Proverbios 7
7
Naua latenataxanaxaco aca 'alo
1'Am ỹalcolec, ỹataqta 'aualaxagueta qome naua ỹa'aqtaqa,
qataq ỹataqta 'antoueeta'aque naua ỹamaxasoxonaxaco,
2'aualaxagueta naua ỹamaxasoxonaxaco qataq naua ỹapaxaguenataxanaxaco,
ỹataqta 'antela'alo, 'eeta'am 'anqa'en naua 'ara'aillalel, yaqto' 'anca'alec.
3Ỹataqta 'aỹa'axatchiguilo naua 'aya'axaatal,
qataq 'auachaiguilo da 'antoonaxac.
4'Eeta'am aca 'arqaỹa 'anqa'en de'era naỹaanec,
qataq 'eeta'am 'anqa'en aca 'anauochaxaua de'era naỹaanataxanaxac.
5Yaqto' naamaye 'am ntelaqna'agueta aca 'alo maye lauatapiguiñi' ca sa lhua,
qataq aca ỹaqa'a 'alo maye datenataxa'n naua la'aqtaqa.
6Cha'aye aỹem huo'o so na'a'q semeenaxaatac,
salletaviigui ñi ỹalloxoqui ñi ima',
7nache selota'a so nsoxoppi maye qaica ca ỹaỹaana'a,
qaq somayepi huo'o so 'oonolec ỹataqta qaica ca ỹaỹaana'a.
8Qaq cael ivita aso lamaqai nache ỹa'axasoxoolec so nqa'aic
nache ỹalamaxatteua'a so lma' asa'aso 'alo,
9qaq so mashe avit se'eso na'a'q
qataq mashe yaqta'a da napalñi.
10Nache aso 'alo sanaỹaloxon da nca'ateuga somaye,
qaq da lataxac qataq da no'otaxac yo'oqta da quisheguetaxai,
11qaq asa'aso 'alo yo'oqta da 'oopai,
qataq saq ỹataxalec, qataq da sanamaalec ca lma'
12qataq huo'o naxa da huetauga so nqa'aic,
qataq huo'o naxa da hueta'a na naponqa',
qataq naua lamaxal na nqa'aicpi da dauanaxaatac.
13Nache asomaye qapalot so nsoqolec nache napigoxoi',
nache qaica ca da'actaique da 'enapega, 'eeta':
14«Aỹem san co'ollaxa so ỹa'aqtac,
da saneuo ca ỹachetaqtaxanaxat qanhuaachigui,
qaq nagui sepacchigui se'eso ỹa'aqtac.
15Qaq ỹoqo'oye ñenoxonec da 'am ñanauga,
cha'aye huo'o da iyaxa da 'am selo'ot, qaq nagui 'am ñauane'.
16Qaq ye imala' mashe llapaqtalec ye ỹataqta 'onaxaic ỹacanec
chegaqaigui na lino maye chegaqa'ague da Egipto,
17qataq mashe secorelec so coraxat ama da laitaỹaxac,
chegaqaigui na qo'oipaq lcha'q, qataq ana áloe qataq na lỹa coraxat.
18Ỹoqo'oye 'auanac qome, nache ỹataqta ñemataqta da qaramanaxanaqtaic,
ỹataqta qaramachiguiñi qome ivitta'a ca yo'oxoñi,
19cha'aye so ihua saishet da hueta'a ye ima',
inoxonec qaỹoqtegue ca taigue,
20somaye ỹache aso qalota alom nache qaỹaloqta da ñe'eguelaq,
nato' qom ivita cam laloqnec da ñe'eguelaq.»
21Qaq naua amai' la'aqtaqa maye ñe'eguelaxattrasheguem,
nachenaua naua ỹañoxo't da ỹasat se'eso nsoqolec,
22nache somaye ca'ategue asomaye
'eeta'am ca nauegaxanaxala' huaca da taỹa'a qanqa'en ca nalaataqa',
qataq 'eeta'am ca chegaxango da nqoishec,
23nache ivitta'a da tagui añi lquiyaqte aca checna,
nache 'eeta'am ca qoỹo da maiche taỹa da ỹe'egueneguet ca naleguec,
sa ỹaỹaten da mashe daqat da nachaalataxac.
24Qaq ỹoqo'oye 'am ỹalcolec, nagui aỹem 'ana'axaỹaxana,
ỹataqta 'aloteleguete naua ỹa'aqtaqa.
25Saishet qome da ỹashaxanec da 'arhuennataxac asa'aso 'alo,
saishet qome da 'auqat souaxat da 'auca'ategue asomaye,
26cha'aye mashe qalota so que'emaq souaxat asomaye,
qataq ỹataqta qalota so ileu.
27Qaq ca quegue so nqa'aic maye taỹa'a so lma' asomaye,
qaq 'eeta'am da quegue ca nqa'aic maye taỹa'a da nleuaxa.
Currently Selected:
Proverbios 7: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.