2 Reyes 25
25
Da 'eetec co'ollaq noxonec ye Jerusalén
1Qaq huetoiguilo co'ollaxa soua diez na'axa'te so ca'agoxoic diez, so vi'i nueve da nta'a so Sedequías, nache so nta'a Nabucodonosor, lỹa 'enauac so nalleppi da nqo'ona da yaqto' iloquiaxan ye Jerusalén, qataq coleesop, nache naña so naloteuga yemaye, qataq nauaxaỹaxaasheguem som lliguisheguempi. 2Nache yi'iye huaqta'a't nỹecpi co'ollaq qanauaatalec, nache ivitta'a so vi'i once da nta'a so Sedequías. 3Qaq soua nueve na'axa'te soua cuatro ca'agoxoiqa se'eso vi'i, nache ỹataqta nquiguec so nqouaxa se'eso huaqta'a't nỹecpi, nache se'eso shiỹaxauapi ỹataqta qaica ca aloq. 4Huaña, nache qaitagoxotec so lpaqtaxat se'eso huaqta'a't nỹecpi. Qaq na'aictaxa co'ollaxa da so caldeopi coleesop da nauaatac somaye, qalaxaye so nta'a, qataq so nalleppi, datauec co'ollaxa queuoigui se'eso pe, tateuga so ñeguec maye nangui na laiñi soua dos npaqtaxanaqa'ate, som ñeguec maye taalec so lañiguishe lma' so nta'a, maye taỹauga som ca'amapega't ye Arabá. 5Qalaxaye so alleppi caldeopi icaalec co'ollaxa so nta'a Sedequías, nache ivi' co'ollaq huaña ye nalochiguiñi 'alhua ye Jericó, qaq so nalleppi somaye, qalaq nlagaxattac, nache qaỹalat somaye. 6Nache som caldeopi, loxonec co'ollaxa so nta'a Sedequías, nache qaỹauegueua'a so nta'a ye Babilonia, maye hueta'a ye Ribla, maye huaigui ye 'alhua Jamat. Qaq nache huaña yemaye, da so Nabucodonosor, ỹauo'o da nhuaxanaguec so Sedequías, 7nache ỹauaachigui qanqa'en somaye da qaicheguec na lqaic so llalaqpi. Qaq so Sedequías, qalaq qanqa't naua la'ai'te, qataq qaicoñerai' qoỹanagui so lquet lcat da yaqto' qaỹaueegue da Babilonia.
Da 'eetec co'ollaq qailaxachigui aso atamnaxaqui
8Qaq soua na'axa'te siete soua cinco ca'agoxoiqa, soua diecinueve vi'iye da nta'a ye Babilonia so Nabucodonosor, nache ivita ye Jerusalén so Nabuzaradán maye 'amaqtaqaic lamaxashec so nta'a ye Babilonia. 9Nache somaye ỹavigaxat co'ollaxa aso atamnaxaqui maye lalamaqte Ñim Nataxala', qataq so nma' lta'araic maye lo'onataxanaqa' so nta'a, qataq 'enauac se'eso huaqta'a't nỹecpi ye Jerusalén, qataq so lma'pi som ỹo'oxoraicpi ỹalleppi. 10Qaq nache 'enauac se'eso alleppi caldeopi, maye nnaictague' se'eso 'amaqtaqaic lamaxashec so nta'a, iqalagoxotec so lpaqtaxat ye Jerusalén. 11Huaña nache so Nabuzaradán, maye 'amaqtaqaic lamaxashec so nta'a, ỹauega ye Babilonia som no'onaña co'ollaxa se'eso huaqta'a't nỹecpi, qataq som itaunaua'a co'ollaxa som nta'a ye Babilonia, qataq som sa nqalaate' da huo'o na ỹo'ot. 12Qaq nda'a't som choxoraqpi da no'onaxatañi da yaqto' ỹo'ot na nanaxanaqa'pi qataq ỹaañi ana uva. 13Qaq se'eso caldeopi ỹataqta ilaxachigui co'ollaxa 'enauac som nogoxoshetpi bronce, maye huetaigui aso atamnaxaqui maye lalamaqte Ñim Nataxala', qataq soua nhuoqtel qataq soua na'attaleguete lo'oxonaxalatel, qataq aso ỹataqta late'erai laỹe' so 'etaxat. Nache 'enauac se'eso bronce qaira'a ye Babilonia. 14Qaq nataqa'en ỹache so laỹe' so alo, qataq so nsheraxanaxatpi, qataq so nchegaxanaxatpi maye lo'o aso ncoỹaraxanaxaqui, qataq so nemaxanaxat lta'araicpi, qataq 'enauac so laỹe no'onataxanaxatpi bronce maye nhuenecpi da huaña aso atamnaxaqui. 15Nache se'eso 'amaqtaqaic lamaxashec so nta'a, nataqa'en ỹache so nchenaxanaxat laỹe'pi, qataq so poqo laỹe'pi maye imauec da oro qataq plata. 16Qaq se'esoua dos nhuoqtel, qataq aso ỹataqta late'erai laỹe' so 'etaxat, qataq soua lo'oxonaxalatel asomaye, maye so nta'a Salomón damaxasoxoolec co'ollaxa da qaỹo'ot, da yaqto' lalamaqtel aso atamnaxaqui maye lalamaqte Ñim Nataxala', qaq da lsallaxa somayepi sa qaivi' da qanaloqten. 17Qaq añi 'oonole se'esoua nhuoqtel ivi' ye ocho metros ye lalogaxa, qataq som ỹataqta pa'asheguem asomaye, nache netasheguema so bronce maye ivi' dos metros ye lalogaxa, qataq naua laỹel asomaye nache coleesop qanqa'en so npaqtac bronce, qataq qapaltaua'a qanqa'en aso ne'enaqta ala ana granada. Qaq se'esoua dos nhuoqtel, nache 'eeta'a't da lataxa'c. 18Qaq se'eso 'amaqtaqaic lamaxashec so nta'a, nataqa'en icoñi' co'ollaxa so Seraías, maye lataxala' so ntaxaỹaxanaxanecpi, qataq so Sofonías maye nataqa'en ntaxaỹaxanaxanec, qataq soua tres shiỹaxau' maye nauaatrac naxa soua laso'omi aso atamnaxaqui. 19Qataq icoñi' som lataxala' so alleppi, som pa'aỹa'aguet naxa da ilotague' so alaataxaicpi maye netaña so huaqta'a't nỹecpi, qataq soua cinco ltau' so nta'a maye huetra'a se'eso huaqta'a't nỹecpi, qataq som leraxanaxanec so alleppi, maye ỹettañi naxa nam ỹo'otpi se'eso shiỹaxauapi maye lma' se'eso 'alhua, qataq so sesenta shiỹaxauapi ỹo'oxoraicpi maye hueta'a co'ollaxa se'eso huaqta'a't nỹecpi. 20Nache so Nabuzaradán, ỹauega 'enauac somayepi so nta'a ye Babilonia, maye hueta'a ye Ribla, maye huaigui ye 'alhua Jamat. 21Qaq nache huaña ye Ribla da so nta'a ye Babilonia, damaxasoxoolec da qaỹalauat somayepi.
Qaq 'era da 'eetec co'ollaxa da so Judá le'ecpi qaỹauega ye ỹataqta qaỹoqta ye maiche na'alhua somayepi.
Som no'onañi shiỹaxauapi datauec taỹa ye Egipto
22Qaq so Nabucodonosor maye nta'a ye Babilonia, ỹanagui da nta'a so Gedalías, som llalec so Ajicán, qataq laual so Safán, da yaqto' ilo'ogue som shiỹaxauapi maye somaye no'onaxatalec co'ollaxa ye Judá. 23Nache so lataxala'pi so alleppi ye Judá, qataq som nalleppi, co'ollaq la'axaỹaxac de'era, nache taỹa ye Mizpá, da yaqto' na'aqtaxane' so Gedalías. Qaq 'ena na le'enaxat somayepi, Ismael som llalec so Netanías, Johanán som llalec so Careaj, Seraías som llalec so Tanjumet, maye Netofa le'ec, qataq so Jazanías som llalec som ỹale maye Macá le'ec. Qaq somayepi, nache nnaictague' so nalleppi. 24Qaq so Gedalías, ỹanem co'ollaxa da la'aqtac somayepi, qataq som nalleppi, nache 'eeta': «Saishet qome da qayi'iitega da qami' ỹamaqta'ape na caldeopi, nache qoñiitalec qome ne'ena 'alhua, qauo'onataxañiỹot qome ñi nta'a ye Babilonia, nache ỹataqta qaica cara qome da qoñeeta.» 25Qalaxaye huetoigui co'ollaxa so ca'agoxoic siete, co'ollaq nvita yi'iye 'alhua so Ismael, som llalec so Netanías, qataq laual so Elisama, maye chegoxoguet so nta'alpi ye Judá, nache somaye nnaictague' co'ollaxa so diez ỹalleppi, nache somayepi ntoxonalec da ỹalauat so Gedalías, qataq som Judá le'ecpi, qataq so caldeopi maye itauaatac somaye, huaña ye Mispá. 26Huaña, nache 'enauac se'eso shiỹaxauapi, som ñaq nsoxoppi qataq som ỹa'axaiquipi, lỹatec som lataxala'pi som alleppi, da taỹa ye Egipto da datauec, souaxat da ñe'etega so caldeopi.
So nta'a Joaquín qoỹaxanec
27Qaq huetoigui co'ollaxa so na'a'q veintisiete soua doce ca'agoxoiqa soua treinta y siete vi'iye, da noxonec so Joaquín maye nta'a co'ollaxa ye Judá, nache so Evil Merodac, ỹacoolec da lo'onataxanaxac da nta'a ye Babilonia, qaq co'ollaq ivi' so 'oonolec vi'i da lo'onataxanaxac, nache isouec so Joaquín, nqateeguesop aso ncoñetaxanaxaqui. 28Qaq ỹataqta lauotaxat somaye, nache ỹo'ot da la'amaqchec, napacalec so laỹepi nta'alpi maye ỹalecta'aguet somaye, da hueta'a ye Babilonia. 29Huaña nache so Joaquín, naralaxa't soua alogo, nqa't soua alogo maye ncoñetaxaqui', qataq nache chegoqchiguiña da lquia'axaua naxa so nta'a, 'enauaque naua na'axa'te da nachaalataxac. 30Qataq nache 'enauac de'era nachaalataxac so Joaquín, da so nta'a ye Babilonia, ỹaata'am ana alom ye na'a'q da yaqto' lasheue naqa'en na lhuenecpi somaye.
Currently Selected:
2 Reyes 25: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.