Proverbios 18
18
1Ca mataxalaic qalaq nmittaique ca maiche 'eetapeguec,
qataq dataỹa'aguet 'enauac na no'on nqataxacpi.
2Ca qaica ca ỹaỹaanapec qaica ca lyaxa da huo'o ca ỹaỹaten,
nacherata da ño'oxoreetapigui catai' ỹaỹatenolec.
3Na qauemsat nache lỹateuo da na'aloxo,
qataq da 'amqaanaxac ỹo'ot da qaica ca na'amaqchec.
4Naua la'aqtaqa ca ỹale 'eeta'am na 'etaxat maye qaỹoqchiguingui,
qataq 'eeta'am na tala la'auataxa da chegaqangui na naỹaanec.
5Sa ỹaỹamaxañi da qaiueelec ca huo'o ca lasouaxashet,
qataq sa ỹaỹamaxañi da sa qaiueelec ca qaica ca ỹasouaxat.
6Naua la'aqtaqa ca qaica ca ỹaỹaanapec
qalaq ỹo'ot da cotaxac,
qataq ne'enaua la'aqtaqa ỹo'otteua'alo da loquiaxac.
7Naua la'aqtaqa ca qaica ca ỹaỹaanapec
qalaq nachenaua na maiche nlaxaayiñi camaye,
qataq naua maiche la'aqtaqa nachenaua naua maiche que'emaxama.
8Naua la'aqtaqa ca na'aqtaqa lo'o'
ỹataqta huo'o da lamai'c 'eeta'am ca ama nallec,
maye ỹataqta ivitchiguiñi da qanallec.
9Ca sa ỹaỹateelec da ỹo'ot ca lo'onatac,
camaye 'eco' lqaỹa ca ishet da delaqtaxan.
10Da le'enaxat Ñim Nataxala' 'eeta'am aca nalloxolate
maye na'atchiguiñi da la'añaxac,
qataq nachaca aca ỹe'egueetacot naxa na no'on da lataxac
da nmittaique da qantela'a.
11Ca sallaxanec ipi'itaxaatega da 'eeta'am ca huaqta'a't nỹecpi da lsallaxa,
qataq 'eeta'am naqa'en ca qaỹoqotcheguemec npaqtaxanaxat.
12Da ime da 'amqaanaxac nache anac da saqaipaigui ca qaỹo'ot,
qataq da ime da qaica ca na'amaqchec
nache nca'attalec da qaica ca qaiueetac.
13Ỹataqta qaica ca naỹaanataxanaxac
qataq ỹo'ot da na'agaxa
da hua'auñi da qoỹan ca na'aqtac
da saxanaxa da huo'o ca qaỹa'axaỹa.
14Ca dalolaxaic qalaq nachaañi naqa'en da maiche la'añaxac,
qaq ca qaica ca la'añaxac qalaq
¿negue'tom ca ishet da nauaxaỹaxaasheguem?
15Da lquiyaqteỹaxac ca ỹaanataxanaxaic
ỹaconeguet da lauattonaxanaxac,
qaq da la'axaỹaqchec na ỹaanaxanaxaic
qalaq nmitta'ai da naỹaanec.
16Ca nachetaqtaxanaxat ỹo'ot da qaỹauatec 'enauac na lasompi,
qataq ỹo'ot da ishet da qaiviraua'a ca shiỹaxaua maye 'amaqtaqaic.
17Ca hua'auñi da nqoleguete' ca lasouaxashet
nache 'eeta'am da 'eesa ca la'aqtac,
qalaxaye da nvireuo ca npa'aguenaxaua
nache nqoleguete' 'enauac na 'enapec camaye.
18Da qaỹauota'a qanallichigui ca qaỹo'ot
nachera da 'eetec da ime naqa'en ca cotaxac,
qataq huesoguilo naqa'en caua ncotatega't.
19Ca nqaỹa maye qainogoqchet ỹataqta qaica ca ivireua'a
'eeta'am ca huaqta'a't nỹecpi maye qaỹapotaua'a.
Qataq na cotaxacpi qalaq 'eeta'am ca lapoxot ca nỹec lta'araic.
20Naua la'aqtaqa ñi 'oonolec
nachenaua na 'eco' icomaraqche't,
qataq ne'enaua la'aqtaqa ỹo'ot da 'eco' ỹaỹem naqa'en camaye.
21Da nca'alaxa qataq da nleuaxa
qalaq chegaqaiguilo ca 'enapec ñi nachaxat,
qaq ca qalota da ltaxaỹaxac nache maiche
nque'etaxaachigui ca naigui naua la'aqtaqa.
22Ca ỹanata aca lhua qalaq ỹanata da lamaicỹaxac,
qataq ỹaconeguet da lqouagaxanaqtaic Ñim Lo'onatac 'Enauacna.
23Da detaqa ca choxoraq
qalaq nachoxoreeteueguelo naua la'aqtaqa,
qaq ca sallaxanec da ỹasat qalaq sansatte' na la'aqtaqa.
24Huo'o ca auochaxaua maye ỹauecta'a da nlaguiñi ca nauochaxaua,
qalaxaye huo'o ca auochaxaua maye napacalec da lauotaxanaqtaic ca nqaỹa.
Currently Selected:
Proverbios 18: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.