Proverbios 1
1
Naua la'aqtaqa so ỹaanaxanaxaic
1Naua la'aqtaqa so Salomón, som llalec so nta'a David, maye nta'a ye Israel, 2naamaye qoỹilyiñi da yaqto':
Qaỹa'axat da llec da naỹaanec, qataq naua napaxaguenataxanaxaco,
yaqto' qaỹaỹateeteguelo naua na'aqtaqa maye ỹataqta huo'oi naua naiguilo,
3yaqto' qaỹaconeguet da napaxaguenataxanaxac, naỹaanataxanaxac,
no'on nataxac, no'oitegue nataxac, qataq da nalochiguiñi ñecỹaxac,
4yaqto' sa nqalat qanqa'en na nsoxoppi maye saxanaqca ca ỹaỹaten,
qataq qoỹanem da lauattonaxanaxac qataq nlotec.
5Ca ỹaanaxanaxaic da na'axaỹaxanalo naamaye
nache nquictec da laỹaanec,
qataq ca ỹaanataxanaxaic, nquictec da laỹaanataxanaxac,
6da yaqto' qaỹaỹateete' naua la'aqtaqa ca ỹaanaxanaxaic,
qataq naua lleco naua la'aqtaqa, qataq na laloqnaxanaxatpi,
huo'otaq naua ỹoxottrañi, la'aqtaqa.
7Da naỹaanec, damaye chegoqchigui
da huo'o naq 'enec qanqa'en Ñim Nataxala',
cam qaica ca ỹaỹaana'a qalaq ỹo'otan
da naỹaanec qataq da napaxaguenataxanaxac.
Da nqataxac maye taalec na nsoxoppi
8'Am ỹalcolec, ỹataqta 'ana'axaỹaxana qome ca lqataxac ca 'arta'a,
qataq saishet da qoca'ai ca lapaxaguenataxanaxac aca 'arate'e,
9cha'aye 'eeta'ama ca 'onaxaic 'ano'otaxat:
'eeta'am aca ỹataqta 'onaxai nqola,
huo'otaq ca 'onaxaic llo'oxoraxat na 'arqaic.
10Na 'etaxaloxoicpi da huotaique da 'am ỹatenachet,
qalaq saishet qome da 'auca'ategue, 'am ỹalcolec.
11Da huo'otaq 'am 'enapega 'eeta': «'Aỹala, qomi' 'auca'ateguelo,
cha'aye sauoqtaique da sauoqo'o ca secachaqot,
qataq salauataq ca qaica ca ỹauotaique.
12Ñemataqchiguiñi qome na 'amaqtaqaicpi shiỹaxauapi,
'eeta'am ñaqa'enaq da ivita da ileu,
da nmichiguiñi da tangui aca huachiqui.
13Yaqto' ishet da ỹataqta qomi' sallaxanaqa,
ỹataqta ñelaxataqchiguilo qome naua qarma'ate ca qarcachaxatpi.
14'Auanac qome, qomi' 'aualegoiguilo,
yaqto' 'am ñeuanaqta'ai' da ñecolaxataqchigui aca qorom.»
15Qalaxaye 'am ỹalcolec, saishet qome da 'auca'ategue namayepi,
qataq saishet da qoquegue de'era qauem nqa'aicỹaxac camayepi,
16cha'aye namayepi ỹataqta huo'o da lỹalaxa da ỹo'ot ca qauem,
qataq iỹalata'a da icoldec naua ntago'q,
17Cha'aye qaica ca naigui da qalapaxañi aca nqoina,
da mashe ilota'a ca qoỹopi,
18qaq ỹoqo'oye da lapaxañi aca lqoina ne'ena shiỹaxauapi,
qalaq 'eeta'am da maiche nqoviila't namayepi,
qaq ỹataqta huetalec naqa'en da lchec da maiche nachaalataxac.
19Qaq 'era da 'eetec ye loga't na qopitaxanaqtaqaicpi:
Da maiche lqopitaxanaqtaic, namayepi nachera da ỹalauat.
Da deỹaxan da naỹaanec
20Naua nqa'aico qataq naua naponaqa'ate,
nache huañalo da qaỹa'axaỹa de'era naỹaanec.
21Da deỹaxa'n naua na'aqtaqa qalaq huañalo naua naponaqa'ate,
naua ñeguereuo na huaqta'a't nỹecpi nache huaña da qaỹa'axaỹa, 'eeta':
22«Qami' nsoxoppi maye qami' 'enaqaicpi,
'enaxanaxaicpi maye qaica ca qauaỹaañiỹa'a,
¿Che laguio' qaq qaỹa'axañiiñi da qoquiitalec da qaica ca qauaỹaañiỹapec?
Qataq ¿che laguio' da qaỹa'axañiiñi
da qoquiitalec da qare'enaxanaxaqui,
qataq ỹataqta qauo'otañi da naỹaanec?
23Qana'axaỹaxañiỹalo qome naua iviraqtaxanaxaco,
yaqto' qami' sanema da iquiyaqteỹaxac,
qataq qami' sanema da qauauattoñi na iuennataxacpi.
24Aỹem qami' seỹaxaategalo naxa,
qataq qami' sheetegalo da aỹem qauanaiua'a,
qalaxaye qami' saishet da aỹem qaualaqaiguet.
25Nachaqrata da sa qauacoñeeguet na iqataxacpi,
qataq saishet da qauacoñeegueta naua iviraqtaxanaxaco.
26Qaq ỹoqo'oye aỹem huo'o ca na'a'q, qaq choche qami' se'eeta'ape,
qom qami' nvitalo ca sa ỹaỹamaxañi.
Nache qami' se'enai'salo qom qami' ỹalaua't da qarcolanqai.
27Qom qami' nvitalo ca qarcolanqai qataq ca lqalaicpi,
nache sa qauaỹaañi ca qoñeetec souaxat da qaraquicoqoi,
maye 'eeta'am aca daua'ache da nlaxaañi 'enauacna.
28Qaq que'eca na'a'q aỹem qauỹaxañeetega qome,
qalaxaye saishet da qami' sasategueta,
qataq aỹem qanmicheetaique qalaxaye saishet da aỹem qauanachiỹa,
29cha'aye qauo'otañi da naỹaanec,
qataq qaica ca 'enec qanqa'eñi Ñim Nataxala'.
30Qataq saishet da qauacoñeeguet na iqataxacpi,
qataq qauo'otañi' naua iviraqtaxanaxaco.
31Qalaxaye maiche qanque'etaxañiigui qome
ca naigui da qauem qano'onataxaqui.
Qataq qami' nlaqchiguilo qome ca qauem qarhuennataqai.
32Na 'enaqaicpi qalaq maiche ỹalauat qome da ne'enaxac,
ca qaica ca ỹaỹaana'a qalaq maiche ilaxachigui qome da qaica ca ỹoqocha'a,
33Qalaxaye ca aỹem na'axaỹaxana,
qalaq huo'o qome da l-lagaxayec,
qataq saishet da ñe'etaique ca qauem.»
Currently Selected:
Proverbios 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.