2 Timoteo 4
4
1Qaq de'era iqataxac 'am sami' nagui, ỹataqta qomi' ỹauaachiguilo Ñim Lo'onatac 'Enauacna qataq So Qarataxala' Jesucristo maye anac ca na'a'q da nachaxan da Nta'a, qataq nmit ñi 'oonolec na shiỹaxauapi maye ña nca'altauec qataq na mashe ileu. 2Sauotaique da 'am 'aua'axat da na'aqtac da huo'o ca 'ardaqa', nache 'ena'am da qaica ca 'ardaqa'. 'Auachaxana da lsomaxac na shiỹaxauapi, 'auaỹamaxaañi qataq 'aua'añaqchet qataq 'anhualaxaune' da 'auapaxaguen. 3Cha'aye huo'o qome ca na'a'q da na shiỹaxauapi saishet da isheteguet da napaxaguenataxanaxac no'oita. Nachaqrata da na'axaỹaxaata'ai ca maiche lqopitaxanaqtaic, qataq nmitta'a da ỹotta'a't naqa'en na napaxaguenaxala' da qaỹapaxaguenec cam nateeteguet ca maiche 'eetapeguec. 4Qataq ỹapoguilo naua ltela lauaco da saishet da na'axaỹaxana da 'eesa lataxac. Nachaqrata da na'axaỹaxaata'ai na ỹotta'a't na'aqtaxanaxac maye qaica ca naigui. 5Qalaxaye 'am Timoteo, ỹataqta 'anaỹanaxanaqchen qome, qataq 'ana'añaxateguet na 'anque'eenaxaguesat, qoqueto'ot da 'aua'axat da no'on na'axaỹaxac maye chegaqaigui da nca'alaxa, 'apactelco' da ỹoqta lataxac da 'aro'onataxanaxac.
6Da ñachaalataxac mashe qoỹanot Ñim Lo'onatac 'Enauacna, 'eeta'ama caua ntago'q da qaicoreleguete aca nca'atoxonaxalate. Cha'aye mashe saqaỹapeque ye laloqo' da ñachaalataxac. 7Mashe semat da seloctapeguelec da ỹo'onataxanaxac, qataq mashe senoxonaqchetec da ñaloxoyaxac. Cha'aye saishet da huo'o ca huaña da saxanec da ñaquitaxac, qataq da salaxaguet Ñim Lo'onatac 'Enauacna. 8Saỹaten da Ñimaye maye sa depe'enaxan da nmit 'enauac na shiỹaxauapi. Ñimaye aỹem ỹami' ca nsheetenaguec da ñachaalataxac maye lasheue da ỹalaxayec. Qaq saishet da nachaỹemta da aỹem ỹami', maye nataqa'en 'enauac na shiỹaxauapi maye ỹayeeta'aguet ca lle'eguelaxasoxoc Ñimaye.
Lalamaxat nqataxac so Timoteo
9Ỹataqta sa 'anaỹaloxon qome da 'auanac da aỹem 'anauane'. 10Cha'aye so Demas aỹem ca'ai, souaxat da lqopiche da 'onataxac lma'na, nache nqochena ye nỹecpi ye Tesalónica. Qaq so Crescente taigue da 'alhua Galacia, qaq so Tito taigue da 'alhua Dalmacia. 11Nachaqñita ñi Lucas ñaq aỹem hueta'aguet. Qaq qom 'auanac, nache 'ananaỹalec ca Marcos da 'anauec, cha'aye camaye ishet da aỹem itauan da qaro'onataxanaxac. 12Qaq so Tíquico samaxa ye nỹecpi Éfeso. 13Qaq qom 'auanac, nache 'anache ca ipo' maye secotano'ot ca Carpo maye netaña ye nỹecpi ye Troas. Nataqa'en 'anache aca ỹerepi, qataq saishet da 'aucoua'ai aca ỹataqta no'on ỹeraxanaxalatepi.#4.13 No'on ỹeraxanaxalatepi (Pergaminos): 'Era da le'enaxat da qaiỹaxana aso nerepi maye lo'oc ana qagueta qataq ana quetaq.
14So lcat lo'o, le'enaxat Alejandro, ỹataqta qalota na aỹem ỹo'otec qauem. Qalaxaye So Qarataxala' isheeteneguet qome 'enauac nam aỹem ỹo'otecpi. 15Maxatchaxa, 'arvita'agueto' qome somaye, cha'aye somaye ỹataqta dataỹa'aguet da qara'aqtaxanaxac.
16Se'eso na'a'q co'ollaq cheta'ague da so'ot so hua'auchiguiñi itaxaỹaxac da ñeueela't da sataỹa'aguet na nta'alpi maye hueta'a ye nỹecpi ye Roma, qalaq 'enauac da aỹem qaỹalata'a't, qaica ca aỹem nachaateua'a da aỹem detaqlec. Qalaxaye 'onaxaic da Ñim Lo'onatac 'Enauacna saishet da ilogui qome de'era. 17Qalaxaye So Qarataxala' Jesús aỹem itauan, qataq aỹem ỹami' da ỹa'añaxac da ña sepactelec da sa'axat da na'aqtac maye chegaqaigui da nca'alaxa, yaqto' hua'axaỹa de'era 'enauac na saq judiopi. Qaq nache 'eetec de'era da aỹem nca'alaxateeguesop da loxonaxanaxac nam dequi'iỹapec 'eeta'am ca shiguiỹac. 18Qataq aỹem isoueeguesop 'enauac nam qauem qataq aỹem nca'alaxatec, ime, nache aỹem ỹauegueua'a da lo'onataxanaxac maye ỹataqta lta'araic da llo'oxoyec chochaq tatec. Aja', nache 'eetec de'era.
Da pa'atec lquinaxanaxac so Pablo
19Samaxa da iquinaxanaxac aca Priscila qataq ca lhua Aquila, qataq ca lauo' le'ecpi so Onesíforo. 20Qaq so Erasto no'onaña ye nỹecpi ye Corinto, qaq so Trófimo ño'onaxataña ye nỹecpi ye Mileto, cha'aye souaxat da sa no'on. 21Qaq 'aỹalapegue' qome da 'auanac, 'aqopitaxanapec da saxanaxa da nvi' na no'omaxa. 'Am ỹamaxa da lquinaxanaxac ñi Eubulo, Pudente, Lino, qataq añi Claudia, qataq 'enauac na qarqaỹañicpi.
22Qaq So Qarataxala' Jesucristo 'am hueta'aguet qome, qataq Ñim Lo'onatac 'Enauacna qami' ỹaaleguete qome da lta'araic lqouagaxanaqtaic. Aja', nache 'eetec de'era.
Currently Selected:
2 Timoteo 4: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.