1 Samuel 2
2
Da lo'onec aso Ana
1Qaq aso Ana ỹo'on da lo'onec maye, 'eeta':
«'Am Nataxala', ỹataqta machiguiñi 'anqa'en da iquiyaqteỹaxac,
cha'aye aỹem 'aỹa'anem da dalaxaic ỹa'añaxac.
Qaq nagui aỹem ishet da sapogui na alap nam aỹem ipa'agueetacpi,
cha'aye aỹem 'autauan.
¡Qaq aỹem ỹataqta samachiguiñi!
2¡Qaica ca Qui'itta da 'eeta'am 'Am, Nataxala'!
¡Qaica ca qomi' npaxattaleguete, da 'eeta'am 'am Qanatamnaxala'!
¡Qaica ca lỹa nachaq'amta!
3Qaica qome ca na'amaqten da detaqa,
qaica qome ca ỹagaqnauec da ño'oxonnaxac,
cha'aye nacheñita Ñim Nataxala' ñi ỹaỹaten 'enauacna,
qataq nacheñi ñi naloqna't, qataq nmit na ỹo'otpi ca shiỹaxaua.
4Ñimaye ỹacagaxachigui na lchecnec na 'añaxaicpi,
qataq ỹanem da la'añaxac nam qaica ca la'añaxac.
5Qaq nam sa iueetaique co'ollaxa cam aloq,
qaq nagui qalaq nmeela't da yaqto' ỹanata ca aloq,
Qaq nam huo'o co'ollaxa na lqouaxa,
nagui qalaq qaica ca lqouaxa.
Qaq ana 'alo maye saishet co'ollaxa da deco'o,
nagui qalaq siete da ỹe'eguelaxalec da deco'o,
qaq anam qalota co'ollaxa na llalec,
qaq nagui qalaq taỹañicra.
6Ñim Nataxala' ỹan, qataq nqat da achaalataxac,
qataq saxangui naqa'en aca huachiqui,
qalaxaye nataqa'en ishet da qomi' nqatsheyegue'm.
7Ñim Nataxala' ishet da qomi' choxora'q naqa'en,
qataq da qomi' sallaxanqa,
qataq ishet da souaqañi naqa'en
qataq da qomi' ỹanaxanaxaayishegue'm.
8Ñim Lo'onatac 'Enauacna nachaalataxaañi
cam choxoraq maye huetaiya',
qataq nqateeguesop ca lasoguiñi cam deuenaxaatapigui',
da yaqto' nso'ona'ai' naqa'en na 'amaqtaqaic shiỹaxauapi,
nache ỹanagui cam lo'onataxanaxac maye huo'o da llo'oxoyec,
cha'aye Ñim Nataxala' nacheñi ñim ỹo'o't co'ollaxa soua nlletrañi ana 'alhua,
qaq nache ỹanaleguete da yaqto' na'atchiguiñi naqa'en ana 'alhua.
9Ñim Nataxala' ỹataqta ntela'a da lqauaxac na ỹa'amaqteetac Ñimaye,
qalaxaye nam qauemaicpi qalaq huaigui ca napalaxa da ileu,
cha'aye qaica ca chegoqchigui ca maiche la'añaxac da doxonaxan.
10Ñim Nataxala' ilaxachigui qome na mpa'aguenaxauapi,
nache chegoqo'ot naqa'en na piguem
na nqashelgaxa da talec naqa'en namayepi.
Ñim Nataxala' nmit qome 'enauac nam huetalec ana 'alhua,
qataq ỹanem da la'añaxac ca nta'a maye lca'aguishec,
qataq nquictasheguem naqa'en da la'añaxac.»
11Qaq co'ollaq ime de'era, nache so Elcana ỹe'eguelaxa so lma' ye Ramá. Qaq som nogotolec, qalaq nache no'onañi da yaqto' do'onataxanot Ñim Nataxala', qalaxaye nache ilotague' somaye so ntaxaỹaxanaxanec Elí.
Na qauem ỹo'otpi soua llalqa so Elí
12Qaq soua llalqa so Elí ỹataqta qauem da lataxa'c, qataq qaica ca 'enec naqa'en Ñim Nataxala', 13ivira'a da lo'onataxanaxac na ntaxaỹaxanaxanecpi da yaqto' huapegue' cam 'eetapeguec na shiỹaxauapi. Cha'aye naxa da huo'o na ỹaneuo ana lachetaqtaxanaqte, nache anac ñi 'oonolec na lamaxashecpi soomaye lasoqta'a na la'araxanaxat, qaq naxa da ña qoỹaatapegueuaq na lapat, 14nache ỹa'ayingui naxa ana nhuoshaxaqui. Qaq 'enauac nam lemaxashec, nache taỹot naqa'en so ntaxaỹaxanaxanec. Qaq 'era da 'eetra'ac naxa 'enauac so Israel le'ecpi maye natapegueua'a ye Silo. 15Nataqa'en, naxa da saxanaxa da qaỹavigaxat na lcheta, nache qaltaq nvireuo ñi 'oonolec som lamaxashecpi soomaye, nache 'eetega ñim huotaique da ỹaneuo ana lachetaqtaxanaqte, 'eeta': «Ñaq aỹem 'aỹa'anem cam lapat maye talec ñim ntaxaỹaxanaxanec da yaqto' maiche sauot, cha'aye ñimaye saishet da ỹaconeguet ca lapat da mashe datoxoic, nachaqcata cam ñaq tocchigui.» 16Qaq naxa ñim shiỹaxaua da 'enapec: «Ña 'auata'a da ỹavic na lcheta, cha'aye nachera da lataxac qanqa'en. Ime, nache maiche 'oiqueetac qome ca 'auaconeua'a,» nache so namaxashec, 'eeta': «¡'A'i, nache aỹem 'aỹa'anem nagui! Qaq qom saishet da aỹem 'aỹa'anem, nache seuotaxanec qome.» 17Qaq 'era da 'eetec, da lta'araic lasouaxashe't se'esoua nsoxoye maye ỹauaachiguilo Ñim Nataxala', cha'aye saishet da iyacna'ape ana nachetaqtaxanaqtepi maye qoỹanot naxa Ñim Nataxala'.
18Qaq se'eso nsoqolec Samuel, somaye nache queto'ot da do'onataxaatacot Ñim Nataxala', ỹaatañi naxa so efod maye chegaqaigui na lino. 19Qaq naxa da inoxonec ye vi'i, nache aso late'e taua'a aso atamnaxaqui, nnaictague' so lhua da yaqto' ỹaareuo ana lachetaqtaxanaqte' da inoxonec ye vi'i. Nataqa'en asomaye ỹachetauo naxa na lo'onatac da yaqto' lapo' so nogotolec. 20Nache so Elí ỹanem naxa so Elcana, qataq aso lhua da nqouagaqa', 'eeta': «Ñim Nataxala' 'am ỹanem qome ca laỹe 'aỹa'alaqpi chegoqchigui ara'ara 'alo, nmeneguet naqa'en da llalec maye ỹanot Ñimaye da yaqto' do'onataxanot.» Huaña naxa nache soomaye ỹe'eguelaxara so lma't. 21Nache Ñim Nataxala' ỹanem da lqouagaxanaqtaic aso Ana, qaq ỹoqo'oye asomaye qaltaq hualaxai. Qaq 'era da 'eetec da aso Ana ivi' tres soua llalqa ỹale't, qataq dos soua 'alo. Qaq Ñim Nataxala', nache nquictasheguem naqa'en so nogotolec Samuel maye qoỹanot Ñimaye.
22Qaq so Elí, mashe ỹataqta ỹa'axaiquiolec, qalaxaye ỹaỹaten 'enauac nam ỹo'ottrac soua llalqa maye ỹo'otec so Israel le'ecpi, qataq ỹaỹaten da soomaye lauatrapiguiñi' so 'alpi maye huetague' som ñegueuo so npe'l maye huaña naxa da qanauane' Ñim Lo'onatac 'Enauacna. 23Nache 'enapegalo, 'eeta': «'Enauac na shiỹaxauapi da aỹem da'aqtaxaatapeguem nam qauem maye qauo'ocheetac. ¿Ta'ainco' da nache qoñiita'ac de'era? 24Aicoue, qami' ỹalqolqa, de'era qauo'ocheetac ỹataqta saỹaỹamaxañi, cha'aye saishet da 'onaxaic na ỹa'axattac na nhuo' le'ecpi maye lalamaxatpi Ñim Nataxala' da qami' na'aqtaxaatapiguilo. 25Ca shiỹaxaua da nasouaxata'ai' ca lỹa, nache huo'o nam aloico lo'opi da nmit camaye, qalaxaye ca shiỹaxaua da nacheñi Ñim Nataxala' da hueto'ot ca lasouaxashet, ¿qaq negue't ca iueelec camaye?» Qalaxaye soomaye saishet co'ollaxa da ỹoqochetrega da la'aqtac so lta'a. Qaq ỹoqo'oye Ñim Nataxala' taỹa'a naqa'en da nqat da nachaalataxa'c soomaye.
26Qaq so nogotolec Samuel, nache nquictasheguem da llaxa, qaq Ñim Nataxala' qataq som shiỹaxauapi ỹataqta ỹaỹamaxareeta da lataxac somaye.
Qaỹa'axata'a da nhuaxanague'c soua llalqa so Elí
27So ỹale maye la'aqtaxanaxanec Ñim Lo'onatac 'Enauacna nqo'ona so Elí, nache 'enapega, 'eeta': «Da la'aqtac Ñim Nataxala', 'eeta': 'Am 'auaỹateeta da Aỹem ỹoqta ñachaxana som hua'au 'arhuo', co'ollaq hueta'a ye Egipto da choche ỹo'onataxanaxaatac so faraón. 28Qataq sachegoxottoigui 'enauac na Israel le'ecpi da lleca'aua'a so Aarón da yaqto' itaxaỹaxanaxanec, qataq da ỹaneuo aso nachetaqtaxanaqte maye qaỹavigaxatta, ỹasaxalec aso nca'atoxonaxalate maye ỹalamaqte, qataq da ỹavigaxat na nchenaxanaxat maye ama da laitaỹaxac, qataq da ỹaatañi so ntogue lapoxot le'enaxat efod da Aỹem naua'a. Qataq sanem co'ollaxa so hua'au 'arhuo' 'enauac aso nachetaqtaxanaqtepi maye na Israel le'ecpi ỹavigaxat naxa da Aỹem ỹanot. 29¿Qalaq ta'ainco' da sa qauyacñiỹapec na qoỹaneuo shiguiỹacpi, qataq ana nachetaqtaxanaqtepi maye Aỹem samaxasoxoolec co'ollaxa da Aỹem qandoua'a? ¿Ta'ainco' da 'agaqnauec da llo'oxoyec naua 'aỹa'alqa, nache Aỹem 'auỹotta'a, qataq chaxaraiqa 'anqa'en souaxat da 'auquia'axaategueque 'enauac ana ỹataqta no'on lachetaqtaxanaqtepi na Israel le'ecpi maye ỹalamaxatpi? 30Qaq souaxat de'era, nache Ñim Nataxala' maye Natamnaxala' na Israel le'ecpi, 'am 'enapega 'eeta': Aỹem san co'ollaxa so ỹa'aqtac da 'am qataq na 'aỹa'alaqpi, qataq nam chegoxoguetpi so 'arta'a da nache 'eetai' da Aỹem do'onataxaatacot, qalaxaye nagui 'am shenapega da nache tachiguiña de'era, cha'aye Aỹem sho'oxoren ca Aỹem ỹo'oxoreetac, qataq qaica ca la'amaqchec ñaqa'en cam Aỹem ỹo'otan. 31Qaq mashe saqaỹapeque na na'a'q maye huaigui da imeuo ñaqa'en da 'ara'añaxac, qataq na 'aỹa'alaqpi, qataq na 'am chegoxoguetpi, qaica qome ca ivira'a ñaqa'en da ỹa'axaiqui. 32Nache huo'o qome da 'arquiỹaxa da 'aulota'a da no'on lataxac maye sanem qome na Israel le'ecpi, qaq na 'am chegoxoguetpi qalaq qaica qome ca ivira'a da ỹa'axaiqui. 33Qaq da huo'oi caua ño'onaxatrañi na 'aỹa'alaqpi da huetrague' añi nca'atoxonaxalate maye ỹalamaqte, qaq nachecaua caua naayiñi naqa'en naua 'arache', qataq ỹo'ot da lqui'ic añi 'arquiyaqte, qaq 'enauac na 'am chegoxoguetpi ileu qom saxanaxa da ỹe. 34Qaq 'am sanem de'era la'anaxa't naua dos 'aỹa'alqa, Jofní qataq so Finés da hueraigui qome ca 'oonolec na'a'q da ileu'. 35Qalaxaye aỹem sauo'o qome ca 'oonolec ntaxaỹaxanaxanec maye npe'et, cam ỹataqta ỹo'ot qome ca sheetapeguec, qataq ipacchigui da ỹo'ot ca samaxalecpi, qataq sanem da huo'o ca llalaqpi, qataq qaỹoqtec ñaqa'en da nachaalataxac da do'onataxaatacot ca nta'a maye lleca'aguishec. 36Nache ca 'aỹa'alaqpi maye lca'alaxaicpi, naua'a qome camaye da ỹa'aroto naua l-llecte, nache nachoxoreetacot da chochaq ỹaatem aca anom chegaqaigui na plata, huo'otaq ca laỹolec aca nauole, qataq nachoxoreetot qome camaye, 'eeta': Aỹem 'aỹa'anem taxa ca ỹo'onatac da aỹem ntaxaỹaxanaxanec yaqto' ishet da seque'etac.»
Currently Selected:
1 Samuel 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.