Jeremías 52
52
Da lo'onataxanaxac so Sedequías
1So Sedequías mashe ivi' veintiún vi'iye da nachaalataxac, co'ollaq ỹacoolec da lo'onataxanaxac da nta'a, nache once vi'iye da ilotague' ye Jerusalén. Qaq aso late'e somaye le'enaxat Hamutal, asom llale so Jeremías, asomaye lma' ye Libna. 2Qalaxaye nam ỹo'otpi so Sedequías 'enauac qauem da imeteetac Ñim Nataxala', 'eeta'am da 'eetec co'ollaxa so Joaquím. 3Qaq ỹoqo'oye Ñim Nataxala' dalemataỹa co'ollaxa ye Jerusalén qataq ye Judá, nache ỹo'orauec.
Noxonec ye Jerusalén
Qaq ime co'ollaxa nache so Sedequías mpa'aguene' so nta'a ye Babilonia. 4Qaq so na'a'q diez so ca'agoxoic diez so vi'i nueve da lo'onataxanaxac so Sedequías, nache so nta'a Nabucodonosor, jec nnaicapegue' 'enauac so nalleppi da nqo'ona ye Jerusalén, nache coleesop. Nache ỹauo'o so lanataqa' ỹanaña ye datatta ye Jerusalén qataq ỹaachiguiñalo na lliguisheguempi da yaqto' iloquiaxan yemaye. 5Nache yi'iye huaqta'a't nỹecpi qaicoleesop co'ollaxa choche ivitta'a so vi'i once da lo'onataxanaxac so Sedequías. 6Qaq so na'a'q nueve so ca'agoxoic cuatro se'eso vi'i, nache nquiguec na nqouaxa se'eso huaqta'a't nỹecpi, nache so shiỹaxauapi mashe qaica ca aloq. 7Qaq huaña nache ỹauo'o so lauatac so lpaqtaxat se'eso huaqta'a't nỹecpi, qaq na'aictaxa so caldeopi da mashe coleesop, nache so nta'a qataq 'enauac so nalleppi datauec, ca'ai ye huaqta'a't nỹecpi se'eso pe. Somayepi tateuga so lasom maye ñichiguinguilo soua dos npaqtaxanaqa'ate, nache tateuga so nqa'aic maye taalec so lanaxanaqa' so nta'a, nache quegue so nqa'aic maye taalec so ca'amegue ye Jordán. 8Qalaxaye so alleppi caldeopi, icaalec co'ollaxa so nta'a Sedequías, nache iviralec co'ollaq huaña ye nalochiguiñi 'alhua ye Jericó. Nache 'enauac so nalleppi so Sedequías ỹalat somaye nache nlagaxattac. 9Nache so caldeopi ỹaconeua'a so nta'a Sedequías, nache ỹauega so nta'a ye Babilonia maye hueta'a co'ollaxa ye Ribla maye huaigui yem 'alhua Hamat. Qaq huaña yemaye nache so Nabucodonosor ỹo'ot da 'eetec da nhuaxanaguec so Sedequías, 10nache ỹauaachigui naqa'en somaye, co'ollaq damaxasoxoolec da qaicheguec na lqaic so llalaqpi, qataq 'enauac som 'amaqtaqaicpi ye Judá. 11Qataq damaxasoxoolec so Sedequías da qanqa't naua la'ai'te qataq qaicoñera'a't naua lhua'q, nache qaỹauega ye Babilonia, nache hueta'a yemaye da qaicoñettai' choche ivitta'a da ileu.
Qailaxachigui aso atamnaxaqui
12Qaq so na'a'q diez so ca'agoxoic cinco, so vi'i diecinueve da lo'onataxanaxac so Nabucodonosor da nta'a ye Babilonia, nache so Nabuzaradán maye 'amaqtaqaic ltaua so nta'a, qataq nataqa'en lataxala' so lauanaxanaxanecpi so nta'a, somaye nvita ye Jerusalén 13nache ỹavigaxat aso atamnaxaqui, so lma' lta'araic so nta'a, qataq 'enauac so nma'pi yi'iye huaqta'a't nỹecpi, qataq so lma'pi som 'amaqtaqaicpi nataxala'pi, 14qaq so alleppi caldeopi, maye nnaictague' somaye, iqalagoxotec so mpaqtaxanaxatpi maye coleesop ye Jerusalén. 15Qaq ime, nache so Nabuzaradán, ỹauega ye Babilonia da icoñi' somayepi, qaq nataqa'en som no'onañipi co'ollaxa yi'iye huaqta'a't nỹecpi, qataq som huaxaiguet co'ollaxa so nta'a ye Babilonia, qataq som laỹepi som ỹaỹaten da le'enaqtaxanaxac. 16Qalaxaye huo'o so no'onaxatañi som ỹataqta choxoraqpi, da yaqto' ilo'ogue ana nañiguishe uvapi, qataq na no'onaxapi.
17Qaq so caldeopi qalaq ilaxachigui co'ollaxa so nhuenecpi maye chegaqaigui na bronce maye huetaigui aso atamnaxaqui, qataq aso lauoqtepi, qataq aso na'attalecpi, qataq aso late'erai laỹe' na 'etaxat, nache 'enauac so bronce da ỹache, iro'ogue da Babilonia. 18Nataqa'en ỹache so laỹe'pi na alo, qataq so nsheraxanaxatpi, qataq so nchegaxanaxatpi da qaicheguec na vigaxaic, qataq aso nemaxanaqtepi, qataq so nemaxanaxatpi, qataq 'enauac so nhuenecpi maye chegaqaigui na bronce maye lataxaua da ño'oxonnataxanaxac. 19Qaq nataqa'en som lataxala' so nauanaxanaxanecpi, ỹache co'ollaxa 'enauac so nhuenecpi maye chegaqaigui na oro qataq na plata: so nỹoxonaxaquipi qataq so poqo laỹe'pi, qataq aso nemaxanaqte late'eraipi, qataq so laỹe'pi na alo, qataq aso lashe ana ncoỹaraxanaxaquipi, qataq so nemaxanaxatpi, qataq aso ỹomaxaquipi maye laỹe' naxa na lataxa maye nachetaqtaxanaxat. 20Qataq ỹache' nataqa'en soua nhuoqte late'el, qataq aso late'erai laỹe' na 'etaxat, caueegueto naqa'en soua doce ne'enaqtaqa huaca lhuaraiqa, maye chegoqraigui na bronce, maye nlletrañi asomaye, qataq soua lo'oxonaxala'ate aso atamnaxaqui maye damaxasoxoolec co'ollaxa so nta'a Salomón, qaq da lsallaxa somayepi qalaq saishet da qaivi' da qanaloqten. 21Qaq añi 'oonole se'esoua nhuoqtel qalaq ivi' ocho metro ye locte', qataq cinco metro y medio ye lcachiguiñi, qaq soomaye ỹasaataiguilo na pa'auo, qaq ye lquesaxanaxa so bronce ivi' siete centímetros. 22Qaq na pa'asheguem añi 'oonole se'esoua nhuoqtel qalaq huo'o na llo'oxonnaxat ndota't na bronce, qaq napactelec ye dos metro ye locta, qataq coolesopa soomaye na lpaqtaxat chegaqaigui na bronce, qataq llo'oxoraqte qanqa'en ana ne'enaqta granadapi, qaq se'esoua dos nhuoqtel qalaq nache 'eeta'a't da lataxa'c. 23Qaq som coleesop añi 'oonole se'esoua nhuoqtel, qalaq netagui aso cien ne'enaqta granadapi, qaq asomayepi noventa y seis aso yo'oqta.
So Judiopi qaỹauega ye ỹaqa'a 'alhua
24Qaq so lataxala' so nauanaxanaxanecpi nataqa'en icoñerai' so Seraías maye lataxala' so ntaxaỹaxanaxanecpi, qataq so Sofonías maye lỹa ntaxaỹaxanaxanec, qataq soua tres nauanaxanaxanaqa ye nqasoxoc aso atamnaxaqui. 25Qataq icoñerai' so lataxala' so alleppi, som ỹalectaigui so shiỹaxauapi maye hueta'a so huaqta'a't nỹecpi, qataq soua siete ỹale't maye lalamaqa'ate lamaxa'she so nta'a, maye huetra'a se'eso huaqta'a't nỹecpi, qataq so 'amaqtaqaic lataxala' na alleppi maye ỹapaxagueetac na ỹalleppi da yaqto' ỹalecnoigui na alleppi, qataq so sesenta ỹalleppi maye ỹo'oxoraicpi, maye hueta'a se'eso huaqta'a't nỹecpi. 26Nache so Nebuzaradán ỹauec 'enauac somayepi da ỹauega so nta'a ye Babilonia maye hueta'a co'ollaxa ye Ribla. 27Qaq huaña ye Ribla yem 'alhua maye huaigui ye Hamat, da so nta'a ye Babilonia damaxasoxoolec somayepi da qaỹalauat. Qaq 'era da 'eetec da so nhuo' le'ecpi maye lma' ye Judá qanqateeguesop ye na'alhua. 28Qaq 'iye yem lcata so shiỹaxauapi maye ỹauec co'ollaxa so Nabucodonosor: So vi'i siete da lo'onataxanaxac somaye, nache ỹauec so tres mil veititres shiỹaxauapi maye lma' ye Judá, 29qaq so vi'i dieciocho da lo'onataxanaxac, nache ỹauec so ochocientos treinta y dos shiỹaxauapi maye lma' ye Jerusalén, 30qaq so vi'i veintitrés, nache so Nabuzaradán, ỹauec so setecientos cuarenta y cinco shiỹaxauapi maye lma' ye Judá. Qaq ye lcata somayepi da ima'a't, nache ivi' cuatro mil seiscientos so shiỹaxauapi.
So Joaquín qaisouec qataq qoỹanem da la'amaqchec da hueta'a ye Babilonia
31Qaq so na'a'q veinticinco so ca'agoxoic doce, so vi'i treinta y siete da qaỹauec co'ollaxa so Joaquín maye nta'a ye Judá, nache ỹacoolec da lo'onataxanaxac da nta'a ye Babilonia so Evil Merodac, qaq somaye ỹachaxana co'ollaxa da lauotaxanaqtaic so Joaquín, nache nqateeguesop aso ncoñetaxanaxaqui, 32qataq ỹataqta ỹaỹamaxatta, nache ỹanem da ỹaquitcheguem da la'amaqchec da ỹalectaigui som laỹepi nta'alpi maye hueta'a ye Babilonia. 33Qataq 'enapega da nqa't soua ỹaatrañi maye alogo ca ncoñeteguishec, qataq da nache lquia'axaua so nta'a 'enauaque naua na'axa'te da nachaalataxac. 34Qataq nataqa'en 'enauaque naua na'axa'te da nachaalataxac, nache choche ivitta'a so na'a'q co'ollaq ileu so Joaquín, da somaye ỹacootapeguet aso ntaunaqte ye na'a'q, maye chegoqtecot so nta'a ye Babilonia.
Currently Selected:
Jeremías 52: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.