Nehemías 13
13
So Nehemías naralaxat da llec so no'onataxanaxac
1Qaq se'eso na'a'q nache qaitaxaỹaxaatac aso lere so Moisés, na'axaỹaxaatega qanqoỹen so shiỹaxauapi, huaña nache qailalec da so amoniitapi qataq so moabiitapi ỹataqta saishet da qaỹasheneguet da ỹaleeguet so nhuo' le'ecpi maye lalamaxat Ñim Lo'onatac 'Enauacna. 2Cha'aye souaxat somayepi da saishet co'ollaxa da ỹami' ca aloq, qataq ca laquip so Israel le'ecpi, nacherata da isheeten so Balaam da yaqto' ỹasaxalec so qauem la'aqtac, qalaxaye Ñim Lo'onatac 'Enauacna saishet da ipaigui naqa'en se'eso qauem la'aqtac somaye nda'a't da nmeneguet naqa'en da no'on. 3Qaq co'ollaq ime da qana'axaỹaxaatega se'eso nqataxacpi, nache qaỹamaqhuec da ca'ai qanqa'en ye Israel 'enauac so ỹaleeguet co'ollaxa so ỹaqa'a ca chegaqa'ague. 4Qaq co'ollaq ñaq saxanaxa da ivita da qaỹo'ot de'era, nache so Eliasib, ilotague' co'ollaxa so naponaxanaxaqui maye naña aso atamnaxaqui maye lalamaqte Ñim Lo'onatac 'Enauacna, somaye mashe na'acna so Tobias. 5Ỹoqo'oye ỹanaigui so nanataxaqui lta'araic maye laponaxaqui co'ollaxa so nachetaqtaxanaxatpi, nchenaxanaxat ama na laita, nogoxoshetpi, qataq aso diezmo maye chegaqaigui so ala so trigo, lataxa, qataq so aceite, maye nachetaxat so leviitapi, qataq so no'onaxanaxanecpi, lasom lo'opi qataq so nachetaqtaxanaxat maye talec so ntaxaỹaxanaxanecpi. 6Cha'aye co'ollaq qanayeuaigui de'era nache aỹem ñaq saxanaxa da ñevira ye Jerusalén, cha'aye se'eso vi'i treinta y dos da lo'onataxanaxac so Artajerjes, maye nta'a ye Babilonia, nache aỹem ñachaateua'a caillaye somaye, nache co'ollaq mashe qaỹoqtegue de'era nache seỹaxanot so nta'a, 7nache somaye aỹem ỹanem da she'eguelaxa ye Jerusalén. Qaq huaña nache saỹaten de'era ỹataqta qauem maye ỹo'ot so Eliazib, souaxat da ỹauotec so Tobias, nache ỹanaigui so nỹec maye naña so nqasoxoc aso atamnaxaqui maye lalamaqte Ñim Lo'onatac 'Enauacna. 8Nache ỹataqta aỹem ỹalemataqchet, nache samaxasoxoolec da qanqateeguesop se'eso nỹec so logoxoshetpi so Tobias. 9Huaña, nache samaxasoxoolec da qaiqui'itaxatta se'eso nỹec, ime nache qaỹe'eguelaxatoigui da qoỹanaigui so nogoxoshetpi maye sa qaishetapecpi, maye lalamaxat aso atamnaxaqui maye lalamaqte Ñim Lo'onatac 'Enauacna, qataq aso nachetaqtaxanaqtepi, qataq so nchenaxanaxat maye ama da laitaỹaxac.
10Nataqa'en ỹa'axaỹaxac da so leviitapi, saishet co'ollaxa da qoỹami' ca aloq, ỹoqo'oye somayepi qataq so 'onaxanaxaicpi ỹe'eguelaxalo co'ollaxa soua lma'ate. 11Huaña nache ỹataqta seviraxato'ot so nataxala'pi, sheeta': «¿Ta'ainco' ye sa qauloỹeegue co'ollaxa añi atamnaxaqui maye lalamaqte Ñim Lo'onatac 'Enauacna?» Ime, nache seỹaxaneuga so ntaxaỹaxanaxanecpi qataq so leviitapi, nache she'eguelaxatchiguiña som lo'onataxanaqa'pi. 12Nache 'enauac so Judá le'ecpi ndoua'a so naponaxanaxaqui aso ndiezmo maye chegaqaigui so ala so trigo, lataxa, qataq so aceite. 13Nache saneuo so ntaxaỹaxanaxanec Selemías, da ilo'ogue so naponaxanaxaqui qataq so neraxanaxanec Sadoc, qataq so leviita Pedaías, nataqa'en so ltaua Janán, som llalec so Zacur, qataq laual so Matanías, cha'aye 'enauaque soomaye ỹataqta ipe'e'te, nache ilo'ogue da naloqnec som talec so maiche laỹepi. 14Qaq co'ollaq ime, da so'ot de'era nache, sheeta': 'Am Ñatamnaxala', 'auennata'a qataq saishet qome da 'aucoua'ai na ỹaỹamaqchiguiñi maye so'otec añi atamnaxaqui maye 'aralamaqte, qataq da 'año'oxonnataguec. 15Nache se'esoua na'axa'te sauaachigui so netaña ye Judá, da huo'o so nlomtac na lli'i aso uva, qataq dachoxooteguelec so 'ashena da ndotapegueuo so laqtac so trigo qataq so lataxa, uvapi, hiigopi qataq so ỹotta'a't laỹepi da irotapegueua'a ye Jerusalén. Nache seviraxattacot souaxat da imeetac so ỹotta'a't lmenecpi se'eso na'a'q mataxaqui. 16Cha'aye nataqa'en so chegaqa'ague da Tiro maye netaña ye Jerusalén, ndotapegueua'a so nỹaq qataq so laỹepi lmenec so na'a'q mataxaqui, nache nmeetague' so Judá le'ecpi. 17Qaq huaña nache seviraxato'ot so nataxala'pi ye Judá, sheeta': Qami' ỹataqta sa ỹaỹamaxañi da qauo'ocheetac, cha'aye qaica ca 'enec qanqa'eñi ye na'a'q mataxaqui. 18Cha'aye nachera da 'eetec co'ollaxa so hua'au qarta'ailpi, ỹoqo'oye Ñim Qanatamnaxala' qomi' namaxalo de'era qarachoxoyec, qataq ne'ena sonaqta'a huaqta'a't nỹecpi. Nache qami' ỹataqta qanogoqchichi Ñim Lo'onatac 'Enauacna, souaxat da qaica ca 'enec qanqa'eñi ye na'a'q mataxaqui.
19Ỹoqo'oye aỹem samaxasoxoolec da qaỹapoguilo naua laso'omi ye Jerusalén, da mashe inoxootapiguiñi aso nala' da mashe nayeetauo so na'a'q mataxaqui, nache ivitta'a da inoxootapiguiñi aso nala' so na'a'q mataxaqui. 20Nache ivi' dos pe' da pa'aỹaueegue da laỹe so npaqtaxanaxat ye Jerusalén so nmenaxaicpi maye ỹotta'a't so lmenecpi. 21Huaña, nache ỹataqta shenapega, sheeta': Saishet qome da nache qoñeeta'ac de'era da qoviito'ot na loigue na npaqtaxanaxat, cha'aye da ỹoltaq qavi'iguelaqailec damaye nache ỹataqta qami' secoñi'. Huaña nache somayepi saishet da ỹe'eguelaxalec da ỹo'ot de'era so na'a'q mataxaqui. 22Nataqa'en shenapega so leviitapi da nqui'itaxatta, ime, nache naua'n soua laso'omi, yaqto' huo'o naq 'enec qanqa'en so na'a'q mataxaqui.
Ime, nache ñatamen, sheeta': 'Am Ñatamnaxala', aỹem 'auennata'a qome souaxat da lta'araic 'arsoxoyec, qataq da 'archoxonnataxanaxa da sheeta. 23Qaq se'eso na'a'q nataqa'en huo'o so selalec so Judá le'ecpi da huaroneguet aso 'alo chegaqa'a ye Asdod, Amón qataq ye Moab. 24Nataqa'en selalec da qalota so llalaqpi somayepi da detaxaiguilo naua la'aqtaqa so chegaqa'a ye Asdod, qataq naua lỹa't la'aqtaqa so shiỹaxauapi, ỹoqo'oye sa ỹaỹate'en naua maiche la'aqtaqa na judiopi. 25Ỹoqo'oye ỹataqta shenapega qataq ñelaxa, nache huo'o so samaxasoxoolec da qaiuaxan, qataq da qanapogue' na laue, qataq samaxalec da ipacchigui ca la'aqtac da ỹanot Ñim Lo'onatac 'Enauacna. Nache sheeta': Saishet qome da qauashiñiiguet ana qaỹa'allipi da huaroneguet na llalaqpi namayepi, qataq na llalpi namayepi saishet da huaroneguet na qaỹa'alquipi, nataqa'en qami' saishet qome da qauaroñiiguet ana llale namayepi. 26¿Peta'a saq nachero' da huasoilec so Salomón, maye nta'a co'ollaxa ye Israel? Na'aictoxo' da qalota so laỹepi shiỹaxauapi maye netaleguete naua lỹa't 'aleu' maye huo'o so lta'alpi, qalaxaye saishet da huo'o ca nta'a da 'eeta'am somaye. Ñim Lo'onatac 'Enauacna ỹataqta ỹauotec ỹoqo'oye ỹanagui da nta'a ye Israel. Qalaxaye so chegaqauec 'alpi, nacheso so ỹoqta ỹo'ot da lasouaxashet somaye. 27Qaq ỹoqo'oye qomi' saishet da sashenaq da qaltaq qaỹo'ot de'era lta'araic nasouaxashet, maye ishet da inogoqchet Ñim Lo'onatac 'Enauacna, souaxat da qaỹaronguet na 'alpi maye ỹaqa'a ca chegaqa'ague. 28Qaq huo'o so 'oonolec llalec so Joyadá, som llalec so lataxala' so ntaxaỹaxanaxanec Eliasib, somaye so'orauec souaxat da lacho' so Sambalat maye horonita. 29Nache ñatamen, sheeta': 'Am Ñatamnaxala', saishet qome da 'acoua'ai de'era ỹo'ot so ntaxaỹaxanaxanecpi qataq so leviitapi, souaxat da qaica ca naigui naqa'en de'era lo'onataxanaxac so ntaxaỹaxanaxanec, qataq da 'eetec da 'am naỹamaxate' co'ollaxa. 30Qaq 'era da 'eetec da ñeqateeguesop somayepi so ỹaqa'a ca chegaqa'ague, ime, nache ñaloqchingui da lo'onataxanaxac so ntaxaỹaxanaxanecpi qataq so leviitapi. 31Nataqa'en saỹamaxaañi da 'eetec da qoỹaneuo so norec lashec, da ipacchiguilo naua laloqo'ote, qataq da qoỹaneuo aso la'auaxana ala so nañiguishec.
Ime, nache ñatamen, sheeta': 'Am Ñatamnaxala', aỹem 'auennata'a qome da aỹem 'aỹa'anem da 'archoxonnataxanaxa.
Currently Selected:
Nehemías 13: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.