Johanes 9
9
Jesus heelt eenen blintjebuarnen
1Aus Jesus vebie jinkj, sach hee eenen Maun, dee blint jebuaren wia. 2Siene Jinja fruagen am: Liera, wäa haft jesindicht, dis Maun ooda siene Elren, daut hee blint jebuaren es? #Luk 13,2 3Jesus säd: Dee Maun es nich doavon blint, daut hee ooda siene Elren jesindicht haben, oba doawäajen, daut Gott siene Woakjen aun am verendach komen sullen. #Joh 11,4 4Soolang aus daut noch äwadach es, mott wie däm siene Woakjen verechten, dee mie jeschekjt haft. Eene Nacht woat komen, wan kjeena woat oabeiden kjennen. #Jer 13,16; Joh 5,17 5Soolang aus ekj en dise Welt sie, sie ekj daut Licht fa dise Welt. #Joh 8,12; 12,35 6Aus hee dit jesajcht haud, spieech hee opp de Ieed un rieed een Schmäasel en, un läd daut opp de Uagen vom blinjen. #Mrk 8,23 7Un hee säd to am: Go nom Siloa Wota un wausch die doabennen! (Siloa meent, jeschekjt sennen). De Maun jinkj un wosch sikj, un kjeem trigj un kunn seenen. 8Siene Nobasch un dee, dee am verhäa hauden prachren seenen, fruagen dan: Es dit nich dee Maun, dee doa jeweenlich saut un prachad? 9Eenje meenden, daut hee dee wia. Aundre säden: Nä, dee likjent däm mau bloos. Hee selfst oba säd: Ekj sie dee. 10Dan säden see to am: Woo sent die de Uagen opjegonen? 11Hee säd to an: Een Maun, dän see Jesus nanen, muak een Schmäasel un läd mie daut opp de Uagen un säd to mie, ekj sull nom Siloa Wota gonen un mie wauschen. Ekj jinkj un wosch mie, un dan kunn ekj seenen. 12Dan fruagen see am: Wua es dee Maun? Hee säd: Ekj weet nich.
De Farisäa forschen dän Jeheelden ut
13Dan brochten see dän, dee ieescht blint jewast wia, no de Farisäa. 14Daut wia aum Sabat, aus Jesus daut Schmäasel enrieed un däm Maun de Uagen opmuak. 15De Farisäa fruagen am, woo hee doatoo jekomen wia, daut hee seenen kunn. Hee säd to an: Hee läd mie Blott opp de Uagen, ekj wosch mie, un ekj kaun seenen. 16Eenje Farisäa säden: Dis Maun es nich von Gott, wiels hee helt nich dän Sabat. Aundre säden: Woo kaun een Sinda soo een Wundatieekjen doonen? Dan jeef daut doaräwa eene Spoolunk mank an. 17Dan säden see noch eemol to däm blinjen Maun: Waut hast du von däm to sajen, dee die de Uagen opjemoakt haft? Hee säd: Daut es een Profeet.
18De Juden jleewden daut noch nich, daut hee wia blint jewast un nu seenen kunn, bat see dän Maun siene Elren komen leeten. 19See fruagen an: Es dit jun Sän, von däm jie sajen, daut dee blint jebuaren wia? Un woo kjemt daut, daut hee nu seenen kaun? 20De Elren säden: Wie weeten, daut dit ons Sän es, un wie weeten uk, daut hee blint jebuaren wort. 21Oba woo daut kjemt, daut hee nu seenen kaun, ooda wäa am de Uagen opjemoakt haft, weet wie nich. Froacht am, hee es oolt jenuach, lot am fa sikj selfst räden. 22Siene Elren säden soo, wiels see sikj ver de Juden ferchten deeden. De Juden wieren sikj aul doaropp eenich jeworden, daut see jiedrem, dee Jesus aus dän Christus aunerkjand, ut äare Judenschool rutsteeten wudden. #Joh 7,13; 12,42 23Daut es wuarom siene Elren säden: Hee es oolt jenuach, froacht am.
24See leeten dän Maun, dee blint jewast wia, toom tweeden mol komen, un säden to am: Jeff Gott de Iea! Wie weeten, daut dis Maun een Sinda es. 25Hee säd: Auf hee een Sinda es ooda nich, weet ekj nich. Oba eent weet ekj: Ekj wia blint un kaun nu seenen. 26Dan fruagen see am: Waut deed hee aun die? Woo muak hee die de Uagen op? 27Hee säd: Ekj säd junt daut aul een mol, un jie horchten nich! Wuarom well jie daut noch eemol hieren? Well jie uk siene Jinja woaren? 28Dan schempten see äwa am un säden: Du best sien Jinja. Wie sent Moses siene Jinja. 29Wie weeten, daut Gott to Moses jerät haft. Oba wäajen disem, wie weeten nich eemol, wua dee häa kjemt. 30De Maun säd: Daut es doch oppfaulent. Hee haft mie de Uagen opjemoakt, un jie weeten nich, wua dee häa kjemt. 31Wie weeten, daut Gott nich opp Sinda horcht. Hee horcht no soone, dee gottesferchtich sent un sienen Wellen doonen. #Psa 66,18; Spr 15,29; Jes 1,15 32Noch haft niemols wäa jehieet, daut eenem blintjebuarnen sent de Uagen opjemoakt worden. 33Wan dis Maun nich von Gott wia, kunn dee uk nuscht doonen. 34Doatoo säden see: Du best gaunz en Sinden jebuaren, un west ons belieren? Un see staden am rut.
Jeistliche Blintheit
35Jesus kjrieech daut to hieren, daut see am rutjestat hauden. Un aus hee am funk, fruach hee am: Jleefst du aun dän Menschensän? #9,35 Eenje oole Schreften sajen Jleefst du aun dän Gottessän? 36De Maun fruach: Har, wäa es dee? Saj mie daut, daut ekj aun am jleewen kaun. 37Jesus säd: Du hast am jeseenen, un dee, dee hia met die rät, daut es dee. #Joh 4,26 38Dan säd de Maun: Har, ekj jleew, un hee bäd am aun.
39Jesus säd to am: Ekj sie aus Rechta en dise Welt jekomen, daut de blinje seenent woaren, un de seenende blint woaren. #Mat 13,11-15 40Eenje von de Farisäa, dee bie am wieren, hieeden am dit sajen un fruagen: Waut? Sent wie uk blint? 41Jesus säd: Wan jie blint wieren, wudd jie nich schuldich sennen. Oba nu daut jie väajäwen, seenen to kjennen, blift june Schult. #Joh 15,22
Currently Selected:
Johanes 9: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.