Habakuk 1
1
Woo schlemm daut es
1Dit es de Norecht von Gott dee däm Profeet Habakuk jewäsen wort.
2 Har, woo lang saul ekj roopen no diene Help,
un du horchst doa nich no?
Woo lang saul ekj schrieen,
“De Jewault haft de äwahaunt!”
un du kjemst nich halpen?
3Wuarom moakst du mie oppmoakjsom
opp daut waut orrajcht es,
un du kjikjst daut too?
Ver eenem woat doljebroaken un Jewault jebrukt;
Menschen zanken un strieden sikj.
4Daut Jesaz woat soo jemoakt,
daut et nich enfoten kaun,
un de Mensch woat nich ver Jerecht jebrocht.
De gottloosa nemt sikj daut rajcht von däm jerajchten,
un daut Jerecht es gaunz vedreit.
De Har sajcht hee woat enfoten
5Kjikjt emol no de Velkja.
Jie woaren junt wundren motten.
Ekj woa en june Tiet waut doonen,
waut jie knaup jleewen wudden
wan junt daut jesajcht wort. #Apost 13,41
6Horcht emol, ekj woa de Chaldäa oppwakjen,
daut Volkj waut soo groff un soo haustich waut doonen kaun.
Dee gonen irjent wua han oppe Ieed
un nämen de Städa en, dee an nich jehieeden.
7Dee sent grausom un schrakjlich.
Dee velangen un bedwinjen krakjt waut an jankat.
8Äare Pieed ranen stoakja aus de Tiegasch,
un an es dolla to ferchten aus de Wulf aum Owent.
Äare Pieed traumplen un de Rittasch komen von wiet jefloagen,
soo aus een Odla no daut, waut hee fräten well. #Zef 3,3
9Dee sent aula ut no Jewault driewen.
Aus een Storm rosen dee no väaren wajch;
see nämen Menschen faust
soo aus eena Saunt oppropen wudd.
10See spotten äwa Kjennichs,
un lachen äwa de Volkjsleida.
Jieda Schutz, waut Menschen sikj oppbuen,
moakt an Spos.
See schedden Ieed jäajen de Stauts Mia
un nämen de Städa runtom en.
11Un dan foaren see wieda soo aus de Wint,
eendoont woo schuldich see sent,
un moaken eenen Gott von äare ieejne Krauft.
Woo schlemm see behaundelt woaren
12Oba du, Har, mien Gott,
mien Heilja, dee du von Eewichkjeit häa best,
lot ons nich omkomen.
Muchten see, Har, ons bloos strofen,
un lot an ons bloos een wesset toosaten,
dee du ons Schutz best. #Jer 10,24
13Diene Uagen sent too rein,
daut du beeset oppe Lenjd aunseenen kaust.
Woo kaust du dit lieden tochloten?
Wuarom kjikjst du too, wan orrajcht jedonen woat,
un blifst stell wan de gottloose de jerajchte utnutzen?
14Du latst de Menschen aus de Fesch em Mäa sennen,
un soo aus de Warm, dee kjeenen Harn haben.
15De Fient hoakt aules en de Angel opp,
un soo nemt hee sikj daut;
hee jript daut em Nat
un helt daut met Strenj.
Daut joakelt an, un see freien sikj.
16Doawäajen moaken see een Opfa fa äa Nat,
un brennen Weiruak fa äare Strenj.
Dise haben an een groosoatjet Läwen jejäft,
un see äten sea rikjlich.
17Woat hee opp emma von sien Nat läwen kjennen
un Velkja ombrinjen onen Schomp?
Currently Selected:
Habakuk 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.