Lucas 23
23
So Jesús qataq so Pilato
(Mateo 27.1-2, 11-14; Marcos 15.1-5; Juan 18.28-38)
1Nache 'enauac ñesheguem somayepi, nache qaỹauegueua'a So Jesús so Pilato. 2Huaña, nache somayepi ỹauo'o na ỹasaqteguelec da 'eetega lasouaxashet Somaye, 'eeta':
–Qomi' selaqalec de'era ỹale da ỹataqta taỹa't naqa'en na qarhuo' le'ecpi. Qataq 'eetega da saishet da sesheetenaq ñi lta'a na nta'alpi maye netaña ye Roma, qataq 'eetega da nachera dam Lca'aguishec Ñim Lo'onatac 'Enauacna.
3Nache so Pilato inat Somaye, 'eeta':
–¿Ỹoqta 'eesa peta'a da 'am lta'a na judiopi?
Nache So Jesús 'enapeco':
–Aja', nachera dam qonapec.
4Nache so Pilato 'enapega som lataxala'pi nam ntaxaỹaxanaxanecpi qataq som shiỹaxauapi, 'eeta':
–Aỹem saishet da huo'o ca sanata lasouaxashet de'era shiỹaxaua.
5Qalaxaye somayepi ỹe'eguelaxalec da la'aqtac ỹataqta na'axannec, 'eeta':
–Namaye ỹasouaxattega't na shiỹaxauapi maye netaña na Judea, souaxat da lapaxaguenataxanaxac. Chegoqchiguiña ye 'alhua Galilea, qaq nagui qataq nvitta'a ne'ena souaqta'a.
So Jesús qaỹauega so nta'a Herodes
6Qaq so Pilato co'ollaq hua'axaỹa de'era, nache denataxanec da se'eso ỹale chegaqa'a ye 'alhua Galilea. 7Qaq co'ollaq mashe qaỹa'aqtaxanem da Somaye chegaqa'a ye 'alhua Galilea, nache so Pilato ỹamaxa so nta'a Herodes maye ilotague' ye 'alhua Galilea, cha'aye somaye nataqa'en hueta'a ye Jerusalén se'eso na'a'q. 8Nache so nta'a Herodes co'ollaq ila'a So Jesús, nache ỹataqta machiguiñi, cha'aye mashe qaỹoqteguelo naua na'axa'te da huotaique da ỹauatton Somaye. Cha'aye hua'aqtapeguelec naxa da qaỹa'axattac, qataq nshetaique da ỹauaachigui da huo'o ca ỹo'ot na'anec maye sa qaỹauanapega. 9Nache ỹataqta qalota na nnataxanaxacpi da inattac Somaye, qalaxaye So Jesús saishet da ỹasateguet. 10Qaq nataqa'en nachattauo nam lataxala'pi na ntaxaỹaxanaxanecpi qataq nam dapaxaguenataxaatapeguec na namaxasoxonaxacpi, namayepi ỹataqta qalota na ỹasaqteguelec da 'eetega lasouaxashet Somaye. 11Nache so nta'a Herodes qataq so nalleppi ỹataqta ỹe'enai' So Jesús, nache lapaxalec so npo' ỹataqta qaica ca 'ena'am da lyac, 'eeta'am naqa'en ca nta'a. Qaq co'ollaq ime, nache qaltaq ỹe'eguelaxata so Pilato. 12Nache se'eso na'a'q so Pilato qataq so Herodes qaltaq nmana't, cha'aye soomaye co'ollaxa ỹataqta pa'aguenaxau'.
So Jesús qoỹaneguet da nalaataguec
(Mateo 27.15-26; Marcos 15.6-15; Juan 18.39–19.16)
13Nache so Pilato lapona't so lataxala'pi na ntaxaỹaxanaxanecpi qataq nam lataxala'pi na shiỹaxauapi. 14Nache 'enapega, 'eeta':
–Qami' aỹem qanaviquiiua'a de'era ỹale, qoñiitega da nachera da ỹasouaxattega't na shiỹaxauapi. Qaq aỹem sogote da sechemaxattega damaye, qalaxaye saishet da huo'o ca sanata da 'eesa nam qauasaqaitapeguelec lasouaxashet damaye. 15Nataqa'en ñi Herodes saishet da ỹa'amaqten da huo'o ca lasouaxashet, qaq ỹoqo'oye ñe'eguelaxat damaye. Qaq qauloichigui damaye da qaica ca lasouaxashet da huo'otaq ishet da qaỹachegoxotchigui ca nalaataguec. 16Ỹoqo'oye aỹem choche samaxasoxoolec qome da qaiuaxan damaye, qaq qom ime, nache saxanec. 17[Qaq so Pilato nache lataxac naxa da ivireuga ye naponaxac nache huo'o isouec ncoñeteguishec.]#23.16 Nache saxanec: Qalota co'ollaxa aso togoshe lerepi na griegopi da ỹalecneuo so na'aqtac: So Pilato 'eetec de'era cha'aye da ivireuga so naponaxac maye le'enaxat Lapascua, nache isouec naxa ñi 'oonolec lcoñeteguishec.
18Qalaxaye 'enauac so shiỹaxauapi maye hueta'a yi'iye nmasheguem da ỹa'alaq, 'eeta':
–¡'Auamaxasoxoolec da qaỹalauat da Jesús! ¡Qaq ca Barrabás, qalaxaye 'ausouec!
19Qaq se'eso Barrabás, somaye qaicoñe' co'olloxocheye, nache qoỹanaigui aso ncoñetaxanaxaqui, souaxat npa'aguene' so lta'a na nta'alpi maye netaña ye Roma co'ollaq huaña ye Jerusalén, qataq souaxat da ỹalauat so 'oonolec shiỹaxaua. 20Qalaxaye so Pilato huotaique da isouec So Jesús, ỹoqo'oye qaltaq ỹe'eguelaxalec da detaqtogoigui so shiỹaxauapi. 21Qalaxaye somayepi ỹataqta na'axannec da ỹe'eguelaxattalec da la'alaxac, 'eeta':
–¡'Auaxaneuo qome damaye! ¡'Auaxaneuo qome damaye!
22Qaltaq ỹe'eguelaxalec so Pilato da 'enapega somayepi, 'eeta':
–Qaq ¿negue'to' ca ỹo'ot sa ỹaỹamaxañi damaye? Ye aỹem qaica ca sanata lasouaxashet da huo'otaq naigui da qaỹauo'o ca nalaataguec. Aỹem choche samaxasoxoolec qome damaye da qaiuaxan, qaq qom ime, nache saxanec.
23Qalaxaye so shiỹaxauapi ỹataqta ỹe'eguelaqtalec da iỹaxaatapegueua'a So Jesús da ña qaiuaxaneuo. Qaq co'ollaq ỹaguec da la'alaxac somayepi, nache ivitta'a da ỹañoxot dam 'eetapeguec. 24Huaña, nache so Pilato nañoxot da ỹasateguet da 'eetapeguec somayepi. 25Nache isouec som ỹale maye lca'ateua'a somayepi, som qoỹaataigui aso ncoñetaxanaxaqui souaxat co'ollaq npa'aguene' so lta'a na nta'alpi qataq souaxat da laataxanaxaic. Nache ỹanoigui somayepi So Jesús da maiche ỹoiqueetac.
Da 'eetec So Jesús co'ollaq qaiuaxaneguet so npe'enaxaqui
(Mateo 27.32-44; Marcos 15.21-32; Juan 19.17-27)
26So huataxanaqpi co'ollaq ỹauegueueegue da laỹe ye nỹecpi So Jesús da ỹauotaique da iuaxaneuo, nache qanatena'aguet so ỹale, le'enaxat Simón, maye lma' ye nỹecpi le'enaxat Cirene. Somaye chegaqauga na no'onaxa. Nache qaỹachelec somaye so npe'enaxaqui So Jesús, nache ca'attaueegue qanqa'en Somaye.
27Qaq ỹataqta qalota so ỹalleppi maye ca'attaueegue So Jesús qataq qalota aso ỹalectauopi na 'alpi. 'Enauac asomayepi nỹeetagui, na'alaqtapiguiñi, souaxat da laquicoxo. 28Nache So Jesús ỹamata'aguet asomayepi, nache 'enapega, 'eeta':
–Qami' 'alpi maye qarmaye na Jerusalén, saishet qome da Aỹem qanỹeñiilec. Chaqrata qome da maiche qanỹeñiila't, qataq qanỹeñiilec na qaỹa'alquipi. 29Cha'aye anate' caua na'axa'te qome da qoỹeeta': «Ỹataqta machiguiñi acam sa deco'o qataq acam sa nauane' da hualaxai qataq acam saishet da illepaxaatauo ca llalec.» 30Huaña qome, nache na shiỹaxauapi 'enapega ana qaỹoqotcheguemec 'alhuapi, 'eeta': «Ña qomi' qaupataqaiyiñi.» Qataq 'enapega ana comarelecpi, 'eeta': «Ña qomi' qo'oxochiiyiñi.» 31Cha'aye da Aỹem qaica ca so'ot sa ỹaỹamaxañi, nache Aỹem qaỹalauat, qaq ¿chaq qoỹeetec cam ỹo'ottac ca sa ỹaỹamaxañi?
32Qaq nataqa'en so huataxanaqpi ỹauecta'agueta soua dos ỹale't maye ỹo'otta'ape naua qauema, da ỹauotaique da nalaataxau' naqa'en So Jesús. 33Qaq co'ollaq mashe ivireuga som 'alhua maye le'enaxat «Nqaic Lpi'inec»,#23.33 Nqaic Lpi'inec: Calvario huo'otaq La Calavera na doqshe la'aqtac de'era naigui da Nqaic Lpi'inec. Saishet da ỹoqta qaỹaỹateeta ta'ainco' da qoỹanagui de'era le'enaxat yi'iye 'alhua maye huaña co'ollaq qaỹalauat So Jesús. Huo'o na ipettega da souaxat da se'eso coma' lta'araic, 'eeta'am da lataxac na nqaic. Qalaxaye nataqa'en huo'o na ipettega da qoỹanaigui de'era le'enaxat souaxat da qalota so shiỹaxauapi maye qaỹalauat qaiuaxaata'aguet ca npe'enaxaqui da huaña yemaye. nache iuaxaneuo So Jesús, qataq nataqa'en soua dos maye ỹo'otta'ape naua qauema. So 'oonolec ỹana'ague da aloic So Jesús, qaq so lỹa qalaq ỹana'ague da ne'emaq. 34[Nache So Jesús 'eeta':
–'Am Ita'a, 'auchoxoren namayepi, cha'aye sa ỹaỹaten dam ỹo'ottac.]#23.34 Qalota co'ollaxa aso togoshe lerepi na griegopi da saishet da ỹalecneuo so na'aqtac: So Jesús 'eeta': «¡'Am Ita'a 'auchoxoren namayepi! Cha'aye sa ỹaỹaten dam ỹo'ottac.»
Ime, nache som huataxanaqpi nallettapiguilo soua alogo So Jesús da chaq negue't ca taleguete soomaye. 35Qaq 'enauac na shiỹaxauapi imeteetac Somaye qataq nam lataxala'pi namayepi ỹe'eetac, 'eeta':
–Nca'alaxatec naxa ca lỹa. Qaq nagui, qaq no'on da maiche nca'alaxaala't, qom ỹoqta 'eesa da nacheñi ñi Nta'a Nca'alaxaqui maye lca'aguishec Ñim Lo'onatac 'Enauacna.
36Qaq nataqa'en som huataxanaqpi ỹataqta ỹe'eetac Somaye, nache nquigueua'a da ỹauotaique da nỹomaxangui som lataxa maye ỹataqta chem. 37Qataq 'eetega, 'eeta':
–Qom nache 'am maye 'am lta'a na judiopi, qaq no'on qome da maiche 'anca'alaxaala't.
38Qaq huo'o som nerec maye neta'aguet na lsheenec pa'asheguem so npe'enaxaqui maye 'eeta': «'Ena na Lta'a na judiopi.»
39Qaq som 'oonolec soua qauema naua ỹo'otta'ape maye nataqa'en qaiuaxaatauo nataqa'en isheueetac Somaye, 'eeta':
–Qom 'eesa da nache 'am Nta'a Nca'alaxaqui maye 'am Lca'aguishec Ñim Lo'onatac 'Enauacna, qaq no'on da maiche 'anca'alaxaala't qataq nataqa'en qomi' 'anca'alaxatre'c.
40Qalaxaye so maiche lỹa nlaxa somaye, 'eeta':
–Qalaq ¿saisheto' da 'añi'iỹa Ñim Lo'onatac 'Enauacna? Ye qomi' nache shenaqta'am nataqa'en da nhuaxanaguec namaye. 41Qomi' ỹoqta 'itchiguiñi dam qanque'eenaxac, cha'aye maiche sesheetenaqtac dam naigui nam so'otaqtacpi maye qauem. Qaq nam na' ỹale, qalaxaye saishet da huo'o ca ỹo'ot qauem.
42Nache somaye 'enapego' So Jesús, 'eeta':
–Aỹem 'auennata'a qome, qom 'am qoỹami' da 'aulo'ogue 'enauacna.
43Nache So Jesús 'enapeco':
–Ỹoqta 'eesa da shenapec, da nagui sogote Aỹem qoueta'aguet da souaqta'a ye lma' na qanca'alaxatecpi da piguem#23.43 Lma' na qanca'alaxatec da piguem: De'era na'aqtac, na griegopi damaye naigui so lanaxanaqa' Ñim Lo'onatac 'Enauacna le'enaxat Edén. Qaq so na'a'q maye huetaigui So Jesús, de'era na'aqtac qaiueetac da qaitaxaỹa ca lma' na llalaqpi Ñim Lo'onatac 'Enauacna maye hueta'a da nlagaxayec qataq da namaicỹaxac, choche ivitta'a que'eca pa'atec na'a'q da Ñim Lo'onatac 'Enauacna nmit 'enauacna. maye qaica ca 'eeta'am da llo'oxoyec.
Da 'eetec da l-leuaxa So Jesús
(Mateo 27.45-56; Marcos 15.33-41; Juan 19.28-30)
44Co'ollaq mashe na'a'q laiñi choche ivitta'a da dasheta añi nala', nache 'enauac ye 'alhua ỹataqta napalñi, 45cha'aye añi nala' qalaq ỹataqta qaica ca le'eraxa, qaq som lapoxonaxat hualoxolaỹi maye pa'auo aso no'onaxanaxaqui late'erai qalaq colaqchiguingui na laiñi. 46Nache So Jesús ỹa'alaq, 'eeta':
–'Am Ita'a, 'am sepagaqteetot da saqcha'a ica'alaxa da maiche 'aulo'ogue.
Qaq co'ollaq mashe nasaxauec de'era la'aqtac, nache ileu.
47Nache so huataxanaq lta'a co'ollaq ỹauaachigui de'era, nache ỹo'oxoreetac Ñim Lo'onatac 'Enauacna, 'eeta':
–Ỹoqta 'eesa da ñi'iñi ỹale qaica ca ỹasouaxat.
48Qaq 'enauac so shiỹaxauapi maye ỹauaachigui de'era huaigui Somaye, nache nlagaxatapec, qalaxaye ỹataqta iuaxaataleguete naua ltogue souaxat da nqui'ic. Cha'aye nomta da lasouaxashet. 49Qaq 'enauac nam nauochaxauapi So Jesús qataq som 'alpi maye ca'attague' Somaye co'ollaq chegoqchiguiña ye 'alhua Galilea, nache qaỹatauga ca hueta'a co'ollaq imeteetac da huaigui Somaye.
Qailareñi So Jesús
(Mateo 27.57-61; Marcos 15.42-47; Juan 19.38-42)
50Qaq huo'o so ỹale ỹataqta no'on da lataxac, qataq soxoraic, le'enaxat da José, lma' ye nỹecpiolec le'enaxat Arimatea maye huaigui ye 'alhua Judea. Somaye nache ỹalectaigui na 'amaqtaqaicpi maye loicnatac na lataxaguesat. 51Se'eso José, somaye iuattaique da saqaỹaloq da yo'oq da lo'onataxanaxac Ñim Lo'onatac 'Enauacna. Qaq somaye saishet co'olloxocheye da ỹaỹamaxaren dam ỹo'ot som maiche laỹepi nta'alpi. 52Nache somaye nqo'oneua'a co'ollaxa so Pilato da iỹaxaneua'a da lo'ocỹaxac So Jesús. 53Qaq co'ollaq ime da nqaañi So Jesús, nache lpataxangui so nacanec maye no'on qataq late'erai añi lasheue, nache irouga asom huachiqui maye no'onata, naigui so coma' lta'araic. Asomaye saxanaxa da huo'o ca qaỹachangui. 54Qaq se'eso na'a'q, nacheso so aỹamaxataxaqui da qanaỹamaxatta'aguet so lỹa na'a'q maye mataxaqui som yaqta'a da nnoxoneuo.
55Nache som 'alpi maye ca'attague' So Jesús co'ollaq chegoqchiguiña ye 'alhua Galilea, nataqa'en jec da ca'attaueegue so José da demeenaxaneuga aso huachiqui. Nache ỹauaachigui ye qoỹaachiguiña so lo'ocỹaxac So Jesús. 56Nache co'ollaq ỹe'eguelaxareua'a ca lma't, nache iqataxaarai' som coraxat da ỹauotaique da lcoraxat so lo'ocỹaxac So Jesús. Ime, nache nmatre'c se'eso na'a'q mataxaqui, qaipactelec da lamaxasoxonaxac so Moisés.
Currently Selected:
Lucas 23: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.