Jeremia 1
1
1Dit es daut Buak von daut, waut Jeremia säd. Jeremia wia Hilkija sien Sän, von de Priesta en Anatot, en daut Launt Benjamin. #5Mo 33,12; Jos 21,18; Jer 11,21 2En daut 13. Joa daut Josia, Amon sien Sän, Kjennich en Juda wia, kjrieech Jeremia eene Norecht vom Harn, #2Kjen 21,24; 22,1 3un dan uk mieremol soo, en de Joaren aus Jojakim, Josia sien Sän, Kjennich wia, un bat en de 5. Moonat von daut 11. Joa daut Zedekia, Josia sien Sän, Kjennich en Juda wia. Daut wia de Moonat aus Jerusalem enjenomen wort un de Menschen veschlapt worden. #2Kjen 23,34; 24,17; 25,2-21; Jer 39,9
Woo Jeremia een Profeet wort
4Mie wort daut kloa, waut de Har säd:
5Aul ea ekj die waut en diene Mutta äa Lief sennen leet,
haud ekj mie die jewält;
aul ea du jebuaren wieescht,
haud ekj eenen besondren Plon fa die;
don aul, wull ekj haben,
daut du wäajen de Velkja profezeien sust. #Jes 49,1; Gal 1,15
6Un ekj säd:
Oba Har Gott,
ekj sie nich toom räden to brucken;
ekj sie noch mau bloos een Jung. #2Mo 4,10; Jes 6,5-7
7Un de Har säd to mie:
Saj nich, daut du noch mau bloos een Jung best.
Du saust doahan gonen, wua ekj die han schekj;
un du saust de Menschen daut sajen, waut ekj die oppjäw to sajen.
8Lot die nich enjsten von an.
Ekj woa bie die sennen un die raden,
sajcht de Har. #2Mo 3,12
9Dan rieekjt de Har met siene Haunt no mie, un schieed mien Mul aun. Un hee säd: Horch emol, ekj jäw die de Wieed, dee du räden saust. #2Mo 4,12
10Horch emol, ekj stal die vondoag
äwa Velkja un äwa Kjennichrikjs,
toom utrieten un dolrieten,
toom vestieren un vedoawen,
toom oppbuen un toom plaunten. #Jer 18,7-10
11De Har säd to mie: Jeremia, waut sitst du doa? Un ekj säd: Ekj see eenen Aust, opp eenen Maundelboom. 12Un de Har säd: Du hast rajcht jeseenen; ekj paust opp, daut ekj mien Wuat hool.
13Un de Har säd een aundretmol to mie: Waut sitst du doa? Un ekj säd: Ekj see eenen Kjätel em Nuaden, dee doa äwakoakt. Daut lat, aus wan dee kunn hiahan äwastelpen. 14Un hee säd to mie: Daut Onheil woat vom Nuaden loosbräakjen un äwa aule Menschen en dit Launt komen. #Jer 4,6; 6,1.22; 10,22; 25,9; 50,41 15Horch emol häa. Ekj woa aule Velkja vom Nuaden häaroopen, sajcht de Har, daut see komen woaren un äare Troons jrod buta de Puaten von Jerusalem saten, un äare Mana runtom de Staut, jäajen de Stautswaunt stalen, un uk rom aul de aundre Städa en Juda. 16Un ekj woa mien Jerecht äwa an jäwen, fa aul daut beese waut see jedonen haben. See haben mie veloten, un haben fa aundre Jetta Opfa jemoakt, un haben daut jedeent, waut see selfst jemoakt haben. 17Jeremia, moak die reed un go un saj an aules waut ekj die oppjäw. Lot die nich von an enjsten, daut ekj die nich ver an enjsten bruck. 18Ekj moak die vondoag soo stoakj ver de Kjennichs un de Volkjsleida en Juda, un ver de Priesta un daut Volkj em Launt, aus eene Staut met stoakje Mieren un een iesana Post un een blajchna Tun. #Jer 15,20; Hes 3,8-9 19See woaren jäajen die komen, oba dee woaren die nich unjakjrieen, wiels ekj met die sie, sajcht de Har, un woa die doa ruthalpen.
Currently Selected:
Jeremia 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.