Joel 1
1
Aso shiiquioxoipi nlaxaañi na nañiguishec
1Qaq 'era da la'aqtac Ñim Nataxala' co'ollaq 'enapega so Joel, maye llalec so Petuel.
2Qami' nqueroxonecpi, ña qana'axaỹaxañiỹa de'era,
qataq 'enauac qami' maye qoñiitalec ne'ena 'alhua.
¿Peta'a huo'o co'ollaxa ca na'a'q da qauauañiichigui ca 'eeta'am de'era,
nam qoviitaiguilo na'axa'te huo'otaq soua na'axa'te maye huetaiguilo so hua'au qarta'ailpi?
3Qaq damaye qaua'aqtaxañim nam qaỹa'alquipi,
qataq ne'ena qaỹa'alquipi da'aqtaxanem qome cam llalaqpi,
qaq camayepi qaltaq da'aqtaxanem qome que'eca llalaqpi.
4Nam no'onaxatañi na qoche'lpi, nache chec na pelgaxanaqpi,
qaq nam no'onaxatañi namayepi, nache chec na pelgaxanaq llalaqpi,
qaq nam no'onaxatañi na pelgaxanaq llalaqpi,
namayepi ỹataqta ỹauta ana shiiquioxoipi.
5¡Qaq qami' taxaicpi, ñaq qanloiuec!
¡Ñaq qanỹeñi qami' maye qanỹomiitapigui na lataxa,
cha'aye na lli'i ana uva, taỹa'a qome da qaỹacona!
6Cha'aye na qalota qataq 'añaxaicpi shiỹaxauapi imattalec na ña'alhua,
qaq naua lhue qalaq 'eeta'am naua lhue na llon,
qataq naua lhue lapiataxanaqtel qalaq 'eeta'ama naua lapiataxanaqtel ana lloona.
7Nache ỹataqta nlaxatchiguiñi ana ỹañiguishe uvapi,
qataq ilaxachigui ana ỹañiguishe hiigopi,
nache ỹataqta qui'itta'ague naqa'en ana lcouepi,
ivitta'a da ỹapagaqta'aguelo naqa'en naua lpi'ineqa ana lcouepi qataq ỹataqta hua'axañi.
8Nache ne'ena ỹalamaxat nhuo' le'ecpi ỹataqta nỹen,
'eeta'am aca qa'añole da nỹeetac ỹaatrañi caua sa nsatte' alogo souaxat da ileu ca nauonaxaua.
9Qaq nache 'eetec nataqa'en da nỹeetac na ntaxaỹaxanaxanecpi,
souaxat da añi atamnaxaqui mashe qaca aca nachetaqtaxanaqte ala na nañiguishec,
qataq lataxa da yaqto' qoỹanot Ñim Nataxala'.
10Qaq na no'onaxapi ỹataqta toolec qataq na 'alhuapi deqaqta,
nache qaica na trigo qataq na lataxa qataq imeuo na aceite.
11Qaq qami' maye qauo'ocheetac na nanaxanaqa'pi, ña qanỹeñi qome,
qataq qami' maye qauo'ocheetac na uva lma'pi, qauaquicoita qome,
souaxat da deqat na ala na nañiguishecpi,
qataq deqat na trigo qataq na cebada.
12Qataq deqaqa ana nañiguishe uvapi qataq ana hiigopi,
nataqa'en ana nañiguishe granadapi, chaicpi qataq ana manzaanapi.
Qataq 'enauac anam nañiguishepi na no'onaxa deqaqa.
Huaña nache qaica ca l-lagaxayec nam llalaqpi na shiỹaxauapi.
13Qaq qami' ntaxaỹaxanaxanecpi qaỹa'añiiñi na sa nsatta nogoxot,
qami' maye qoviitague' añi nca'atoxonaxalate, ña qanoỹiñi,
cha'aye añi atamnaxaqui maye lalamaqte Ñim Nataxala',
mashe qaca ana nachetaqtaxanaqtepi ala na nañiguishec qataq na lataxa.
14Qalaỹoñiỹa't qome na Israel le'ecpi nache qauo'oche ca qanqouaqchetaxaqui,
qataq qalaỹoñiỹa't na nqueroxonecpi qataq 'enauac nam netalec ne'ena 'alhua,
huaña añi atamnaxaqui maye lalamaqte Ñim Qanatamnaxala'ai,
nache qauỹaxañiỹot Ñim Nataxala'.
15¡'Agai que'eca na'a'q! ¡Cha'aye mashe nayeetai' ca na'a'q maye lviraxaqui Ñim Nataxala'!
¡Que'eca na'a'q ỹataqta chaqaic, cha'aye Ñim Qaica ca Ỹaqalanapec nlaxaañi qome 'enauacna!
16Qataq ỹataqta sauanaqchigui da qaiuotaxanec na qonoq,
nache qaica ca tonaxac añi atamnaxaqui maye lalamaqte Ñim Lo'onatac 'Enauacna.
17Qaq anam nañiguishe ala maye qoỹaañi ltoỹaigui na 'alhua,
nache deqat na trigo qataq nam naỹamaqtaxaquipi nlaguiñi.
18¡Qaq na qana'atetpi qalaq ỹa'alaqtagui!
Qataq choche tata'acra' da nmittaique ca 'auaqpi,
qaq ana qaguetapi qalaq mashe ileetac.
19Qaq aỹem 'am seỹaxanot 'Am Nataxala',
cha'aye na norec mashe ỹavigaxatta na 'auaqpi maye hualec na toolec 'alhua,
qataq nam le'eraxa namaye ỹataqta ỹavigaxatta ana qo'oipaqpi maye hualec na no'onaxa.
20Qataq ivira'a na shiguiỹacpi maye no'onaxa le'ecpi da 'am iỹaxanot,
cha'aye ỹataqta deqaqta nam la'auaxacpi na 'etaxat,
qataq na norec ỹavigaxatta 'enauac nam 'auaqpisat.
Currently Selected:
Joel 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.