaỹamaqauec.
Currently Selected:
Proverbios 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.