Colosenses 2
2
1Qaq aỹem ñeshetaique da qami' qauaỹaañita da ỹataqta lta'araic da ñeloquiaxac souaxat da qoñiita, qataq nam netaña ye nỹecpi ye Laodicea, qataq 'enauac nam saxanaxa da aỹem ỹauatton. 2Qaq de'era ñeloquiaxac sauotaique da sa'añaqchet 'enauac namayepi qataq yaqto', nache 'eetai' da na'atta'a't souaxat da lauotaxanaqtaic So Cristo, huaña nache ivireguet namayepi da ỹataqta 'eesa da ỹaỹaten 'enauac dam saq cha'api 'eetapeguecpi Ñim Lo'onatac 'Enauacna qataq So Cristo. 3Cha'aye Somaye nacheso so imatta't 'enauac na ỹotta'a't naỹaaneguesat qataq na nauattonaxanaxacpi maye chochaq huañi. 4Qaq qami' sa'axatema de'era, yaqto' saishet da huo'o ca qami' ỹatenache't souaxat naua choche no'onaxa't ltaxaỹaxaco maye saq 'e'n. 5Cha'aye aỹem, na'aictaxa da saishet da yo'oqchigui da qami' salectaiguilo, qalaxaye, nache 'eetai' da qami' seuennategalo qataq ỹo'ot da ñetonaxac da qami' saỹate'n da ỹaỹamaqchiguiñi da qarataxaqui, qataq qoquiito'ot da qarpi'iỹaxaqui So Cristo.
6Qami' mashe qauasacheeguet So Jesucristo da ỹauo'oi qami' lalamaqa'ate qataq nacheso So Qarataxala'ai. Qaq ỹoqo'oye qanpogoxoiñiỹapegue' da qami' ỹaỹamaxareete' Somaye. 7Cha'aye mashe qami' napaxaguenataqa, qaq ỹoqo'oye qanquigaxachiitasheguem da qarpi'iỹaxaqui Somaye, qataq qaualaqaigueta naua lapaxaguenataxanaxaco yaqto' qanquiquiita'aguet da no'on da qarataxaqui, qataq nache 'eetai' da qaỹa'añiitacot da qana'achecỹaxaqui Ñim Lo'onatac 'Enauacna.
Da nachaalataxac dalaxaic ca na'attaua'a So Cristo
8Qaq maxatchaxa qome, saishet da qana'axaỹaxañeeto'ot nam nshetaique da qami' ỹatenacheteque naua lhuennataxaco maye 'eetega 'eesora 'eeta'am da ỹaanaxanaxaic, qalaxaye naamaye maiche laỹaanataxanaxaco na shiỹaxauapi. Ne'ena shiỹaxauapi ỹalaqtapeeguet na saqcha'a na'añaxacpi maye lma' ana 'alhua, qaq saishet da ỹalaxaguet So Cristo.
9So Cristo ỹataqta imauec da lataxac da 'eeta'am Ñim Lo'onatac 'Enauacna, 10qataq Somaye ilo'ogue 'enauac nam saq cha'api maye huo'o da la'añaxac qataq nam damaxasoxonapecpi. Qaq ỹoqo'oye qami' qaica ca qaviñiitaique, cha'aye qana'ayeetaua'a Somaye. 11Na judiopi ỹauo'o na la'anaxat na lo'oc maye la'anaxat da lalamaxatpi Ñim Lo'onatac 'Enauacna. Qalaxaye Ñimaye ỹachegoxotchigui So Cristo da qami' ỹalecnoiguilo nam lalamaxatpi, nache nataqa'en nqat da qarqopitaxanaqtaiqui da qauo'ocheetac da ñe'etaxaloxo. Qaq 'era da qana'anaxache maye qami' ỹo'oteque Ñim Lo'onatac 'Enauacna. 12Cha'aye co'ollaq qami' qanachelaxanguilo na 'etaxat, nache qoñiita'am So Cristo co'ollaq qailareñi, qaq co'ollaq qannoxoñiisheguem, nache qoñiita'am Somaye co'ollaq qanca'alaxateeguesop da l-leuaxa, cha'aye qami' ỹataqta qaua'amaqchiñi da la'añaxac Ñim Lo'onatac 'Enauacna. 13Cha'aye qami' co'ollaxa soua ỹoxoguelo vi'iye, qalaq 'eeta'am da qami' leuaxaiqa, souaxat na qarasouaxashechi, nache saishet da qaualliquiitaigui na lalamaxatpi Ñim Lo'onatac 'Enauacna. Qalaxaye nagui Ñimaye qarca'alaxauai naqa'en So Cristo, qataq ỹapalaxat 'enauac na qarasouaxashechi. 14Nache Ñim Lo'onatac 'Enauacna ỹapalaxat aso qaravigaxaiste maye saqalanaqtac qataq ỹo'ottac da qanhuaxanaguec, ỹachegoxotchigui da l-leuaxa So Cristo co'ollaq qaiuaxaneguet so npe'enaxaqui. 15Ñim Lo'onatac 'Enauacna deuotaxanec da la'añaxac nam saq cha'api maye damaxasoxonapecpi chegoqchigui So Cristo da loxonec namayepi, ỹataqta qaica ca 'enec naqa'en co'ollaq ỹauec da 'eeta'am da lcoñeteguishecpi co'ollaq dauegaxan Somaye.
Qanmichiỹaique qome ca hueta'ague da piguem
16Qaq ỹoqo'oye qami' saishet qome da qauqocheetega ca qami' quetapegueleguete souaxat cam yo'oqchigui qolliqui, huo'otaq cam qanỹomiigui, huo'otaq souaxat da qaica ca 'enec qanqa'eñi naua naponaxaqui', huo'otaq da dalaxaic so ca'agoxoic, huo'otaq ye na'a'q mataxaqui. 17'Enauac ne'enapi choche 'eeta'am ca lpaqal cam ñaq naỹa'acna, qalaxaye dam ỹoqta 'eesa, nacheso So Cristo. 18Qaq ỹoqo'oye saishet da qauaqaita'a da huo'o ca qami' ỹaueegueta ca qarasouaxashechi, qataq ỹoqta ỹactec da saishet da qauqocheetega nam shiỹaxauapi maye ỹo'oxoreetac na namaxashec piguem le'ecpi qaltaq ne'enaqchingui da huesota da lataxac. Qataq 'eetega da huo'oi naua lauanaqcheco, qalaxaye choche datenataxaatac. Qataq naua lhuennataxaco ỹataqta nlaqchiguilo da ño'oxonnaxac, qalaxaye nachaqrata da iuennatega nam qauempi. 19Cha'aye namayepi saishet da na'attaua'a So Cristo som ilotague' 'enauac nam ỹa'amaqten qataq nquigaxattauec da la'añaxac. Somaye ỹami' na 'amqaanataxanaxaicpi 'enauac na iueetac, qataq ỹataqta na'atta't naqa'en namayepi, ipagaqchiichigui dam ỹoqta 'eetapeguec Ñim Lo'onatac 'Enauacna.
20Qaq 'eesa da qami' qana'ayeetaua'a So Cristo, chegoqchigui da l-leuaxa co'ollaq qaiuaxaneguet so npe'enaxaqui, qaq ỹoqo'oye mashe saishet da qami' ilatta'ape nam saq cha'api maye ilotague' ana 'alhua. Qalaxaye ¿ta'ainco' da qarataxaqui da 'eeta'am da ñaq qoviito'ot da la'añaxac namayepi? ¿Ta'ainco' ye qaualaqaitapeeguet naxa nam 'eeta' da la'aqtac: 21«Saishet da 'apoteua'a de'era, qataq saishet da qollec yi'iye, qataq saishet da 'avi'eguen yi'iye»? 22Qaq 'enauac ne'ena qaỹapaxaguenataxaatapeguecpi, namayepi maiche lapaxaguenataxanaxac nam chochaq shiỹaxauapi, qaq ne'enapi qom qaỹoqtegue, nache ivitta'a da qaica ca naigui. 23Qaq namayepi saishet da qanqoleguete' da ishet da qaiuen, cha'aye dapaxaguenataxanec da lataxac da na'amqaanataxanaxac, qataq da sa na'amaqten ca shiỹaxaua, qataq da nala'aguet da nllañi da lqopitaxanaqtaic. Qalaxaye namayepi saishet da huo'o ca ltaunaxanaxac da qaỹataỹa'aguet nam qauem lqopitaxanaqtaic da qarapachiỹaxac.
Currently Selected:
Colosenses 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.