Johanes 16
16
Waut de Heilja Jeist doonen woat
1Ekj hab junt dit aula jesajcht, daut jie nich vom Gloowen erren sellen. 2See woaren ut june Judenschoolen utjeschloten woaren. Un doa woat eene Tiet komen, daut see meenen, see doonen Gott eenen Deenst, wan see junt doot moaken. #Mat 10,17.22; 24,9 3Un daut woaren see doonen, wiels see nich mienen Voda kjanen un uk nich mie. #Joh 15,21
4Oba ekj hab junt dit jesajcht, daut wan dee Tiet kjemt, daut jie dan doaraun denkjen, daut ekj junt daut jesajcht hab. Aum Aunfank säd ekj junt dit noch nich, wiels ekj don noch bie junt wia.
5Nu oba go ekj trigj no däm, dee mie jeschekjt haft. Un kjeena von junt frajcht mie: Wua jeist du han? 6Wiels ekj junt dit jesajcht hab, es jun Hoat truarich jeworden. 7Oba ekj saj junt de Woarheit: Fa junt es daut goot, daut ekj wajchgo. Wiels wan ekj nich wajchgo, kjemt de Treesta nich no junt. Wan ekj oba go, woa ekj junt dän schekjen. #Joh 14,16.26 8Un wan dee komen woat, woat hee de Welt de Uagen opmoaken #16,8 Eenje oole Schreften sajen woat hee de Welt stroffalich hoolen. äwa waut Sind es un äwa waut Jerajchtichkjeit es un äwa waut Jerecht es. 9Äwa waut Sind es: Daut see nich aun mie jleewen. #Joh 15,22.24 10Äwa waut Jerajchtichkjeit es: Daut ekj nom Voda go un jie mie nich mea seenen woaren. #Apost 5,31; Reema 4,25 11Äwa waut Jerecht es: Daut dee, dee äwa dise Welt Jewault eewen deit, jerecht worden es. #Joh 12,31
12Ekj hab junt noch väl to sajen, oba jie kjennen daut nu nich vedroagen. #1Kor 3,1 13Oba wan de Jeist, dee Woarheit es, komen woat, dee woat junt de volle Woarheit lieren. Hee woat nich von sikj selfst räden. Hee woat bloos daut räden, waut hee jehieet haft, un woat junt sajen, waut noch komen saul. 14Hee woat mie veharlichen. Hee woat vom mienjen nämen, un junt daut sajen un dietlich moaken. 15Aules waut de Voda haft, es uk mient. Doawäajen säd ekj: Hee woat daut vom mienjen nämen un junt daut sajen. #Joh 3,35; 17,10
Aufscheet un wadaseenen
16Om eene korte Tiet woa jie mie nich seenen, un wada om eene korte Tiet woa jie mie seenen, wiels ekj nom Voda go. #Joh 14,19 17Dan säden eenje von siene Jinja bie sikj: Waut meent hee doamet, wan hee sajcht: Jie woaren mie om eene korte Tiet nich seenen, un wada om eene korte Tiet woa jie mie seenen, un uk: Wiels ekj nom Voda go? 18Doawäajen säden see: Waut meent hee met eene korte Tiet? Wie weeten nich, waut hee ons sajen well. 19Jesus wist, daut see am jieren froagen wullen, un dan säd hee to an: Froag jie junt unjarenaunda, waut ekj doamet meend, wan ekj säd: Jie woaren mie om eene korte Tiet nich seenen, un wada om eene korte Tiet woa jie mie seenen? 20Ekj saj junt de Woarheit: Jie woaren hielen un jaumarieren wäarent de Welt sikj freien woat. Jie woaren truaren, oba jun truarich sennen saul sikj omendren toom sikj freien. #Mrk 16,10 21Wan eene Fru een Kjint to Welt brinjt, es see bekjemmat, wiels äare Tiet es jekomen. Oba wan daut Kjint ieescht jebuaren es, es de Freid, daut see een Kjint to Welt jebrocht haft soo groot, daut see von aul äaren Trua vejat. #Jes 26,17 22Doawäajen sent jie nu uk truarich. Oba ekj woa junt wada seenen, un dan woa jie junt von Hoaten freien, un dee Freid saul junt kjeena wajchnämen. 23Wan dee Dach kjemt, woa jie mie no nuscht mea froagen. Ekj saj junt de Woarheit: Mien Voda woat junt aules jäwen om waut jie en mienen Nomen froagen. #Joh 14,13-14 24Bat nu hab jie om nuscht en mienen Nomen jefroacht. Froacht, un jie woaren kjrieen, daut junt daut aun kjeene Freid fält. #Joh 15,11
De Siech äwa dise Welt
25Ekj hab Bildasproak jebrukt, junt dit to sajen. Oba de Tiet kjemt, daut ekj nich mea en Bildasproak to junt räden woa, oba junt daut direkjt un kloa von mienem Voda vetalen woa. 26Wan dee Dach kjemt, woa jie en mienen Nomen froagen. Un ekj saj nich, daut ekj dän Voda en june Städ froagen woa. 27De Voda selfst es junt goot. Hee es junt goot, wiels jie mie goot sent un jleewen, daut ekj von Gott jekomen sie. #Joh 14,21 28Ekj kjeem vom Voda un sie en dise Welt nenjekomen, un woa dise Welt wada veloten un trigj nom Voda gonen.
29Siene Jinja säden to am: Nu see wie, daut du frie rut to ons rätst un nich mea Bildasproak brukst. 30Nu see wie, daut du aules weetst, un nich needich hast, daut die wäa waut frajcht. Doawäajen jleew wie, daut du von Gott jekomen best. 31Jesus fruach an: Jleew jie dan nu? 32De Tiet kjemt, un es aul hia, daut jie woaren vestreit woaren, een jiedra fa sikj, un woaren mie auleen loten. Oba ekj sie nich auleen, de Voda es bie mie. #Sach 13,7; Mat 26,31 33Dit hab ekj junt aula doawäajen jesajcht, daut jie en mie Fräd haben. En dise Welt hab jie Angst, oba siet jetroost, ekj hab jäajen dise Welt jewonnen. #Joh 14,27; Reema 5,1; 1Joh 5,4
Currently Selected:
Johanes 16: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.