Gálatas 1
1
So Pablo ỹamaxa aso lere so 'amqaanataxanaxaicpi maye netaña ye 'alhua Galacia
1-3Qami' ñauochaxauapi ỹaqaỹañicpi maye qaua'amqaanataxañiitac maye qoviita'a na 'alhua Galacia:
Aỹem Pablo qataq nam ca'attague' So Cristo maye aỹem hueta'aguet, qami' sequinaqta'ape. Seỹaxaatacot Ñim Lo'onatac 'Enauacna maye Qarta'a qataq So Qarataxala' Jesucristo da ỹataqta qami' ỹauoteque qataq qami' ỹanema ca qarlagaxayiqui.
Aỹem namaxashec da sa'axat da no'on na'axaỹaxac: ¡da So Jesucristo mashe qaltaq nca'alec! Qaica ca aỹem ỹamaq nam shiỹaxauapi maye huetalec ana 'alhua, nachaqsota Somaye qataq Ñim Lo'onatac 'Enauacna maye Lta'a Ñim nca'alaxateeguesop da l-leuaxa co'ollaxa. 4So Jesucristo ỹataqta nache 'eetai' da ỹalaxaguet Ñi Qarta'a maye Lo'onatac 'Enauacna, qataq nañaneguet da nleuaxa yaqto' Ñimaye ỹapalaxat na qarasouaxashetpi qataq qomi' isoueeguesopa nam qauemsat maye huetalec ana 'alhua. 5Qaq ỹoqo'oye ¡nache 'eetai' qome da qaỹo'oxoreetac Ñim Lo'onatac 'Enauacna! Aja', nache 'eetec de'era.
Da 'oonolec na'aqtaxanaxac maye ỹataqta 'eesa
6Ñim Lo'onatac 'Enauacna qami' iỹaxanalo qataq chegoqchigui naqa'en So Cristo da qami' ỹachaxanalo da lsoxoyec. Qaq ỹoqo'oye hua'c da sa sa'amaqten da ỹapac saqaỹaloq da qaỹa'axañiiuec da qaralaxayiqui Ñim Lo'onatac 'Enauacna, nache qauacoñiiguet da lỹa na'aqtaxanaxac maye npe'eneguet da no'on na'axaỹaxac. 7Ỹoqta 'eesa da ỹataqta qaica ca lỹa na'aqtaxanaxac. Qalaxaye shenapec de'era, cha'aye huo'o na huotaique da naralaxat da no'on na'axaỹaxac maye na'aqtaguec So Jesucristo, ime, nache qami' isomaxanaqche't. 8Qaq ỹoqo'oye da huo'o ca nvi' da qami' da'aqtaxanema ca lỹa na'aqtaxanaxac maye 'eetega no'on na'axaỹaxac qalaxaye saishet da nateeteguet dam qami' sa'aqtaxanaqteguema, qaq aỹem seỹaxanot Ñim Lo'onatac 'Enauacna da ỹauo'o ca nhuaxanaguec camaye, na'aictaxa da huo'otaq namaxashec chegoqo'ot na piguem huo'otaq da maiche qarỹa. 9Qaltaq she'eguelaxalec da ỹa'aqtac maye mashe qami' sa'aqtaxaateguema co'ollaxa: Da huo'o ca ỹa'axattac ca lỹa na'aqtaxanaxac maye saishet da nateeteguet da hua'auñi qauacoñiiguet, qaq camaye qome Ñim Lo'onatac 'Enauacna ỹauo'o ca nhuaxanaguec.
So Cristo iỹaxana so Pablo
10Saishet da shectaigui da choche ñimitta'a da na shiỹaxauapi ỹaỹamaxareeta ca shenapec. Qataq saishet da ñimitta'a da aỹem qaỹamateguet. Cha'aye da nache sheetec de'era, nache saishet da aỹem lamaxashec So Cristo. ¡Cha'aye da ỹoqta ỹaỹamaqchiguiñi ñaqa'en da Ñim Lo'onatac 'Enauacna aỹem ỹaỹamaxareeta!
11Qami' ñauochaxau' ỹaqaỹa't maye qaua'amaqchiñiitac So Cristo, aỹem sauotaique da qauaỹaañita da qaica ca shiỹaxaua ana 'alhua da maiche ỹo'ot de'era no'on na'axaỹaxac maye qami' sa'aqtaxaateguema nagui. 12Damaye saishet da choche aỹem qaỹa'aqtaxanem huo'otaq da aỹem ỹapaxaguenec ca choche shiỹaxaua, nachaqrata da So Jesucristo, maye nacheso som aỹem ỹapaxaguenec damaye.
13Qami' mashe qauaỹaañi da ỹataxac co'ollaq shectaigui da la'amqaanataxanaxac na judiopi. Nataqa'en qauaỹachiñiita da sheetec co'ollaq da sauo'o da lta'araic nque'eenaxac nam ỹa'amaqteetac Ñim Lo'onatac 'Enauacna qataq da sheetec da sauotaique da ỹataqta selaxachigui. 14Ỹataqta sepaqueelec da la'amqaanataxanaxac na judiopi ñapacalec nam qalota judiopi maye ñaloxouapi, qataq aỹem ñalemaqte' da sepaqueelec na napaxaguenataxanaxacpi maye sachegoxoto'ot so hua'au ita'alpi. 15-16Qalaxaye Ñim Lo'onatac 'Enauacna ỹataqta lta'araic da lauoche da sheeta chegoqchiguiña co'ollaq saxanaxa da ñañiguiñi, qaq nache 'eetai' da aỹem lca'aguishec da yaqto' so'onataxanot. Nataqa'en aỹem ỹachaxana So Llalec yaqto' aỹem sa'axatem na shiỹaxauapi 'enauac na pa'aiguelo ana 'alhua de'era no'on na'axaỹaxac maye na'aqtaguec Somaye. Qaq co'ollaq cheta'ague da huo'o de'era, nache saishet da seuen da huo'o ca aỹem ỹapaxaguen, 17qataq saishet da saigue da Jerusalén da huo'otaq ñeqo'onalo soua nache 'eetai'salo da lamaxa'she So Jesús da seỹaxanoto ca la'aqta'c. Nachaqrata da aỹem sa ñaỹaloxon da saigue da 'alhua Arabia. Qaq co'ollaq ime, nache she'eguelaxa ye nỹecpi ye Damasco.
18Qaq co'ollaq mashe inoxoore'c soua tres vi'iye, nache aỹem saigue da Jerusalén da yaqto' sauatton so Pedro, nache soota'asop somaye ivi' soua quince na'axa'te. 19Nataqa'en ñauane' so lỹa namaxashec Santiago, som lalamaxat lqaỹa So Qarataxala' Jesús. Qaq so laỹepi namaxashecpi, qalaq qaica ca ñauane'. 20Qaq de'era qami' sa'aqtaxaateguema ỹataqta 'eesa. ¡Ñim Lo'onatac 'Enauacna ỹataqta ỹaỹateeta da saishet da satenataxaatac!
21Qaq co'ollaq ime de'era, nache ñeqo'ona yem 'alhua Siria qataq ye 'alhua Cilicia. 22Qaq se'eso na'a'q, nam ỹa'amaqteetac So Cristo maye netaña ye 'alhua Judea, namayepi saxanaxa co'ollaxa da aỹem ỹauatton. 23Nachaqrata da choche hua'aqtapeguelec naxa da na'aqtaxanaxac da qoỹeeta': «Se'eso ỹale maye ỹo'ottac da qanque'eenaxac caillaye, somaye nagui ỹa'axattac da no'on na'axaỹaxac dam huotaique nlaxaañi co'ollaxa.» 24Nache ỹo'oxoreetac Ñim Lo'onatac 'Enauacna, souaxat Ñimaye da naralaxat da ỹataxac.
Currently Selected:
Gálatas 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.