Éxodo 2
2
Da lañoxoc so Moisés
1Huo'o so ỹale leviita, huaroneguet co'ollaxa aso 'alo maye maiche lauo' lashe. 2Qaq co'ollaq mashe qaỹoqteguelo soua na'axa'te nache asomaye hualaxai, ime nache huo'o so llalec ỹale. Qaq co'ollaq ilalec da ỹataqta 'onaxaicolec, nache asomaye tres ca'agoxoiqa da ỹoxottapiguiñi. 3Qalaxaye co'ollaq mashe saishet da queta da ỹoxottapiguiñi, nache asomaye ỹacona aso npaqtole chegaqaigui na nata'l, nache ỹa'amen na pa'auec asomaye ỹauota'a na lcha'q na qo'oipaq, yaqto' saishet da inoxoneuo na 'etaxat. Ime, nache ỹachangui asomaye so nogotolec, qataq nache ỹachaigui so na'aatesat maye huaña so loigue so tala Nilo, 4qataq 'enapega aso lqaỹa se'eso nogotolec da nache qaỹata'a ca hueta'a, da choche nauaatalec somaye.
5Qaq co'ollaq mashe lcopa'a, nache aso llale so faraón taxaama aso tala da nachel. Qaq soua lamaxashel co'ollaq ñaq quetro'ot na loigue aso tala, nache asomaye ilaxaama aso npaqtole, netaigui so na'aatesat. Nache ỹamaq aso 'oonole soua lamaxashel da ỹe'eguenaxaama asomaye. 6Nache aso llale so faraón co'ollaq ỹauaañigui aso npaqtole, nache ilaña so nogotolec nỹeetac. Nache ỹataqta huo'o da lchoxonnataxanaxa, nache 'enapeco':
«Ne'ena nogotolec, namaye llalec na hebreo le'ecpi.»
7Nache aso lqaỹa se'eso nogotolec taỹa da inat co'ollaxa aso llale so faraón, 'eeta':
«¿Peta'a 'auaỹamaxareeta da ñimitaique aca 'alo hebreo lashe da yaqto' illepaxan qataq ỹaqchet ne'ena nogotolec?»
8Nache aso llale so faraón 'enapeco':
«Aja' 'anmitaique acamaye.»
Nache aso qa'añole jec nache iỹaxana aso maiche late'e so nogotolec, 9nache co'ollaq ivireuo asomaye, nache aso llale so nta'a maye ilotague' som netaña ye Egipto 'enapego', 'eeta':
«Ña 'auache ne'ena nogotolec, qataq nache 'aỹa'aqchet qome, qaq aỹem qome sesheeten da 'aro'onataxanaxac.»
Qaq 'era da 'eetec asa'aso 'alo da ỹache se'eso nogotolec da yaqto' ỹaqchet. 10Qaq co'ollaq ivita da mashe ỹechigui so nogotolec, nache asomaye iroua'a aso llale so nta'a, qaq asomaye nache ỹacona da yaqto' ỹaqchet qataq nache 'eco' maiche lalamaxat llalec, nache ỹanagui da le'enaxat Moisés, cha'aye 'enapeco':
«Aỹem ñeqatta, sachegoxotangui so tala.»
So Moisés datauec chegoqchiguiña ye Egipto
11Qaq huo'o so na'a'q co'ollaq so Moisés ivita da mashe ỹe, nache nqo'ona ye netaña so lalamaxat lqaỹañecpi, huaña nache ilalec da ỹataqta qaica ca nyacnataguec souaxat da nlataguec. Ime qataq ỹauaachigui so Egipto le'ec da iuaxaatac so hebreo le'ec maye lauo' le'ec somaye. 12Nache ỹataqta ỹamattapiguiñi somaye, qaq co'ollaq qaica ca ila'a, nache ỹalauat se'eso Egipto le'ec, nache ilaroigui so delec. 13Qaq so lỹa na'a'q qaltaq ỹe'eguelaxauec, nache ilaleguete soua dos hebreo lashe' da maiche nhuaxaatega't. Nache inattaco' som iuaxaatac so lỹa, 'eeta':
«¿Ta'ainco' ye 'auaxaatac da maiche 'aralamaxat 'arhuo' le'ec?»
14Nache se'eso hebreo le'ec 'enapeco':
«¿Negue't ca 'am ỹanagui da 'am qarataxala' qataq da qomi' 'anmi't? ¿Qalqo' 'auauotaique da aỹem 'aualauat da 'eeta'am 'anqa'en so 'aualauat co'ollaxa Egipto le'ec?»
Qaq co'ollaq hua'axaỹa de'era so Moisés, nache ỹataqta huo'o da lcolanaxa, cha'aye tachigui lauel da mashe ya'aqlec da l-leuaxa se'eso lalaatac Egipto le'ec. 15Qaq so faraón co'ollaq ỹaỹaten da so Moisés ỹalauat so Egipto le'ec, nache damaxasoxoolec da qanmitaique da yaqto' nataqa'en qaỹalauat. Qalaxaye so Moisés mashe datauec, nache taỹa ye 'alhua Madián. Qaq co'ollaq ivi', nache netaña ye saqaỹapeque aso ñi'illoxoqui.
16Qaq se'eso na'a'q nache soua siete llale so Reuel maye ntaxaỹaxanaxanec ye Madián, soomaye naraxaama aso ñi'illoxoqui da yaqto' nỹoxosheguem so 'etaxat da nỹomaxan aso lalo qaguetapi so lta'a. 17Qalaxaye anac so laỹe qagueta lo'opi, nache ỹo'orauec so qa'ampi. Nache anac so Moisés da iueelec asomayepi, qataq nache nỹomaxan aso lalo qaguetapi. 18Qaq co'ollaq ivireua'a ye lma' so qa'ampi, nache so lta'a Reuel inatta'apo', 'eeta':
«¿Che ta'ainco' ye qami' sa qaỹaloxogueta na na'a'q?»
19Nache asomayepi 'enapeco':
«Qomye huo'o so Egipto le'ec qomi' iueeleguete da npa'axaneguet so laỹe qagueta lo'opi. Ime, nache nqatsheguem so 'etaxat, nache nỹomaxan aye qarelo qaguetapi.»
20Nache so Reuel qaltaq inatta'ape soua llalel, 'eeta':
«¿Qaq hua'ague ca hueta'ague que'eca ỹale? ¿Ta'ainco' ye qaualache da yaqto' ndotec camaye? ¡Qauesomiỹa, ña qanaviquiiuo yaqto' deque'e!»
21Qaq co'ollaq deque'etac somaye, nache so Reuel 'enapega da nache hua'a ye lma' somaye, nache so Moisés ỹaỹamaxareeta. Qaq co'ollaq mashe qaỹoqteguelo soua na'axa'te nache so Reuel ỹanem so Moisés da lhua aso llale Séfora. 22Qaq co'ollaq deco'o aso Séfora nache ỹale so llalec, nache so Moisés ỹanagui da le'enaxat Guersón, cha'aye somaye 'enapeco':
«Aỹem sachegaqauec ne'ena 'alhua maye soota'a.»
23Qaq co'ollaq mashe qaỹoqteguelo soua vi'iye, nache ileu so nta'a maye ilotague' ye Egipto, qalaxaye so Israel le'ecpi ñaq queta da lachetataic qataq nhuogoqtapeguem da nlataguec. Qaq Ñim Lo'onatac 'Enauacna hua'axaỹa co'ollaxa da la'alaxac somayepi. 24Nache Ñimaye ỹoqocha'a de'era lachetataic somayepi, nache tachigui lauel so naỹamaxataxac co'ollaq naỹamaxate' so Abraham, Isaac qataq so Jacob. 25Nache Ñim Lo'onatac 'Enauacna ỹamata'a so Israel llalaqpi nache ỹoqocha'a souaxat de'era huaigui somayepi.
Currently Selected:
Éxodo 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.