Filipenses 1
1
So Pablo qaicoñettai' co'ollaq ỹamaxa aso lere so 'amqaanataxanaxaicpi maye netaña ye Filipos
1Aỹem Pablo qataq ñi Timoteo, qomi' l-lataqa So Cristo Jesús. Qomi' samaxasaxa ana qorere 'enauac na 'amqaanataxanaxaicpi maye netaña ye nỹecpi ye Filipos, nam lalamaxatpi Ñim Lo'onatac 'Enauacna souaxat da na'attaua'a So Cristo Jesús. Ana qorere nataqa'en taỹa'a na lataxala'pi namayepi qataq na ltauapi. 2Qaq Ñim Lo'onatac 'Enauacna maye Qarta'a, qataq So Qarataxala' Jesucristo qami' ỹanema qome da lqouagaxanaqtaic qataq da l-lagaxayec.
So Pablo nqouagaxaueetapeguelec na 'amqaanataxanaxaicpi
3Aỹem naxa da tachigui ye iuel da qoñiita, nache qaltaq saatacot da ña'achecỹaxac Ñim Lo'onatac 'Enauacna. 4Qaq da ñeqouagaxaueetac, qalaq ỹataqta huo'o da ñetonaxac, souaxat 'enauac da qoñiita. 5Cha'aye qami' nataqa'en qanhuañiỹaua'a da qaua'axache da no'on na'axaỹaxac, chegoqchiguiña so na'a'q co'ollaq cheta'ague da qauacoñiiguet, choche ivitta'a nagui. 6Qaq aỹem ỹataqta 'eesa ñaqa'en da Ñim Lo'onatac 'Enauacna maye chegoqchigui da qami' ỹo'oteque da no'on dalaxaic qarataxaqui. Ñimaye queto'ot da ỹo'ottac de'era, choche iviraxatta'a ca na'a'q qom ñe'eguelaq So Jesucristo. 7Qaq ỹataqta ỹaỹamaqchiguiñi da iuennataxac da 'enauac qami' seuennategalo, cha'aye ỹataqta qami' sauoteque, cha'aye qami' nataqa'en qanhuañiỹaua'a da no'onataxanaxac maye chegaqaigui da lsoxoyec Ñim Lo'onatac 'Enauacna maye aỹem ipataxalec. Qaq da aỹem qaicoñettai' huo'otaq aỹem qaỹataxaato'ot ca nmit ca nasouaxashetpi, qalaq qami' nache 'eetai' da aỹem qatauñiitac da yaqto' setaqlec da 'eesa lataxac dam no'on na'axaỹaxac. 8Qaq Ñim Lo'onatac 'Enauacna ỹaỹateeta da ỹataqta saishet da choche satenataxaatac da qami' saquicotrapigui, qataq da ỹauoche da qoñiita souaxat da lsoxoyec So Jesucristo maye aỹem ỹami'. 9Qataq naxa da ñeqouagaxaueetac, qalaq seỹaxaatacot Ñim Lo'onatac 'Enauacna da qami' nquigaxatta'agueta da ỹataqta qanauochiỹa't, qataq ỹataqta qauaỹaañita ca no'on, qataq qauauattoñiita ca 'eesa lataxac, 10yaqto' ishet da qauaỹaañi da qalca'aiua'a ca ỹataqta no'on. Yaqto' da ivita da ñe'eguelaq So Jesucristo, nache qaica ca qarasouaxashechi, qataq qaica ca qami' ỹasaxaleguete ca qarasouaxashechi. 11Cha'aye chegoqchigui da ltaunaxanaxac So Jesucristo da qami' ishet da qauo'oche ca ỹaỹamaqchiguiñi, yaqto' na shiỹaxauapi ỹo'oxoren, qataq huo'o naq 'enec naqa'en Ñim Lo'onatac 'Enauacna.
Da ñachaalataxac nachattaigui So Cristo
12Qami' ỹaqaỹa't, aỹem sauotaique da qauaỹaañita da 'enauac de'era souaigui, damaye ỹo'ot da yaqto' de'era no'on na'axaỹaxac nquictauec. 13Cha'aye 'enauac na alleppi maye ilotague' na lma' ñi lta'a na nta'alpi, qataq 'enauac na hueta'a ne'ena, ỹaỹaten da aỹem qaicoñettai' souaxat da so'onataxaatacot So Cristo. 14Qaq co'ollaq qaỹaỹaten da aỹem qaicoñettai', nache qalota na qarqaỹañicpi da na'añaxat da ỹa'axat da la'aqtac Ñim Lo'onatac 'Enauacna, qataq saishet da huo'o ca ñe'etaique, nacherata da ỹauo'o da naquitaxac So Qarataxala'.
15-16Qaq 'eesa da huo'o na ỹa'axattac So Cristo, cha'aye ỹa'axattac da no'on na'axaỹaxac, cha'aye 'eesa da huotaique da detaunaxan, qataq ỹataqta ỹauotec So Cristo qataq ỹaỹaten da Ñim Lo'onatac 'Enauacna aỹem ỹanagui da ỹo'onataxanaxac da seloclec da no'on na'axaỹaxac. Qalaxaye huo'o na laỹepi da choche aỹem nallettague', souaxat da aỹem nquiỹa. 17Qaq ne'ena maye aỹem nquiỹatega, namayepi saishet da huesota; ỹo'ottac damaye cha'aye choche lqopitaxanaqtaic, qataq nacherata da huotaique da nquigaxatec da ñeque'eenaxac da sootaigui ana ncoñetaxanaxaqui. 18Qalaxaye nache 'ena'am, cha'aye da huo'otaq huesota da lataxac huo'otaq saishet, qalaxaye nache 'ena'am ỹa'axattac So Cristo. Qaq nachera da ỹo'ot da aỹem samachiguiñi.
Qataq ỹataqta nquigaxatec naqa'en da ñetonaxac damaye, 19cha'aye aỹem saỹaten da saqca cara da ñachaalataxac, cha'aye qami' aỹem qanqouagaxauñiitalec, qataq da ltaunaxanaxac So Saqcha'a La'añaxac So Jesucristo. Qaq de'era nache chegoqchigui qome da saqaỹaloq da aỹem qaisouec. 20Aỹem huo'o da ñaquitaxac qataq ỹataqta lta'araic da iyaxa, da yaqto' saishet da sevireguet ca ỹa'aloxo, nacherata da ỹachegoxotchigui aỹem da ỹachaxan da la'amaqchec So Cristo, nagui da ñaq ñeca'altauec huo'otaq qom mashe seleu. 21Cha'aye da ñaq ñeca'altauec, nache sauotaique da nachaqsota So Cristo da so'onataxaatacot, qaq da seleu nache damaye maiche ỹauegaxanaxac. 22Ỹoqo'oye aỹem sa saỹaten cam ỹoqta lleca'ateua'a, cha'aye da ña ñeca'altauec, nache ishet da ỹataqta aỹem lhuenec Ñim Lo'onatac 'Enauacna. 23Ỹataqta huo'o da lqalaic ñaqa'en cam ỹoqta lleca'ateua'alo ne'enaua dos. Cha'aye huo'o da lỹa iuennataxa maye 'eeta': Aỹem ñeshetaique da seleu yaqto' ñeqo'ona So Cristo. Cha'aye damaye ỹataqta ỹactec da 'onaxaic ñaqa'en. 24Qalaxaye da lỹa iuennataxa 'eeta': Souaxat qami', nache 'onaxaic ñaqa'en da ñaq queta da ñeca'altauec. 25Qaq ỹataqta 'eesa ñaqa'en damaye, qataq saỹateeta da ña qami' soota'agueta, nache qami' setauaneque da qarpi'iỹaxaqui Ñim Lo'onatac 'Enauacna, yaqto' qoviitaigui da qauamaichiguiñi, 26yaqto' da qaltaq qami' ñauaneto, nache ỹo'ot da qantonaxaqui da qavio'oxoyiñiitac So Cristo Jesús.
27Qaq nachaqrato' da qanpogoxoiñiỹapegue' da yaqto' da qarataxaqui nateeteguet da lapaxaguenataxanaxac So Cristo. Qaq yaqto' qom qami' sevitalo, huo'otaq da saishet, qalaxaye ñaqaiyeta ñeshetaique da aỹem nvira'a qome ca ỹa'axaỹaxac da qoñiita da saishet da qanañaxañiiñi, qataq da qanhuooñeta't, qataq da qanaỹaañeta't da qauloquiitapeguelec da qaua'axacheetac da no'on na'axaỹaxac. 28Qataq saishet qome da qami' icolanaqche't nam qami' ipa'agueeta'ape. Cha'aye da saishet da leetapigui ye qarvilli, nache qauauañiichigui qome namayepi da qailaxachigui, qaq qami' qalaq qami' qanca'alaxatre'c, cha'aye Ñim Lo'onatac 'Enauacna qami' ỹanema da qauauegaxañi. 29Ñim Lo'onatac 'Enauacna qami' ỹanema da lta'araic qana'achecỹaxaqui da qaupi'iỹa'ai So Cristo. Qaq ỹoqo'oye na'aictaxa da huo'o da qanque'eenaxaqui souaxat da qaua'amaqchiñi Ñim Lo'onatac 'Enauacna. 30Qami' qataq aỹem, 'oonolec da seloquiaqtapeguelec. Qaq mashe qauauañiichigui da 'eetec da iloquiaxac, qaq nagui huo'o da qara'axaỹaxaqui da ñaq shecto'ot da seloctac.
Currently Selected:
Filipenses 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.