Lucas 1
1
Da hua'auchiguiñi la'aqtac so Lucas
1-4'Am maye 'am ỹo'oxoraic qataq ñauochaxaua Teófilo:
'Auaỹateeta da mashe qalota som deraxan da ỹa'axat dam souaqaigui co'ollaxa. Somayepi ỹataqta ipagaqchiichigui da ỹiyiñi dam qomi' da'aqtaxaateguema soua ỹataqta hueta'agueta qataq ỹauachiguilo So Jesús co'ollaxa yem chegoqchiguiña. So Jesús ỹama'q soomaye da ỹa'axatre'c de'era na'aqtaxanaxac.
Qaq aỹem nataqa'en mashe semat da ñapaxagueetega 'enauac ye chegoqchiguiña de'era. Qaq ỹoqo'oye ỹaỹamaqchiguiñi ñaqa'en da ỹataqta shiyiñi 'enauac de'era qataq ỹataqta sepagaqchiichigui da yaqto' 'am ishet da 'auaỹaten de'era 'am qaỹa'aqtaxaateguem da ỹataqta 'eesa.
So namaxashec Gabriel qataq so Zacarías
5So Zacarías maye ntaxaỹaxanaxanec da qaitaxaỹapegue' Ñim lo'onatac 'Enauacna, maye huetaigui so na'a'q co'ollaq so Herodes maye 'amaqtaqaic lta'a na judiopi. Somaye do'onataxaategueua'a aso no'onaxanaxaqui late'erai, ỹalectaigui som ntaxaỹaxanaxanecpi da qaitaxaỹapegue' Ñim Lo'onatac 'Enauacna maye chegoxoguet so Abías. Qaq aso lhua le'enaxat Elisabet, asomaye nataqa'en maiche chegoxoguet so ntaxaỹaxanaxanec le'enaxat Aarón. 6Aso Elisabet qataq so Zacarías ỹataqta no'o'n da lataxa'c qataq ỹataqta ỹalaxareguet 'enauac na lamaxasoxonaxacpi Ñim Lo'onatac 'Enauacna. 7Soomaye qaica ca llale'c, cha'aye aso Elisabet sa deco'o, qataq soomaye ỹataqta mashe ỹa'axaiqa.
8Qaq huo'o so na'a'q co'ollaq ivita so laloqo' da inoxoneuo da do'onataxan nam ntaxaỹaxanaxanecpi maye ỹalectaigui so Zacarías, da do'onataxanot Ñim Lo'onatac 'Enauacna da huaña añi no'onaxanaxaqui late'erai. 9So ntaxaỹaxanaxanecpi da lataxac naxa qaỹauo'o ca alletaxac da yaqto' qaỹaỹaten ca taalec da pa'aigui na lauel aso no'onaxanaxaqui late'erai da ỹavigaxat ca nchenaxanaxat maye ama na laita da ỹachalec aso nca'atoxonaxalate. Qaq se'eso na'a'q taalec so Zacarías da pa'auo da ỹavigaxat se'eso nchenaxanaxat, 10qaq 'enauac so shiỹaxauapi nqouagaxaueetac, pa'atauga so nqasoxoc aso no'onaxanaxaqui late'erai.
11Nache nque'elaxatta da so lamaxashec Ñim Lo'onatac 'Enauacna nachaxana so Zacarías, netaua'a na aloic aso nca'atoxonaxalate. 12Qaq co'ollaq so Zacarías da ila'a so namaxashec, nache ỹataqta lta'araic da lcolanaxa qataq sa ỹaỹaten ca 'eetec. 13Qalaxaye so namaxashec 'enapeco':
–Zacarías, saishet da 'añi'i, cha'aye Ñim Lo'onatac 'Enauacna hua'aqtega da 'anqouagaxaunaxac. Qaq nagui añi 'arhua Elisabet huo'o qome ca llalec. Qaq camaye 'anagui qome da le'enaxat Juan. 14Da lañoxoc camaye 'am ỹo'otec qome da ỹataqta lta'araic da 'antonaxac, qataq qalota nataqa'en qome na machiguiñi. 15Que'eca 'aỹa'alec camaye ỹataqta 'amaqtaqaic qome naqa'en Ñim Lo'onatac 'Enauacna. Camaye saishet da nỹomgui na lataxa, cha'aye So Saqcha'a Na'añaxac Qui'itta netaigui camaye qom saxanaxa da ñiguiñi.
16Que'eca nogotolec, camaye ỹo'oteguet qome da qalota na Israel le'ecpi da ỹaxaañi da ỹo'ottac na qauemsat, ime, nache ỹalaxaguet Ñim Lo'onatac 'Enauacna. 17Camaye nvi', qom saxanaxa da nvi' ca Nca'alaxaqui maye Lca'aguishec Ñim Lo'onatac 'Enauacna. Qaq de'era na'añaxac saqcha'a maye hueto'ot co'ollaxa so na'aqtaxanaxanec Elías, nachera da hueto'ot qome camaye. Da la'aqtaxanaxac ỹo'oteguet da ca nta'a nmaneto caua llalqa, qataq nam sa ỹalaq ila'a da lsomaxac, nache quegue da lataxac nam ỹataqta ỹalaq. Nataqa'en ỹaỹamaxaañi na Israel le'ecpi da yaqto' ỹataqta lhuotta da ỹaconeguet cam Lca'aguishec Ñim Lo'onatac 'Enauacna.
18Nache so Zacarías 'eetego' so lamaxashec Ñim Lo'onatac 'Enauacna, 'eeta':
–¿Hua'ago' ca 'eetec ca lataxac da yaqto' aỹem ishet da saỹateeta de'era? Cha'aye aỹem mashe aỹem ỹa'axaiqui, nataqa'en añi ihua.
19Nache so namaxashec ỹasateguet somaye, 'eeta':
–Aỹem maye nachaỹem Gabriel, maye so'onataxaatacot Ñim Lo'onatac 'Enauacna. Qaq Ñimaye aỹem namaxa da 'am sa'aqtaxanem de'era no'on 'ara'axaỹaxac. 20Qalaxaye 'am ye saishet da aỹem 'aua'amaqten, qaq nagui qaicaua naua 'ara'aqtaqa. Nato' qom mashe ivita da ipacchigui de'era 'am sa'aqtaxaateguem.
21Qaq 'enauac so shiỹaxauapi maye pa'atauec, iuattaique so Zacarías, somayepi nnattega't da chaq ta'ainec da ỹataqta qaỹaloqteguet so Zacarías da nnoxonec.
22Qaq co'ollaq nnoxonec so Zacarías, nache saishet da detaqa, nachaqrata da ỹauota'aisalo naua lhuaxaye. Nache so shiỹaxauapi ỹaỹaten da so Zacarías huo'o so lauanaqchec.
23Qaq co'ollaq mashe inoxoore'c soua na'axa'te maye lo'onataxanaxaqui' so Zacarías da do'onataxaatapoigui aso no'onaxanaxaqui late'erai, nache somaye ỹe'eguelaxa ca lma'. 24Qaq co'ollaq qaỹata'ague de'era, nache aso lhua hualaxai. Nache asomaye saishet da npa'aueeguesop so lma', choche iviraxattraue'c soua cinco ca'agoxoiqa. Cha'aye asomaye deuennataxaataco', 'eeta': 25«¡Ñim Lo'onatac 'Enauacna aỹem ỹo'otec de'era, yaqto' na shiỹaxauapi saishet da saqca ca naigui naqa'en aỹem!»
So namaxashec Gabriel qataq aso María
26Aso Elisabet mashe ivi' soua seis ca'agoxoiqa da hualaxai, co'ollaq Ñim Lo'onatac 'Enauacna ỹamaxa so lamaxashec Gabriel ye nỹecpi Nazaret, maye huaigui ye 'alhua le'enaxat Galilea, 27da ira'a da la'aqtaxanaxac aso qa'añole le'enaxat María. Asomaye mashe huotaique da huaroneguet so José, maye chegoxoguet so nta'a David.
28Nache so namaxashec taua'a ca hueta'a aso María, nache iquin, 'eeta':
–¡Ñim Lo'onatac 'Enauacna 'am ỹanem da lqouagaxanaqtaic maye ỹataqta no'on! Ñim Nataxala' 'am hueta'aguet.
29Aso María ỹataqta ỹe'elaqchet co'ollaq hua'axaỹa de'era nquinaxanaxac maye ỹataqta saq qaỹauanapega, nache asomaye nnattapeguela't, 'eeta': «¿Chaq 'eetec ca naigui de'era nquinaxanaxac?»
30Nache se'eso namaxashec 'enapeco':
–María, 'am saishet da 'añi'i, cha'aye Ñim Lo'onatac 'Enauacna ỹataqta 'am tatelec da lqouagaxanaqtaic. 31Nagui 'am hualaxai. Ime, qaq huo'o qome ca 'aỹa'alec, nache 'aỹa'anagui qome da le'enaxat Jesús. 32Que'eca nogotolec ivira'a qome da ỹataqta 'amaqtaqaic, qataq camaye qome da nỹaxanataguec 'eeta' «Llalec Ñim Lo'onatac 'Enauacna maye 'amaqtaqaic.» Qaq Ñim Lo'onatac 'Enauacna ỹanagui qome camaye da Nta'a, 'eeta'am naqa'en som David maye chegoxoguet. 33Camaye choche tatec qome da ilotague' na Israel le'ecpi, qaq de'era lo'onataxanaxac da nta'a, damaye qaica ca loga't.
34Nache aso María inat so namaxashec, 'eeta':
–¿Chaq hua'ague ca 'eetec ca lataxac de'era ye aỹem saxanaxa da saron?
35Nache so namaxashec 'enapeco':
–Qomye So Saqcha'a Na'añaxac Qui'itta anac qome da 'am tanguit, nache da la'añaxac Ñim Lo'onatac 'Enauacna maye 'amaqtaqaic 'am ipelteelec. Qaq ỹoqo'oye que'eca nogotolec, camaye da nachaalataxac ỹataqta imato'ot Ñim Lo'onatac 'Enauacna, nache camaye da le'enaxat 'eeta' «Llalec Ñim Lo'onatac 'Enauacna.» 36Nataqa'en añi 'arhuo' lashe Elisabet, na'aictaxa da mashe ỹa'axaino'ole, qalaxaye nataqa'en añimaye huo'o ca llalec. Na shiỹaxauapi ipettega da mashe saishet da huo'o ca llalec, qalaxaye añimaye mashe ivi' naua seis ca'agoxoiqa da hualaxai. 37De'era ỹachaxan da Ñim Lo'onatac 'Enauacna ỹataqta qaica ca ỹaqalanapec.
38Nache aso María 'enapeco':
–Aỹem maiche aỹem l-lata Ñim Qarataxala'. Qaq no'on qome da ipacchigui da la'aqtac maye aỹem ỹami'.
Nache so namaxashec jec.
Aso María namaqtega aso Elisabet
39Qaq co'ollaq qaỹata'aguelo soua na'axa'te, nache aso María iỹalapigui' da nqo'ona so nỹecpiolec maye netalec asom qaỹoqotcheguemec 'alhua ye Judea. 40Nache taua'a so lma' so Zacarías, nache iquin aso Elisabet. 41Qaq aso Elisabet co'ollaq hua'axaỹa da nquinaxanaxac, nache so nogotolec maye huetaigui na lauel asomaye daỹapec da ntonaxac. Nache aso Elisabet nlaqchigui So Saqcha'a Na'añaxac Qui'itta, 42ime, nache asomaye ỹataqta nlamaxaren da 'enapega aso María, 'eeta':
–Ñim Lo'onatac 'Enauacna ỹactec da 'am ỹanem lqouagaxanaqtaic, qaq saishet da qoneta'am na laỹepi 'alpi. Nataqa'en na 'aỹa'alec qome ỹanem da lqouagaxanaqtaic. 43Qaq ¿negue't aỹem da aỹem 'anamaqtega, 'am maye 'am late'e Ñim Ỹataxala'? 44Cha'aye can choche sa'axaỹa da 'arquinaxanaxac, nache na nogotolec maye huetaigui na iuel daỹapec souaxat da ntonaxac. 45¡Ñim Lo'onatac 'Enauacna 'am talec naqa'en da lta'araic lqouagaxanaqtaic, cha'aye 'aua'amaqten dam ỹachaxanapec!
Aso María ỹo'oxoreetac Ñim Lo'onatac 'Enauacna
46Nache aso María 'enapeco':
«¡Aỹem sanot da ña'achecỹaxac Ñim Lo'onatac 'Enauacna,
ỹataqta semato'ot da iquiyaqteỹaxac,
47qataq ỹataqta aỹem nlaqchigui da ñetonaxac,
cha'aye Ñimaye nacheñi ñi Ica'alaxaqui!
48Qataq Ñim Lo'onatac 'Enauacna
tatelec aỹem da lmeenaxanaxac,
aỹem l-lata maye qaica ca ỹa'amaqchec.
Qaq nagui nache 'enauac na shiỹaxauapi
qom aỹem iỹaxana qalaq, 'eeta':
‹¡María, da lqouagaxanaqtaic
Ñim Lo'onatac 'Enauacna 'am huetalec!›
49Cha'aye Ñim Lo'onatac 'Enauacna
maye qaica ca ỹaqalanapec
ỹataqta lta'araic da aỹem ỹo'otec.
¡Da le'enaxat Ñimaye ỹataqta Qui'itta!
50Ñimaye nache 'eetai' da ỹauotec
'enauac nam ỹo'oxoreetac Ñimaye.
51Ñim Lo'onatac 'Enauacna do'onataxaatega
da lta'araic la'añaxac,
qataq datauec naqa'en
na ño'oxonnaxaicpi.
52Deuotaxanec da lo'onataxanaxac
na 'añaxaicpi,
ime, nache ỹanem
da la'añaxac na choxoraqpi.
53Qataq ỹanem da qaica ca iuena'a,
nam huo'o da lhuenaxanaxa.
Qaq nam sallaxanecpi
qalaq ỹataqta qui'itchiguilo naqa'en
naua lhua'q da ỹamaqauec.
54Qataq itauan na Israel le'ecpi
maye lamaxashecpi,
qataq saishet da ỹaxanec da
lauotaxanaqtaic namayepi.
55Qaq damaye ỹachaxanapeguem
co'olloxocheye so hua'au qarta'alpi,
som Abraham qataq so chegoxoguetpi,
qaq damaye chochaq tatec.»
56Nache aso María no'onaisop aso Elisabet, iviraxattre'c soua tres ca'agoxoiqa. Qaq co'ollaq ime, nache ỹe'eguelaxa ca lma'.
Da lañoxoc so Juan maye nachelaxanataxanaq
57Qaq co'ollaq ñiguiñi so llalec aso Elisabet, 58nache 'enauac na lauoreuapi qataq nam lauo' le'ecpi ỹataqta lta'araic da ntonaxac, cha'aye qaila'a Ñim Lo'onatac 'Enauacna da ỹataqta lta'araic da lauotaxanaqtaic.
59Qaq co'ollaq mashe ivi' soua ocho na'axa'te, nache qairouo so nogotolec da qaỹauo'o so la'anaxat na lo'oc. Nache nam hueta'a yi'iye ỹauotaique da ỹanagui Zacarías maye le'enaxat so lta'a. 60Qalaxaye aso Elisabet 'enapeco':
–«¡Saishet! Namaye le'enaxat qome da Juan.»
61Nache somayepi 'enapeco':
–¿Ta'ainco'?, ye qaica ca le'enaxat de'era nam 'arhuo' le'ecpi.
62Nache qainattaco' so Zacarías qaỹauota'aisalo naua nhua'q da chaq negue't ca ne'enaxat maye huotaique da ỹanagui so nogotolec. 63Nache so Zacarías iỹaxanaique so leraxanaxala'. Nache ỹerelec so 'eeta': «Namaye le'enaxat Juan.» Nache 'enauac qaỹa'aalatapeguec de'era. 64Nache huaña nataqa'en co'ollaxa da so Zacarías qaltaq ỹe'eguelaxalec da huo'oi naua la'aqtaqa, nache ỹo'oxoreetac Ñim Lo'onatac 'Enauacna.
65Huaña, nache 'enauac se'eso lauoreuapi ỹataqta huo'o da la'aalaxa, qataq nataqa'en 'enauac som netalec se'eso saqaỹoqotcheguemec 'alhua ye Judea, da qaica ca lỹa qana'aqtaxaatapigui, nachaqrata de'era. 66Qaq ỹataqta deuennataxaatac 'enauac nam ivirauga da ỹaỹaten de'era, qataq nnattega't, 'eeta': «¿Chaq 'eetec qome ca taỹa'a se'eso nogotolec?» Cha'aye 'enauac da qaỹaỹaten da Ñim Lo'onatac 'Enauacna hueta'aguet somaye.
So Zacarías ỹo'oxoreetac Ñim Lo'onatac 'Enauacna
67So Zacarías ỹataqta nlaqchigui So Saqcha'a Na'añaxac Qui'itta. Nache ỹan da la'aqtac, 'eeta':
68«¡Ỹataqta sho'oxorenaq qome
Ñim Lo'onatac 'Enauacna maye Lataxala' na Israel le'ecpi,
cha'aye Ñimaye qomi' naỹalo da qomi' nca'alaxatre'c!
69Ñimaye qomi' ỹanema
cam ỹataqta 'añaxaic Nca'alaxaqui,
chegoxoguet so nta'a David maye lamaxashec.
70Qaq damaye nale'ena da ỹachaxanapec
co'ollaxa soua qaỹoqteguelo vi'iye,
ỹachegoxotchigui som la'aqtaxanaxanecpi
maye ỹataqta qui'itta:
71da Ñimaye qomi' nca'alaxateeguesopa
nam qomi' ipa'agueeta'ape
qataq 'enauac nam qomi' nquiỹategalo.
72Nataqa'en 'enapec da ỹataqta huo'o
da lchoxonnataxanaxa som lalamaxatpi,
qataq ipaqueelec dam qui'itta naỹamaxataxac.
73Ñimaye ỹachaxanapeguem
so hua'au qarta'a Abraham,
74da Ñimaye qomi' nca'alaxateeguesopa
nam qomi' ipa'agueeta'ape.
Yaqto' saishet da huo'o ca sho'oqtaique
da so'onataxanaqtacot Ñimaye,
75qataq nachaqñita Ñimaye da sonaqto'ot,
da so'otaqtac ca ỹaỹamaqchiguiñi
'enauaque naua na'axa'te da qanachaalataxac.
76Qaq 'am ỹalcolec, 'am qoỹanagui qome da 'am:
‹La'aqtaxanaxanec Ñim Lo'onatac 'Enauacna maye 'amaqtaqaic.›
'Am 'aua'auta'ague qome da tata'ague cam
Lca'aguishec Ñim Lo'onatac 'Enauacna,
da 'auqataxanai' na shiỹaxauapi
yaqto' lhuotta qom nvi' camaye.
77Qataq 'aua'aqtaxanem nam shiỹaxauapi
da mashe huo'o da lca'alaxa,
cha'aye Ñim Lo'onatac 'Enauacna
ỹapalaxa't naua lasouaxashe'ete.
78Ñim Lo'onatac 'Enauacna ỹataqta lta'araic
da lauotaxanaqtaic da shenaqta,
ỹoqo'oye chegoqtot naqa'en na piguem
da qomi' namaxalo ca Qarca'alaxaqui,
'ena'am naqa'en añi nala'
da nnoxoosheguem ye dalaxaic na'a'q.
79Camaye nca'alaxatec nam huotaique
da lo'oxonec da nleuaxa.
'Eeta'am aca ncoỹaraxanaxaqui
da icoỹarelec ca napalaxa,
yaqto' qomi' ỹachaxaneguelo
ca nqa'aic maye hueta'ague da nlagaxayec.»
80Nache so nogotolec Juan nquictasheguem da llaxa qataq lta'araic da la'añaxac saqcha'a maye chegoqo'ot Ñim Lo'onatac 'Enauacna. Somaye netauga so toolec 'alhua, choche ivitta'a so na'a'q co'ollaq Ñim Lo'onatac 'Enauacna ỹamaq da ỹache de'era la'aqtaxanaxac, da da'aqtaxanem na Israel le'ecpi.
Currently Selected:
Lucas 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.