Esdras 3
3
Qaltaq qano'oxoosheguem aso nca'atoxonaxalate
1Qaq co'ollaq ivireuga so ca'agoxoic siete, nache so Israel le'ecpi mashe sogote da netaiguilo soua lma'ate qataq so huaqta'a't nỹecpi maye ỹotta'a't naua nañalo, nache 'enauac se'eso nhuo' le'ecpi, ỹo'ot so laponaxac huaña ye Jerusalén. 2Nache so Josué, maye llalec so Josadac qataq so lauo' le'ecpi, maye nataqa'en ntaxaỹaxanaxanecpi, qataq so Zorobabel maye llalec so Salatiel qataq so lauo' le'ecpi, somayepi ỹacoolec da no'oxoosheguem aso nca'atoxonaxalate maye lalamaqte Ñim Natamnaxala' so Israel le'ecpi, da yaqto' qoỹaneuo aso nachetaqtaxanaqte maye qaỹavigaxatta, da yaqto' qaipacchigui da 'enapec aso nere maye nanettalec na lqataxacpi so Moisés, som nale Ñim Lo'onatac 'Enauacna. 3Qaq na'aictaxa da so Israel le'ecpi ñe'etapeeguet co'ollaxa so shiỹaxauapi maye netaña yemaye, qalaxaye no'oxoosheguem aso nca'atoxonaxalate maye lalamaqte Ñim Nataxala', ỹe'eguelaxatchiguiña so toguishec lma', qataq ỹataqta ỹaỹamaxatchiguiñi. Nache 'enauaque soua na'axa'tesa'ache, ye nte'eta qataq ye avit da ỹo'ot so lachetaqtaxanaxat da ỹanot Ñim Nataxala'. 4Ime, nache ỹo'ot so lquia'axac maye naigui da iuennate co'ollaq netaigui so nauecañi nỹecpiolec da yaqto' ipacchiguilo naua nanettrañi nqataxaco. Nache ỹaneuo so lachetaqtaxanaxatpi maye ỹaneuo ye na'a'q, 5nataqa'en aso lachetaqtaxanaqtepi ye na'a'q, qataq da ivita da dalaxaic so ca'agoxoic, qataq so laỹepi lachetaqtaxanaxatpi da ỹo'oxoren Ñim Nataxala', qataq da huo'o ca maiche chegoqchigui da ỹauo'o ca lachetaqtaxanaxat da ỹanot Ñimaye. 6Qaq na'aictaxa da ñaq saxanaxa da ỹo'ot so lo'oxonaxala' aso atamnaxaqui, qaq nache chegoqchiguiña so la'auaxanec na'a'q so ca'agoxoic siete, nache se'eso nhuo' le'ecpi ỹaneuo aso lachetaqtaxanaqtepi maye qaỹavigaxatta da qoỹanot Ñim Nataxala'. 7Ime, nache qoỹanem aso nsheetenaqte so nỹec lo'opi qataq so qo'oipaq lo'opi. Qaq so lma' ye Sidón qataq ye Tiro qalaq qoỹanem so nallec, qataq so nỹomaxat lataxa qataq so aceite, da yaqto' ndoi' so qo'oipaqpi cedro da ỹachangui aso nnotaxaquipi da quetangui aso auaxai, ỹachegoxotchiguiña ye Líbano, nache nvitta'ata naqa'en so notaqa' maye le'enaxat da Jope, cha'aye nachera da la'aqtac so Ciro, maye nta'a ye Persia.
Qaỹacoolec da qaltaq qano'oxoosheguem aso atamnaxaqui
8Qaq so Zorobabel, maye llalec so Salatiel, qataq so Josué, maye llalec so Josadac, soomaye huaxaigueta so maiche lalamaxa't lauo' le'ecpi maye ntaxaỹaxanaxanecpi, qataq so leviitapi, qataq 'enauac so ñe'eguelaqpi maye noxonecpi co'ollaxa, somayepi ỹoltaq no'oxoosheguem aso atamnaxaqui, co'ollaq inoxonec so 'oonolec vi'i, qataq soua dos ca'agoxoiqa co'ollaq nvita ye Jerusalén. Nache so nalamaxat nhuo' le'ecpi maye chegoxoguetpi so Leví, maye mashe ivi' naua veinte vi'iye da nachaalataxac nacheso so qaipataxalec da ilo'ogue da no'onataxanaxac da qano'oxoosheguem aso atamnaxaqui maye lalamaqte Ñim Nataxala'. 9Huaña, nache so Josué qataq so llalaqpi, nataqa'en so lqaỹañecpi somaye, huaxaiguet so Cadmiel qataq so llalaqpi somaye, maye nataqa'en chegoxoguetpi so Judá, qataq so llalaqpi so lqaỹañecpi so Henadad, maye lauo' le'ecpi so chegoxoguetpi so Leví, da somayepi ilo'ogue so ỹo'ottacpi aso atamnaxaqui maye lalamaqte Ñim Nataxala'.
10Qaq so nỹec lo'opi so mashe ỹo'ot so lo'oxonaxala' aso atamnaxaqui maye lalamaqte Ñim Nataxala', somayepi nachaateua'a so ntaxaỹaxanaxanecpi, ỹaatrañi soua alogo lo'onataxanaxaqui', qataq ỹauota'a aso lasheerepi. Qaq so leviitapi maye chegoxoguetpi so Asaf, somayepi ỹauota'a aso lasaquiaxanata da qaỹo'oxoren Ñim Nataxala', nache qaipacchigui da lamaxasoxonaxac so nta'a David. 11Nache somayepi ỹaatacot da na'achecỹaxac Ñim Nataxala', nache 'eeta': «Qaỹa'añiitacot da qana'achecỹaxaqui Ñim Nataxala', cha'aye Ñimaye ỹataqta soxoraic, cha'aye de'era lauotaxanaqtaic na Israel le'ecpi ỹataqta chochaq tatec». Nache 'enauac se'eso nalamaxat nhuo' le'ecpi ỹataqta ỹa'alaqtagui da ntonaxac, qataq ỹo'oxoreetac Ñim Nataxala', cha'aye mashe qaỹo'ot so lo'oxonaxala' aso atamnaxaqui. 12Qaq ỹataqta qalota so ntaxaỹaxanaxanecpi, qataq so ltauapi maye chegoxoguetpi so Leví, qataq so lataxala'pi so nalamaxat nhuo' le'ecpi maye mashe ỹataqta ỹa'axaiquipi, qaq somayepi ỹauaachigui co'ollaxa aso hua'auchiguiñi atamnaxaqui, nache somayepi ỹataqta na'alaqtapiguiñi da nnoinaxac, cha'aye ỹauaachigui da qaltaq qano'oxoosheguem aso dalaxai atamnaxaqui. Nataqa'en huo'o so qalota ỹa'alaqtagui souaxat da ntonaxac. 13Qaq ỹataqta saqỹataxa't se'eso na'alaxac qataq se'eso nnoinaxac se'eso shiỹaxauapi da qana'axaỹaxaatega, cha'aye ỹataqta sa la'axaic se'eso la'alaxac, qaq ỹoqo'oye so qaỹoqta qalaq hua'aqtega se'eso na'alaxac.
Currently Selected:
Esdras 3: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.