Deuteronómio 33
33
So Moisés ỹanem da no'on la'aqtac soua doce llalqa so Israel
1Qaq co'ollaq mashe sa qaỹapeque so laloqo' da ileu so Moisés, maye nale Ñim Lo'onatac 'Enauacna, nache somaye ỹanem da no'on la'aqtac na Israel le'ecpi, 2'eeta':
«Ñim Nataxala' chegoqtelec añi Sinaí,
nache qomi' icoỹareleguete hualec añi Seír.
Qaq na lqashelgaxa qalaq chegoqtelec
aye qasoxonaxapi ye Parán,
nache ivira'a ye Meribá Cadés,
qaq na aloiguishec lhuaq,
nache 'ettaigui so nasoqta'a nqataxacpi.
3Ñim Nataxala' ỹauotec na lalamaxat nhuo' le'ecpi,
qataq ntela'a na nañanotpi Ñimaye,
qataq na ỹalaxaguet,
qataq na ỹo'ot na lamaxasoxonaxacpi.
4Nache so Moisés qomi' ỹanema co'ollaxa
de'era napaxaguenataxanaxac,
yaqto' qomi' maye sachegoxosoxoguet
so Jacob, qaralamaxat damaye,
5nache huo'o co'ollaxa so nta'a ye Israel,
co'ollaq ivita da lapona't na lataxala'pi na nhuo' le'ecpi,
nache huaxaiguet na maiche nalamaxat
nhuo' le'ecpi ye Israel.»
6Qaq 'era co'ollaxa da la'aqtac so Moisés,
maye talec naqa'en so chegoxoguetpi so Rubén,
'eeta': «¡Nache 'eetai' qome so Rubén!
¡Qataq saishet qome da imeuo,
na'aictaxa da saq 'amaqtaq na nalleppi!»
7Qaq da la'aqtac maye ỹanem so Judá, 'eeta':
«'Am Nataxala', ñaq 'aua'axaỹa qome
da lỹaxanaxac na Judá,
qataq ỹalegoigui 'anqa'en qome
na maiche lalamaxat lauo' le'ecpi,
qataq 'auauota'a da 'ara'añaxac da 'aueelec namayepi,
qataq 'autauan da delogui' ca mpa'aguenaxauapi.»
8Qaq da ỹanem la'aqtac so Leví, 'eeta':
«'Am Nataxala', soua 'aralamqa'ate Tumim
qataq Urim qalaq 'aỹa'anema so shiỹaxaua maye 'arpe'et,
qataq 'avi'iguen co'ollaq huaña ye Masah,
som 'ancotaỹapegue' co'ollaq huaña
ye npaxaatasheguem na 'etaxat ye Meribá,
9som 'eetega so lta'a qataq aso late'e, 'eeta':
‹Sa ỹauana da qami' selota'alo›,
qataq co'ollaq ila'alo soua lqaỹa't qalaq, 'eeta':
‹Qami' sa sauatto'n›
nataqa'en co'ollaq ila'alo soua llalqa nache, 'eeta':
‹Saishet da qami' sauatto'n.›
Qalaxaye ỹataqta ỹalaxaguet da 'ara'aqtac
qataq ipactelec da ỹo'ot da 'anaỹamaxataxac.
10Qataq somaye ỹapaxaguenec
da 'alapaxañi lataxac so Jacob,
qataq da 'arapaxaguenataxanaxac so Israel.
Qataq 'Am taỹot naqa'en so nchenaxanaxat,
qataq 'Am ỹanot so nachetaqtaxanaxat
shiguiỹac maye qaỹavigaxatta.
11'Am Nataxala', ñaq 'aỹa'anem qome
da ỹaỹamaqchiguiñi 'enauac na ỹo'otpi,
qataq 'auamaateguet qome da 'auaconeguet
cam chegaqaigui da lo'onataxanaxac.
Qataq 'auo'ot da nhuaxanaguec ca mpa'aguenaxauapi,
yaqto' saishet da qaltaq ñe'eguelaxasheguem
ca nquiỹategapi namayepi.»
12Qaq da ỹanem la'aqtac so Benjamín, 'eeta':
«So lauotaxat Ñim Nataxala'
ỹataqta amata da nmataxac,
cha'aye Ñimaye ỹataqta ntela'a somaye,
¡Nache somaye huetalec
da ltelaqtaxanaxac Ñimaye!»
13Qaq da ỹanem la'aqtac so José, 'eeta':
«Ñim Nataxala', ỹanem qome da no'on ye na'alhua
cha'aye talec naqa'en na no'on 'aỹa maye chegoqo'ot na piguem,
qataq na 'etaxat maye chegaqaña na pa'aguiñi ana 'alhua,
14qataq ỹataqta no'on da alaỹaxac na lañiguishecpi ye vi'i,
qataq ỹataqta no'on ana lqateguishe ala maye huetoigui na ca'agoxoicpi,
15qataq ana ỹataqta no'on ala maye chegaqalec
ana ỹataqta togoshaapec qasoxonaxapi, qataq da alaỹaxac maye chegaqalec
nam qaỹoqotcheguemec 'alhuapi maye nache 'eetai',
16qataq da ỹataqta no'on alaỹaxac na 'alhua,
qataq da sa qoue ana ala na nañiguishec, chegoqchigui da maiche 'eetapeguec
Ñim netaigui co'ollaxa asotai' 'epaqole maye 'ettaigui.
Nache 'enauac damaye talec naqa'en so José,
som qaiỹotauga maye chegaqaigui so lqaỹañecpi.
17Qaq da lyacỹaxac so José qalaq 'eeta'am
ca la'auaxanec llalec ca huaca,
qataq da la'añaxac 'eeta'am da la'añaxac
naua lcoue ca no'onaxa le'ec huaca,
qaq nache iroleguete qome da decanaxangui
na ỹotta'a't shiỹaxauapi, ivitta'a naqa'en naua qaỹoqtalo 'aleu'.
Qaq namayepi nachena na qalota llalaqpi so Efraín,
qataq na qalota llalaqpi so Manasés.»
18Qaq da ỹanem la'aqtac so Zabulón qataq so Isacar, 'eeta':
«'Am Zabulón, 'auamachiguiñi qome da huo'o ca 'aigue,
nataqa'en 'am Isacar da qonetaigui ca npe'lpi.
19Qataq 'aỹaxana na ỹotta'a't shiỹaxauapi
da tasheguema 'anqa'en añi qasoxonaxa,
yaqto' ỹaneuo ca ỹaỹamaqchiguiñi lachetaqtaxanaxat,
nache nque'etaxaachigui qome na sa qoue nallec
maye chegaqangui aso auaxai,
qataq da nsallaxa maye hueto'oto naua loiguiye asomaye.»
20Qaq da ỹanem la'aqtac so Gad, 'eeta':
«¡Ỹataqta qaỹo'oxoren qome
Ñim qalochiguiñi naqa'en na na'alhua so Gad!
Som 'eeta'am ca llon da nqapaxaatañi,
nqapaxaatalec ca loxonec,
nache ntactauec na lhuaq qataq lqaic.
21Qataq lca'ateua'a ca no'on da ỹauo'o lalamaxat,
cha'aye qaiqataxanai' da qaỹauo'o lalamaxat na ỹo'otegue na lataxacpi.
Qataq nachena na lataxala' na nhuo' le'ecpi,
nache ipactelec da ỹo'ot da lamaxasoxonaxac Ñim Nataxala',
qataq da ỹaỹamaqchiguiñi lataxac na Israel le'ecpi.»
22Qaq da ỹanem la'aqtac so Dan, 'eeta':
«So Dan 'eeta'am ca llalec ca llon,
maye parenaxaata co'ollaxa chegoqchiguiña ye Basán.»
23Qaq da ỹanem la'aqtac so Neftalí, 'eeta':
«So Neftalí, ỹataqta ỹaỹamaxareeta co'ollaxa Ñim Nataxala',
ỹoqo'oye ỹataqta qalota naqa'en da nqouagaxa,
¡qataq na lalamaxat 'alhua chegoqchiguiña
aye auaxai choche ivitta'a ye la'añaxa!»
24Qaq da ỹanem la'aqtac so Aser, 'eeta':
¡So Aser ỹataqta qaỹo'oxoren da ỹalectaigui na lqaỹañecpi,
qataq na lqaỹañecpi ỹataqta lauotaxat somaye!
Qataq na aceite ỹapapiaxa't naua lapia'ate,
25qaq naua naso'omi qalaq la'araxat naqa'en na lcat qataq bronce,
qaq da la'añaxac qalaq nache 'eetai' ivitta'a ca loga't da nachaalataxac.
26Ỹataqta qaica ca 'ena'am Ñim Natamnaxala' na Israel le'ecpi,
cha'aye netalec na piguem da 'am itauan,
qataq netalec na lo'oc da la'amaqchec.
27Ñim Lo'onatac 'Enauacna maye nache 'eetai' da 'aye'eguenaxala',
qataq Ñim nache 'eetai' da 'am nlletañi,
qataq 'am dataueeguesop naqa'en na 'ampa'aguenaxauapi,
qataq 'am ỹamaxalec co'ollaxa da 'aulaxachigui namayepi.
28Nache na Israel le'ecpi ỹataqta qome qaica ca ỹauotaique.
Qataq na chegoxoguetpi so Jacob,
netalec qome ca 'alhua maye
sa qoue na trigo qataq ana uva,
qaq na piguem qalaq nache chegoqtacot na 'aỹa.
29¡'Am Israel, ỹataqta 'auamachiguiñi qome!
¿Negue'tom ca 'am 'eeta'am?
Cha'aye 'am lca'alaqtac Ñim Nataxala',
Ñimaye 'am npaxattalec qataq 'am itauan,
¡Ñimaye 'eeta'am ca 'ainec maye huegaxanaxaic!
Qaq ỹo'ot qome da 'oxonec ca 'ampa'aguenaxauapi
qataq da 'auapigui camayepi.
Currently Selected:
Deuteronómio 33: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.