Lamentaciones 2
2
Da lỹa laquicoxo ye Sión
1¡Ñim Nataxala', ỹataqta lta'araic da lalemataic,
ỹataqta napalñi naqa'en yem huo'o da lyac Sión!
Ỹataqta nlaxaañi da lyacỹaxac ye Israel,
ỹachegoxottot na piguem, nache talec naqa'en ana 'alhua,
qaq saishet da taỹapigui lauel da lapiaxalate anamaye,
co'ollaq dalemata Ñimaye.
2Ñim Nataxala', qaica da huo'otaq 'oonolec naqa'en ca nachattañi so lma'pi so Jacob,
co'ollaq dalemata nache hua'axañi naqa'en
so lpaqtaxatpi ye ỹataqta huo'o da lyac Judá,
qataq qaica ca la'amaqchec naqa'en so nta'a, qataq som nataxala'pi.
3Co'ollaq 'eroigui da lalemataic nache nlaxaañi 'enauac da la'añaxac so Israel,
qomi' ca'aisalo co'ollaq sataỹaqa'aguet so qampa'aguenaxauapi,
nache ỹavigaxat so Jacob, 'eeta'am ca norec da ỹavigaxat 'enauac nam natenalec.
4Ñim Nataxala', 'eeta'am ca pa'aguenaxaua da ichegaxaalec ca lchecnec,
qataq ỹa'añaxaalec na aloiguishec lhuaq, 'eeta'am ca loquiaxaua,
qataq ilaxachigui na huo'o da lyac da qailota'a.
Qataq anacot da nnogoxonaxac, 'eeta'am ca norec
da talec naqa'en so npe'lpi yem huo'o da lyac Sión.
5Ñim Nataxala', ỹe'eguelaxa da 'eeta'am ca pa'aguenaxaua,
nache ỹataqta ilaxachigui 'enauac ye Israel,
qataq ilaxachigui 'enauac so nma' lta'araicpi,
qataq ỹamaxañi so lpaqtaxanaxatpi, qataq yem huo'o da lyac Judá,
ỹataqta nacalec lỹa naqa'en da naquicoxo.
6Qataq ỹamaxañi so lpe'l, 'eeta'am naqa'en da ỹamaxañi
ca npe'l maye hueta'a ca nañiguishe lma',
qataq nlaxaañi som huaña naxa na naponaxac.
Ñim Nataxala' ỹo'ot da nam hueta'a ye Sión,
icoua'ai nam naponaxacpi, qataq yem na'a'q mataxaqui.
Qataq co'ollaq 'eroigui da nnogoxonaxac Ñimaye,
nache dataỹa'aguet so nta'a, qataq so ntaxaỹaxanaxanecpi.
7Ñim Nataxala' saiuooneguet aso lca'atoxonaxalate namayepi,
qataq ỹo'otan so lpe'l. Qataq ỹaneguet da lhuaqỹaxac so npa'aguenaxauapi
da nlaxaañi so npaxattaua'a som lta'araic nỹecpi,
nache somayepi ỹa'alaqtagui huetaigui aso atamnaxaqui
maye lalamaqte Ñim Nataxala', 'eeta'am ye na'a'q da huo'o na na'ashaxac.
8Ñim Nataxala', maiche lhuennataxa co'ollaxa
da ilaxachigui so lpaqtaxat yem ỹataqta huo'o da lyac Sión,
ỹo'ot da lataxac dam 'eetec da ilaxachigui.
Ime, nache ỹacoolec da ỹo'ot saishet da nmateeguesop damaye.
Qataq ỹo'otec da qanỹeeteguelec so ñiguisheguem qataq so mpaqtaxanaxat,
cha'aye soomaye nmerañi da hua'axareñi.
9Som lasompi yemaye qalaq qaỹamaxauec, qataq qailaxachigui
aso lvinaqtepi, nache 'enauac da huetaiya' somayepi.
Som lta'a qataq som lataxala'pi somayepi
qalaq ỹalectaigui nagui nam ỹaqa'a da la'amqaanataxanaxac,
nache mashe qaica nam lqataxacpi Ñim Lo'onatac 'Enauacna.
¡Qaq ivira'a som la'aqtaxanaxanecpi da qaica cam lauanaqchec
maye chegoqo'ot Ñim Nataxala'!
10Som ỹa'axaiquipi maye nataxala'pi yem huo'o da lyac Sión,
qalaq choche ñe'emaxat, nso'ona'aguet na 'alhua
qataq imettalec na lqaic na namoxoỹaxa,
qataq ỹaatarañi naua sansattegueta alogo.
Qaq nam qa'ampiolec ye Jerusalén qalaq naqtañi
saishet da nlosheguem souaxat da la'aloxo.
11Da ñenoinaxac qalaq mashe na'axa't naua ỹa'ai'te,
qataq ñanomteguet da ỹataqta seuet ana itogue,
qataq mashe qaica ca ỹa'añaxac, souaxat da sauaachigui
da qailaxachigui som huaqta'a't nỹecpi maye lma'pi som ihuo' le'ecpi,
qataq da sauaachigui som ñaqpiolec maye ñaq lleptac da ileuangui na nqa'aicpi.
12Nache so ñaqpiolec inattac naxa asom late'elpi, 'eeta':
«¿Chaq hua'ague ca huo'o aca nauole qataq ca lataxa?»
qaq somayepi mashe huañi 'eeta'am ca que'emaxaic
da mashe huotaique da ileu huetangui so nqa'aicpi som huaqta'a't nỹecpi,
ñaxaatregueshegue'm naua la'a'che, huetaleguete naua lhua'q asom late'elpi.
13'Am, Jerusalén maye ỹataqta 'am 'onaxaic ¿Negue'tom ca ishet da 'am ñaloqnaxaneguet?
¿Negue'tom ca ishet da saloqnaxana da yaqto' 'am sa'añaqchet,
'am Sión maye ỹataqta 'am qui'itta qataq huo'o da 'aryac?
Da 'anque'eenaxac ỹataqta lta'araic, ¿qaq negue'tom cam ishet da 'am nataren qome?
14Naua lauanaqcheco maye 'am ỹa'axatema co'ollaxa som 'ara'aqtaxanaxanecpi,
naamaye ỹataqta 'am ỹatenache't. Cha'aye saishet da 'am ỹachaxanalo naua 'arasouaxashe'ete,
da yaqto' 'am 'avita'aguet da 'am qaỹauega ca ỹaqaqa'a 'alhua,
nacherata da ỹo'ot da 'aua'amaqte'n naua lauanaqcheco maye saq'e'n.
15Qaq da 'am ila'a nam quetague' so nqa'aic, nache iuaxaata'a't naua lhuaxaye da 'am ỹe'eetac.
Yo'oxootagui, qataq iconnaxaatac na lqaic da le'enaxanaxac,
da detaqtega nam huo'o da lyac Jerusalén qalaq, 'eeta';
«¿Peta'a nachena ne'ena, nam nỹecpi maye qaỹamata'ac qaica ca 'ena'am da lyac,
nam ỹo'ot naxa da ntonaxac 'enauac nam netalec ana 'alhua?»
16'Enauac na 'ampa'aguenaxauapi detaqtagui da 'am dataỹa'aguet,
yo'oxootagui, qataq ỹo'o't naua lame'ete da 'am detaqtega, 'eeta':
«Mashe 'enauac da selaxataxagui. ¡Qaq 'ena nam na'a'q
maye mashe huo'oi na'axa'te da seuataqtaique,
qaq mashe nvi' namaye, nagui nache sauanaqchigui!»
17Ñim Nataxala', mashe ỹo'ot dam lapaxañi co'ollaxa,
nache ipaqueelec som la'aqtac, maye ỹan co'ollaxa soua qaỹoqteguelo vi'iye.
Nache saishet da 'am ichoxoreetac da 'am ilaxachigui,
qataq hua'aqta'a na 'ampa'aguenaxauapi da 'am ne'eetapigui,
qataq nquigaxatsheguem da la'añaxac na 'ampa'aguenaxauapi.
18¡'Am Sión, maye ỹataqta huo'o da 'aryac, 'auỹaxanot qome Ñim Nataxala' da 'am itauan!
¡Ña 'aua'aqta'a ye pe qataq ye na'a'q da huecoldec
naua 'arache' da 'eeta'am ca la'auaxac!
¡Saishet qome da 'avia'axaneguet da 'annoinaxac,
qataq saishet da nmatrec 'anqa'e'n naua 'ara'ai'te!
19Qoñesheguem, nache 'enauaque naua pe' da 'auỹaxaatac,
saishet da 'avia'axaneguet da 'arỹaxanaxac.
'Anashetcheguem da nnoinaxac añi 'arquiyaqte da 'auatato'ot Ñim Nataxala',
ña 'aua'aqta'a da huecorec 'eeta'am na 'etaxat.
'Auachaxaato'oto Ñimaye naua 'arhuaxaye nache 'anachoxoreelec da nachaalataxac nam 'aỹa'alaqpi,
maye hueta'alo naua lamaqail naua nqa'aico, ileetapigui' souaxat na lqouaxa.
20Ña 'aulogui 'am Nataxala', qataq 'auennataxaalec
da saỹauano' da huo'o ca qonetec de'era.
¿Isheto' peta'a nam nate'elpi da chec nam llalaqpi maye ñaq lleptac?
¿Peta'a iuen da qaỹalauat nam ntaxaỹaxanaxanecpi,
qataq nam na'aqtaxanaxanecpi da huagui ñim npe'l maye 'aralamaxat?
21Nam nsoxoppi qataq na ỹa'axaiquipi qalaq huetaiya' huetanguilo naua nqa'aico,
som ỹalamaxat nsoxoppi qataq so qa'ampiolec qalaq qaỹalauat qairolec so ỹeelonec,
som na'a'q co'ollaq 'aualemata nache 'aualauat. ¡Ỹataqta sa'auchoxonnai' co'ollaxa da 'aualauat!
22Qataq 'auachegoxotteguelo co'ollaxa da 'auanacot nam lcheguesat,
'eeta'am da qanqo'ona ca huo'o da la'amaqchec na'ashaxac,
som na'a'q co'ollaq 'aualemata 'Am Nataxala' qalaq qaica ca ishet da datauec.
Som ñepa'aguenaxauapi qalaq ỹalauat co'ollaxa,
som ỹaqtacpi qataq so ỹapaxaguenatacpi.
Currently Selected:
Lamentaciones 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.