Santiago 1
1
Da lquinaxanaxac so Santiago
1Aỹem Santiago, aỹem so'onataxaatacot Ñim Lo'onatac 'Enauacna qataq So Qarataxala' Jesucristo, samaxa da iquinaxanaxac 'enauac na ỹa'amaqteetac So Cristo maye huetalec 'enauac ana 'alhua.
Da npi'iỹaxac Ñim Lo'onatac 'Enauacna
2Qami' ỹaqaỹa't maye qaua'amaqchiñiitac So Cristo, qami' iuen da ỹataqta qauamaichiguiñi da ivita da qaviyeeguet na ỹotta'a't lqalaiguesat. 3Yaqto' de'era qarpi'iỹaxaqui Ñim Lo'onatac 'Enauacna da ime da qaỹe'eguen, nache huaña da qami' qauaỹaañi da qalviñeeguet qataq huo'o da qara'añaxaqui da qauataiỹa'aguet 'enauac nam lqalaiguesat. 4Qaq ỹoqo'oye iuen da qauataiỹa'aguet na qañe'eguenataguiiqui, chochaq ivitta'a ca loga't da qanachaalataxaqui, yaqto' qaviyiỹa'a da qami' no'o'n qataq qauaỹachiñi da qaualaqailec cam qami' qaỹamaxaleguete.
5Da huo'o ca 'oonolec da qoñiita da iuen ca laỹaanec, qaq no'on da iỹaxanot Ñim Lo'onatac 'Enauacna. Qaq Ñimaye ỹami' camaye ỹataqta sa naloqnañi, cha'aye saishet da ỹauota'a da la'aloxo ca shiỹaxaua. 6Qalaxaye ỹataqta qaỹo'ot da npi'iỹaxac Ñim Lo'onatac 'Enauacna da ỹan damaye. Cha'aye nam huo'o da lqolectaxanaxac qalaq 'ena'am ana lapaxa aso auaxai da maicheye ca ỹamaxague na la'at. 7-8Na shiỹaxauapi maye saishet da taiguet da qaipi'iỹa'a qataq saishet da ỹaỹaten da ỹauo'o ca no'on lasataxac, namayepi qaica qome ca ỹaconeguet da ỹachegoxoto'ot So Qarataxala'.
Na choxoraqpi qataq na sallaxanecpi
9Da huo'o ca 'oonolec da qoñiita da choxoraq, qalaq camaye iuen da na'amaqchengui da Ñim Lo'onatac 'Enauacna ỹataqta huo'o naq naigui naqa'en camaye. 10Qaq da huo'o ca sallaxanec, nache camaye no'on da ỹataqta machiguiñi da Ñim Lo'onatac 'Enauacna nquigaxaañi da la'amaqchec, cha'aye dam hueto'ot nsallaxa camaye, 'eeta'am ana huoue lauoxo maye netalec na no'onaxa da saishet da 'eetai'. 11Añi nala' da ỹaguec na le'eraxa, nache ana huoue deqaqa, qataq nlleuchiguiñi ana lauoxo, nache deqat da lyac. Qaq 'era da 'eetec nataqa'en ca sallaxanec. Camaye qataq da lsallaxa saishet da 'eetai'.
Na ñe'eguenataguecpi ca shiỹaxaua
12Ca na'añaxateguet da ñe'eguenataguec, nache Ñim Lo'onatac 'Enauacna ỹaalec da lqouagaxanaqtaic. Cha'aye da mashe inoxonaqchetec de'era ñe'eguenataguec, nache Ñim Lo'onatac 'Enauacna ỹami' ca laueguec qataq ca lta'araic llo'oxoyec camaye. Qaq damaye nachera da nca'alaxa maye chochaq tatec maye ỹachaxanapeguem nam ỹauotec Ñimaye.
13Qom huo'o ca 'oonolec da qoñiita da nomteguet ca lhuennataxac da ỹo'ot ca sa ỹaỹamaxañi, nache saishet qome da nmaxalec Ñim Lo'onatac 'Enauacna. Cha'aye Ñimaye saishet da qaỹe'eguen qataq Ñimaye nataqa'en saishet da huo'o ca ỹe'eguen da yaqto' ỹo'ot ca qauem. 14Nachaqrata da ivita da huo'o da qañe'eguenataguec, nache maiche qarqopitaxanaqtaic nam qomi' ỹauecta'ape qataq qomi' ỹamaqta'ape. 15Qaq nam qauem qarqopitaxanaqtaicpi, nachena nam qomi' ỹaueca'alo da so'otaq ca qarasouaxashet. Qataq da nachaqrata da souaqtaigui da so'otaqtac da qauem, nache 'oonolec dam qomi' iuatta'agueta, qaq damaye nachera da nleuaxa maye chochaq tatec.
16Qami' ñauochaxau' ỹaqaỹa't, saishet qome da qaica ca qaraỹaanataxanaxaqui qataq saishet da maiche qanatenacheetapeguela't. 17Ñim Lo'onatac 'Enauacna nacheñi ñi qomi' ỹanema 'enauac na 'onaxaic qataq nalochiguiñi. Cha'aye Ñimaye nacheñi ñi maiche lo'onata 'enauac ana huaqaañipi maye neto'ot na piguem, qataq Ñimaye saishet da nqochen da lataxac. 18Ñim Lo'onatac 'Enauacna maiche lhuennataxac da ỹauo'oi qomi' llalqa. Qaq ỹoqo'oye qomi' ỹanema da dalaxaic achaalataxac, chegoqchigui de'era no'on na'axaỹaxac maye chegaqaigui da nca'alaxa.
Da qaỹalaxaguet dam la'aqtaxanaxac Ñim Lo'onatac 'Enauacna
19Qami' ñauochaxau' ỹaqaỹa't, ỹataqta qana'axaỹaxañiichigui de'era maye qami' sa'aqtaxanema: 'enauac da qoñiita iuen da qami' lhuotte' da qana'axaỹañiỹa ca qarỹai, qalaxaye saishet da saq qami' lhuanguita qataq saishet da ỹaguec da qartaxaỹaxaqui. 20Cha'aye na shiỹaxauapi maye sa ncherapec, saishet da ỹo'ot ca 'eetapeguec Ñim Lo'onatac 'Enauacna. 21Qaq ỹoqo'oye qaỹa'axañiiñi da qauo'ocheetac na qauem, cha'aye ỹapac mashe ỹaguec na qauem ana 'alhua. Saishet da qauo'oche da qauem; cha'aye da nache qoñiitec de'era, nache da qanachaalataxaqui nlaguiñi, 'eeta'am ca hualoq laỹe maye ltoqchet na lshepaxanaxa. Nachaqrato' da qami' huesotte' da qauacoñiiguet da la'aqtaxanaxac Ñim Lo'onatac 'Enauacna maye qami' ỹanema. De'era na'aqtaxanaxac ỹataqta huo'o da la'añaxac da qami' nca'alaxatre'c.
22-24¡Qaualaqaiguet da la'aqtaxanaxac Ñim Lo'onatac 'Enauacna! Cha'aye da choche qana'axaỹaxañeetega, qalaxaye saishet da qaualaqaiguet, nache maiche qanatenacheetapeguela't, nache qoñiita'am ca nalleta'ai' aca tannaxai. Da camaye da jec, qaq da qaỹata'ague, nache icoua'ai da lataxac. 25Qalaxaye da qami' qauqochiỹa da la'aqtac Ñim Lo'onatac 'Enauacna qataq nache 'eetai' da qaualaqaiguet, nache huo'o da qarlagaxayiqui 'enauac nam qauo'oche. Cha'aye da la'aqtac Ñim Lo'onatac 'Enauacna ỹataqta nalochiguiñi qataq qami' isoueeguesopa da ñe'etaxaloxo.
26Da huo'o ca ipi'itaxaatega da ỹataqta qui'itta, qalaxaye saishet da ilo'oguelo naua la'aqtaqa, nache camaye maiche natenachettapeguela't, qataq da la'amqaanataxanaxac ỹataqta qaica ca naigui. 27Da qaỹa'amaqten Ñim Lo'onatac 'Enauacna maye Nta'a, nache iuen da qaỹauo'o ca ntonaxac Ñimaye qataq qaỹo'ot ca ỹaỹamaqchiguiñi. Qaq damaye 'eeta': qaitauan ana pa'aipi qataq nam qaicaua caua lta'al maye huo'o da nque'eenaxac, qataq saishet da qanasheneuo da dauegaxan na qauemsat maye huetalec ana 'alhua.
Currently Selected:
Santiago 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.