San Lucas 9
9
Jesús yabe penenaminlaca micarisa mantato erenunca
1Junni Jesús chunca paluca yabe penenaminlaca oticato, yalachi mantá cuwanue yape jerale yucanchi ocolaca mansularino podeilaisa. Quiyanpunlacanan manse suwano poden suwanue. 2Junni tsanque jera mantá cuwato, yalaca erenue yape micarin, manse suwan, quilaquisa. Junni ya jichinaminlabe itsantinue:
—Diosi ya mantananun tsachi bolon suwanaeque micarilaquina! tinue. Quiyanpunlacanan manse suwalaquina! tinue. 3Nula micaribi jinato, tinantiya tanjitulajona! Nin tola, tolo, ano, cala, nin paluqui camisa tanjitulajona! tinue. 4Manca yabiri féto, junbisiri chularana! jun pueblobi nechi manlono fecári. 5Junni pansile manca pueblobi nulaca facarituchi latinari, yalaca telaqueponilaquina! Junsi nulari junbi nechi lonato, to poyo nedebi midicaca jera manpiquisito manjilaina! Junbi chuminlaca seiton jolajoe tito, to poyoca piquisilaquina! tinue.
6Jesús tsantinunsi, yabe penenaminla ara cura jera jilainue. Diosichi sen fiquica micarito, quiyanpunlaca manse suwato, jera jilainue.
Herodes Jesuca quirachi tinunca
7Junnasa miya Herodes jera meránue Jesús niyan quinanunca. Junni junca merátonan, mo tsachi jonunca miino podeitunue. Weyanla patori, Jesuca Mumunmin Juan jonhoe latinue. Pansile yanan puyaca jominnan mansonhica jonhoe latinue. 8Weyanla mantimini matu to Diosichi mantate pamin tsachi mansonhica jonhoe latinue. Weyan weyanlari tsan jonhoe tito, matu to Elías jonhoe latinue.
9Junni Herodes junca meráto itsantinue:
—Lari Juanca misu butunsa caricayoe tinue. Junni ¿Jesuri mo jonhoncan? tinue. Yaca duque wepanantsancari fiquica meranayoe tinue.
Junto Herodes Jesuca quirachi tinaminue.
Jesús mante mili tsachilachi ano cufinunca
10Junni aman Jesús mantato ereca junlari manjalainue. Manjato, yabe cuenta jera manquilaquinue titiya jera quinunca. Junni Jesús yalaca tanjinan, niyanlanantiya chutunun postoca jilainue Betsaida pueblo quelote. 11Junni tsachila junca miito, yalanan benechi jalainue. Aman Jesús yalaca facarito micarinue Diosi ya mantananun tsachi bolon niyan jono jonunca. Quiyanpunlaca manse suwanue. 12Junni quebi inasa chunca paluca Jesube penenaminlari yachica jato, itsantilatinue:
—Inte niyanlanantiya chutunun posto joe. Tsachilari catsonoca, ano finoca neyanola joe latinue. Junni yalaca manherede! latinue yape quelole puebloca, o quelole yaca manjilaisa.
13Junni Jesús itsantinue:
—Nulari yalachi ano cufilaquede! tinue.
Junni junca wepanato meráto itsanlatinue:
—Ano itolajoyoe latinue. Manteca biburi, paluca watsari talarayoe latinue. ¿O jeralelachi ano cufichun calachi cabi jinola joichunancan? latinue.
14Aman duque tsachila junte raminlanue. Unilalacasiri minan, mante mili tsansi jominlanue. Junni Jesús yachi tsachilabe itsantinue:
—Jerale inte ramin tsachilaca bolon cura chutelaquede! tinue. Man bolonbiri mante chunca tsansi chutelaquede! tinue.
15Junni tsantinunsi, Jesube penenaminlari jerale tsachilaca tsanque chutelaquinue. 16Junni chudica josa, Jesús manteca bibuca, junsi paluca watsaca cato, jamochi quirato, Diosibe acradeseinue. Diosibe acradeseitobi, aman bibube watsabeca pisuleto, yabe penenaminlachi cuwanue yape junte chumin tsachilachi cuwalaquisa. 17Jeralela peleicari filaquinue. Junni aman puchuicaca manlayato, chunca palu tsalabi tuwale manlayalaquinue.
Pedro Jesuca Cristo joe tinunca
18Junni Jesús man mate chicanle Diosibe rocainaminue. Yachi tsachila quelole chuminlanue. Junni yalabe itsantinue:
—¿Tsachilari laca mo jonhoe latinan? tinue.
19Junni Jesuchi tsachilanan itsanlatinue:
—Weyanlari nuca Mumunmin Juan jonhoe latinae latinue. Aman junsi weyanlari nuca matu to Elías jonhoe latinae latinue. Junsi weyanlari nuca manca matute Diosichi mantate pamin tsachi mansonhica jonhoe latinae latinue.
20Junni Jesuri yalabe manpanhato, itsantinue:
—¿Junni aman nulari laca mo jonhoe latiyun? tinue.
Jesús panunsile Pedro itsantinue:
—Nuri Diosi wenteca jun Cristo tinun tsachi joe tinue.
21Junni Jesús yalaca mantanue yaca Cristo joeque mobenantiya capatusa. 22Junto aman itsantinue:
—Aman la tsachi ica jun joto, duque padeseino joyoe tinue. Aman mantá tan unicalabe, mantá tan patelelabe, mantaca micariminlabe, jera layaito, laca seitoe tito totesa carilaquichunae tinue. Aman la peman ma puyaca joto mansonhiichunae tinue.
23Jesús tsantito, jeralelabe itsantinue:
—Labe penenachi timinlari tenca munate nenanoca telaqueponola jochunae tinue. Corosibi puyano jun tsachi cuwenta jera telaquepoto, labesiri ma cura penenanola jochunae tinue. 24Yalachi tenca munatenan pansi chuchique tenfeminlari jera piyarito puyanilaichunae tinue. Juntonan tsanque pansi chunoca lachi tenchi telaquepominlari numatotiya Diosibe chuto polelaichunae. 25Juntonan tsachi manca piyanle toca tsacumin jominnan puyanari, ¿tichi mica jochunan?
26Junni amana mate weyan tsachilari lachi tsachi joyoe tino lu tilatichunae. Lachi fiqui tenchinan amana lu tilatichunae. Junni manca mate la tsachi ica jun joto manpatanae tinue. La manpatano mate labe lachi Apa Diosibe yachi anjelilabe jeralela uraran tsente jolajoanae. Junni jun mate lanan lu tiyanae tinue. La tenchi lu timin jominlacanan lachi tsachila jolajoe tino manlu tiyanae tinue. 27La nulabe tsarasica pachinayoe tinue: Nula weyan weyanla inte wiruraminla Diosi mantananunca quirano fecári puyalaituchunae tinue.
Jesús uyan quiran inunca
28Junni ochu ma tsansi poletobi, Jesús dubi lonue Pédrobe Juanbe Jacóbobeca tanjito. Diosibe rocaibi lonue. 29Junto Diosibe rocainato, yachi caforo uyan quiran inue. Yachi camisari fibaquin fibaquin tse quiniquimin inue. 30-31Junnasa quiranari paluca matu to tsachila quirailainue Moisés manca, Elías manca. Yalanan duque tsen joto, Jesube cuenta quinaminlanue Jesús Jerusalenbi puyano joeque.
32Junni aman Pédrolachi duque capiya janasanan, catsolaitunue. Junni Jesús tseinanunca quiralaquinue. Paluca Jesube raminlacanan quiralaquinue. 33Junni ya paluca tsachila Jesúchite nechi manjilainasanan, Pedro paniquinue. Tenca catuminnan pato itsantinue:
—Miya, chiquilari in dubi rano duque se joe. Junni pemanca jelen ya quintsan joe tinue nuchi manca, Moisechi manca, Elíachi manca.
34Junni Pedro tsanque cuenta quinasa, poyo jato yalaca donue. Junni yalaca poyo donunsi, jele tilatinue. 35Aman poyobi nechi fiqui itsanque meralaquinue:
—In lachi laquiranun Nao joe tinue. Junni yaca meralaquina! tinue.
36Junni aman tsanque cuenta quinunsi, Jesuri manpurainue. Moisebe Elíabe piyapolenilainue. Aman junca quiraminlari mobenantiya cuenta polarilaquitunue numari ma fecári.
Ataque imin náca Jesús manse suwanunca
37Ayuna nanchi Jesula dubi nechi manpatanasa, duque tsachila yaca tulaibi jalainanue. 38Junni yala manca, sonba pato itsantinue:
—Nu Diosichi fiquica micarimin joto, lachi naoca nasi manse suwade! Ya lachi mancari nao joe. 39Yucanchi oco yaca cato, moorari atisa carimin joe tinue. Yaca enpo casa carito, fiqui forochi nechi pupu larisa carimin joe. Yaca fuda suwato, telatuchi timin joe tinue. 40Aman lari nube penenaminlaberi duque rocaiyoe tinue yape yucanchi ococa mansularito cuwasa. Junni yalari podeilaitue tinue.
41Junni Jesús yaca meráto, itsantinue:
—Amana mate tsachila Diosica quereitumin seiton tsachila jolajoe tinue. ¿Numasi fecári nulabe penenano joichunan? ¿Numasi fecári nulaca wantaino joichunan? tinue.
Junni Jesús tsantisi, ataque imin náca tanjasa tinue. 42Aman naoca tanjananunca yucanchi oco queereisa carito ataque isa carinue. Junni aman Jesús yucanchi ococa sonba mantanue nachibi nechi manlosa. Junto ya náca tsanque manseto, yachi apachi mancuwanue. 43Junni jeralela junca quirato wepanalainue Diosi tsanque sonba se quimin jonunca.
Jesús puyano joyoe tinunca
Junni Jesús ticatiya jera seque quinanunca jeralela wepananaminlanue. Aman tsachila wepanato cuenta quilaquinasa, Jesús yabe penenaminlabe itsantinue:
44—Nula in fiquica tsarasica meralaquinade! tinue. La tsachi ica jun joto puyano joyoe tinue. Tsachi manca laca cuwapochunae tinue yape laca totelaquisa.
45Jesuchi tsachila mantimini jun fiquica tuilaitunue. Diosi yalaca camiisa caritunue. Junni yalanan jun fiquica Jesube manpanhano jeleraminlanue.
Mo fe mantá tan junhunque tenpanunca
46Junni Jesube penenaminlari cuenta quinaminlanue yala tala mo fe mantá tan jonunca. 47Junni Jesús miinue yala tsanque tenca calaquinanunca. Miito, na mancaca quelole jasa carito 48yalabe itsantinue:
—Itsan nalalaca la tenchi seque quiminlari lacanan seque quiminla cuwenta jolajochunae tinue. Junsi laca seque quiminla laca eremincanan seque quiminla cuwenta jolajochunae tinue. Nula tala peyun cuwenta iminla, yalari mantá tan jolajochunae tinue.
49Junni Juan itsantinue:
—Miya, tsachi manca yucanchi ocolaca mansularinaminca quiralaquiyoe tinue. Nuchi mantate yucanchi ocolaca mansularinaminhe. Aman yari chiquilabe penenamin itonan, yaca tsantusa tilatiyoe tinue.
50Jesús mantimini yaca tsantitulajona! tinue. Chiquilachi contra itominla chiquilachi parte jolajoe tinue.
Jesúlaca pocatuchi timinla
51Junni Jesuri jamochi manlono ma quelo inasa, Jerusalenca jinonan joyoe tinue. 52Junni jinaminnan tsachilaca caquenan erenue yape pueblobi wito tile catsontsan jonunca neyalaquinasa. Ya pueblori Samaria tobi jominue. 53Junni jun pueblobi chumin tsachila jera meralaquinue Jesula Jerusalenca jilainaeque. Junni junca meráto, israelítala jolajoeque tenhito, junto israelítalaca pa joto, yalachi pueblobi pocatulajonue. 54Pocatulajonan, Jesube penenaminla paluca itsanlatinue:
—Miya, matu to Elías Diosibe rocainue jamochi nechi ninca ereto seitonlaca jera nin posa. ¿Chiquilanan in seiton Samaria tsachilaca jun tsannan quintsan jotun? latinue.
Jacóbobe Juanbe tsantilatinue. 55Junni Jesús yalaca quirato, itsantinue:
—Te, tsanlaquitude! Nulari tenhituto yucanchi mite palaquinae tinue. 56Lari tsachi ica jun joto, tsachilaca totebi jatucayoe tinue. Tsachilaca se laribi jacayoe tinue.
Junni tsantitobi, uyan puebloca jito polelainue.
Jesube penenachi timinla
57Aman minute jilainato, tsachi manca Jesube itsantinue:
—Nube penenamin ino muquee tinue. Nunchitiya nube pejinoyoe tinue.
58Junni Jesuri beco manpato itsantinue:
—Soronantiya foro tanmanhe catsochun. Pichunan tasen tamanhe. La mantimini tsachi ica jun joto, tilenantiya chuno itoyoe. Junni labe penenamin ino muquinari, casale duque tenca cano joe tinue.
59Tsantitobi, manca tsachica labe penenana! tinue. Junni ya tsachiri itsantinue:
—Miya, casale lachi apachica manjino joyoe tinue. Lachi apa puyanan menalaquetobi, lari nube penenabi manjanae tinue.
60Jesús mantimini ya tsachibe itsantinue:
—Yala puyaca cuwenta joto, yala tala menailaichunae. Nuri junca tennatuto, Diosi ya mantananun tsachi bolon suwanaeque micaribi jina! tinue.
61Tsantinunsi, manca tsachi itsantinue:
—Miya, lachi nube penenano muquee. Tsan josanan, casale manjino joyoe tinue yabi chuminlabe pansile manquiracaichunae tibi.
62Jesunan itsantinue:
—Labe penenachi titori, juncasiri seque tenca cato nenantsan joe. Palaque tenca tanla Diosi mantananun tsachi bolonbi pewino michi sen itolajochunae tinue.
Currently Selected:
San Lucas 9: cof
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.