Hageo 2
2
Da llo'oxoyec aso dalaxai atamnaxaqui
1Qaq so na'a'q veintiuno som ca'agoxoic siete, nache Ñim Nataxala' qaltaq ỹauo'o so la'aqtac ỹanem so na'aqtaxanaxanec Hageo, 2nache 'enapega da da'aqtaxanem so Zorobabel, qataq so Josué qataq som laỹepi nhuo' le'ecpi: 3«Nam ỹauaachigui co'ollaxa da llo'oxoyec aso hua'auñi atamnaxaqui, no'on da ỹa'axat, chaq 'eetec nagui añim dalaxai atamnaxaqui. ¿Peta'a qaica naqa'en ca lyac da naloqneguet asom hua'auñi? 4¡Qalaxaye 'ana'añaxat nagui 'am Zorobabel! ¡Qataq 'ana'añaxat 'am Josué, maye 'am lataxala' nam ntaxaỹaxanaxanecpi! Qataq qana'añaxache 'enauac qami' nhuo' le'ecpi, maye qoñeetalec ne'ena 'alhua. Qauo'onataxañe, cha'aye Aỹem qami' soota'agueta. Qaq 'era da ỹa'aqtac Aỹem Nataxala' maye Qaica ca Seqalanapec. 5Qaq ipacchigui ñaqa'en dam qami' sachaxanapeguema co'ollaq qoquiỹa'ai ye Egipto, da so Saqcha'a Ỹa'añaxac qami' nnaictagueto. Qaq ỹoqo'oye saishet qome da qayi'iitac. 6Cha'aye mashe sa qaỹaloq da sacholaxan qome na piguem qataq ana 'alhua, aso auaxai qataq na deqaqaalec 'alhua. 7Qataq cholaxan ñaqa'en 'enauac na ỹotta'a't shiỹaxauapi, huaña qome nache namayepi ndouo 'enauac da lsallaxa, nache añi atamnaxaqui maye ỹalamaqte ỹataqta nlaqchigui qome da llo'oxoyec.» Qaq Ñim Nataxala' maye Qaica ca Ỹaqalanapec 'enapec: 8«Aỹem ỹalamaxat na lcat plata qataq na oro. 9Qaq ana'ana dalaxai atamnaxaqui, anamaye ỹactec qome da lyac, qaq saq 'ena'am aso hua'auchiguiñi. Qataq Aỹem so'otec qome da huo'o da nlagaxayec ne'ena qanayeeta'a 'alhua. Aỹem Nataxala' maye Qaica ca Seqalanapec, 'era da ỹa'aqtac.»
10Qaq so na'a'q veinticuatro som ca'agoxoic nueve, co'ollaq mashe dos vi'iye da nta'a so Darío, nache Ñim Nataxala' ỹanem so la'aqtac so na'aqtaxanaxanec Hageo, 11nache ỹamaxalec somaye da ỹa'axa't naua la'aqtaqa Ñim Nataxala' maye Qaica ca Ỹaqalanapec, da inat som ntaxaỹaxanaxanecpi, da denataxanec na nqataxacpi, 'eeta': 12«Da huo'otaq huo'o ca ỹale da irouo ca mashe qui'itta lapat laỹe da lachetaqtaxanaxat, nache ỹaxaalec ca lapo' laỹe camaye. Qaq cam laỹe que'eca lapo', da nhuocteguet aca nauole 'ayiiña, huo'otaq ca lỹa nallec, huo'otaq ca lataxa, aceite, huo'otaq camachaqca lỹa nallec; ¿qaq peta'a camaye nataqa'en qui'itta?» Nache so ntaxaỹaxanaxanecpi ỹasat 'eeta', saishet. 13Nache so Hageo, qaltaq, 'eeta': «Qaq da huo'otaq huo'o ca shiỹaxaua nshepaxan da lataxac souaxat da ỹaconeua'a ca leuaxaic, qaq da ỹaconeua'a ca camachaqca ne'enapi, qaq namayepi ¿peta'a saishet nataqa'en da nshepaxan?» Nache so ntaxaỹaxanaxanecpi ỹasat, 'eeta', aja' nataqa'en nshepaxan. 14Nache so Hageo 'enapeco': «Ñim Nataxala' 'eeta', da la'aqtac: ‹'Era da 'eetec ne'ena shiỹaxauapi, da 'enauac nam ỹo'ottpi qataq na Aỹem ỹanot da lachetaqtaxanaxatpi ỹataqta nshepaxan. 15Qaq nagui no'on da qauennataxañeelec 'enauac de'era. Nagui da ñaq taỹa'a da qano'oxoñiisheguem añi atamnaxaqui, 16¿ca 'eetec co'ollaxa som qoviỹaigui? Cha'aye da qoñeeta, naxa da huo'o ñi 'oonolec da nqo'oneuga na naponec ala na nañiguishec maye ivi' veinte ana laỹe', qalaq nda'a't naxa da diez ana ilalec, qataq naxa da huo'o ñi tauga na no'onataqa' na lataxa, da huotaique da nlaxatchigui aca cincuenta naco'oñapi, qalaq nda'a't da nlaxachigui naxa ana veinte. 17Qaq nache Aỹem co'ollaxa da selaxachigui somayepi, serolec so ỹataqta dapaqa la'at, qataq so lalaxatpi, qataq aso lache 'enauac so qa'añiguishequi, qalaxaye ñaqaiyeta saishet da Aỹem qañe'eguelaqaỹot. Qaq 'era da ỹa'aqtac Aỹem Nataxala'. 18Qaq ne'ena na'a'q, veinticuatro na ca'agoxoic nueve, nache qalapaxañi na lo'oxonaxala' añim atamnaxaqui. 19Qaq no'on da qauloichigui, da nache chegoqchiguiña nagui da saishet qome da qui'itchigui na laỹe'pi na nañiguishec. Qaq nagui na'aictaxa da saxanaxa da ỹe ana ala ana uva, qataq ana hiigo, qataq ana granado, qataq ana oliivo, qalaxaye nache chegoqchiguiña nagui da sanem da no'on lañaxataxac.›»
Dam ỹachaxanapec Ñim Nataxala'
20Qaq nacheso se'eso na'a'q da Ñim Nataxala' qaltaq ỹe'eguelaxalec da ỹanem da la'aqtac so Hageo, 21nache 'enapega da da'aqtaxanem so Zorobabel maye nta'a ye Judá, 'eeta': «Aỹem sacholaxan qome na piguem qataq ana 'alhua; 22ñelaxaañi da la'añaxac na nta'alpi maye netalec ana 'alhua, qataq hua'axañi ñaqa'en ana nso'onaxaquipi namayepi; qataq seqalagoxooñe ana naigonapi maye alaataxaquipi, qataq nam lo'opi anamayepi; huaña nache ileu na caipi qataq nam netalec namayepi; ñi 'oonolec namayepi ilem qome ca lainec ca maiche lqaỹa. 23Qaq que'eca na'a'q 'am Zorobabel, maye 'am ỹamaxashec, ỹataqta 'am ñetela'a qome, 'am 'eeta'am ñaqa'en añi ñechiguishaqte maye ỹa'anaxanaqte, cha'aye 'am lleca'aguishec co'ollaxa. Qaq 'era da ỹa'aqtac Aỹem Nataxala' maye Qaica ca Seqalanapec.»
Currently Selected:
Hageo 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.