Jer 8
8
1Chi Qman Dyos: Tojtzu'n tq'ijlalil lu che b'je'letz q'i'n kyb'aqilju' nimaqkawil ex nejenel toj Juda, toj kymuqb'il, ex kyb'aqil pale, sanjelal exqe' ẍe najan toj Jerusalen, 2che kjel woqb'a'ntzuntz toj q'ij, toj tqan xjaw ex che'w, kywitzu' ekyk'u'jla, e'ajb'en kye, exilpe kyi'j, exjelun ex ek'ulun kye. Mix-a'lo' kjawil iq'inkye tu'n kyku'x mqu'n. Che kjelten twitz, naku'j tz'is. 3Aye'tzu'n che kjel anq'in kyxolju' xjal myab'a'n qe' lu, jaxjaku'tzun mache'xa' nsputi'ne', a kkyachu' tu'n kykyim, mya tu'n kyanq'in. Ayine' Dyos Manb'aj te tkyaqil ipumalj nchin q'mante.
Tz'e'ysb'il kywitz aj Israel tu'nju' e'jaw miltz'uj ti'j Qman Dyos
4Jeremiy, q'manxju'ya tqanil lu wu'ne' teju' tnam:
Qa ati jun nkub' tz'aq, in jawe'tl;
qama tz'el txalalan ti'ju' b'e, in pon jumajtl toj.
5Atzunta, Israel, ¿tiqu'n xjawa' miltz'uja wi'je'?
¿Tiqu'n majx machin kyej tkolb'i'na?
¿Titiqu'n inxi'x kub' tpi'sa'ntib'a
ex min tajb'ila tu'n tanjtzti'ja?
6Matxi' chin kub' tene' b'ilkyeye'
ex mix-a'loxi'te nb'iye'
inwt anjtzti'j tanmi
tu'nwt tmante axxi'x:
¿ti'tzu'n matxi' nb'inchaye'? chiwt.
Kykyaqile' qo'ya kyele' toju' kyb'eye'
kse'nqe' chej mixti' juk'b'ilkye ojqel kyel xi'kyxi' toj q'oj.
7Naqpena'te' pich' siwenya nlik'ik'inje twitz kya'j
b'i'n tu'n jtoj tz'anjtzti'j.
Exqe' jun ch'ix paloms, kolondrin ex kruy
b'i'n kyu'n jtoj che'x toj juntl tenb'il.
Aye'tzunkye', ntaname',
min kyojtzqi'n qe'ye' nkawb'ile'.
8¿Se'n taq'wi tu'n kymanteye' qa ati kynab'le'
exqa ati nkawb'ile' kuky'i'le' ayine' Dyos Manb'aj?
¡Matxina' ku'x kychuku'n ajtz'ib'al,
tu'n tz'ib'b'il chajyolil!
9K'elil kych'ixawju' xjal ati knab'l lu,
kb'elkyi'j, kse'n txkup ajkykub' toj xpatxab'.
¿Jatzunta' kynab'l,
matxina' tz'elkyik'o'nju' nyole'?
10Qu'mtzun che kxe'l nq'o'ne' kyxu'jil kye txqantl ichan,
ex kxe'lu' kytx'otx' kye txqantl xjal.
Qu'n kykyaqilx, e'nimaq ex k'ok'e',
o'kxtzu' nche ximana' ti'j q'inumal myab'a'n kanb'ab'ente;
kykyaqilju' sanjelal ex pale
nche sb'un.
11Naq nkyq'a'na'n tk'ixb'len ntaname' ti'jxi';
inkyma'n qa tkyaqil b'a'nile,
extzun mixyab'a'n
12¡Inwtlo kub' kych'ixwe'n
ti'xti' nkyb'incha'n lu inel wik'u'ne'!
Aye'tzunkye, ¡mixpeti'x nkyna'n tu'n kych'ixwi!
Mitzunloyate' tu'n tkub' kych'ixwe'n.
Qu'mtzun ajtkub' ntz'e'ysa'ne' kywitz,
che takpujel ex che kb'eltz'aq kse'nqe' txqantl.
Ayine' Dyos Manb'aj nchin yolin, Chiku'ya, chi Dyos.
13Chi Qman Dyos:
Kjawil ntx'e'mu'ne' ntaname', naku'xwitloj njoyet triy.
Lay kyejten jun twitz ub'a ti'j tqan,
ex lay kyejten jun iw ti'j tqan.
Naq kyxaq tzqij che kjelten. Chij.
14Ktma'tzun tnamtz:
¿Ti'tzu'n nb'ajqe tzalu?
¡Qo'qe' qkyaqil kyoju' nimaqtnam kuwsa'nqe',
tu'ntzun majx tu'n qkub' b'yo'n!
Qokyimel tu'n Qman Dyos;
ntzaj tq'o'n b'i'yb'il toj qk'wa' a'
qu'n ob'inchan il twitz.
15Intoq qo ayon ti'ju' b'a'n
ex mixti'xi'te b'a'n qk'am,
Intoq qo ayon tu'n qq'anit
ex naq xob'ajil ati.
16¡Luju' ajq'oj tzul!
¡Q'ojq'ojqe' tchej nche q'ajti tzmax Dan!
Max nlu'lun tkyaqilju' tx'otx' kyu'n ajkyjaw ẍch'in.
Luqe' che ul xitulteju' tx'otx' ex tkyaqilju' tq'inumal
e'nimaqtnam kyuk'i'lxi' najlqe' kyoj, chiku' tnam.
17Chi Qman Dyos:
Che tzajel nq'o'ne' kan b'iyol kyi'je',
che okyel tx'a'ne' kyu'n;
mixti'te' mayn kmqolkye. Chij.
Exch'yon ttanam Jeremiy toj tk'u'j
18Mixti'tl q'a'nb'il teju' nk'ixk'oje',
xi' nkub'aje'.
19Q'ojq'oj toj kywi' ntaname' tu'n k'ixk'oj
toj tkyaqilju' tx'otx':
¿Mixtzun a'lo'tl Qman Dyos toj Syon?
¿Ma mixa'lo'tlju' nimaqkawil atzu'? chechij.
Atzunte Qman Dyos tzaj ttzaq'we'n:
¿Tiqu'n soka' kyq'o'ne' ntx'u'jile'
tu'nju' nche k'ulune' kye witzileb',
kyeju' junxi'tl dyos mixti'x kyajb'en? chi Dyos.
20Matzik'u' q'ijal, mab'jawu' twitz awal
extzun mixti'xqe kolb'ilqe.
21Inchin yajtiye' tu'nju' yajb'ilte ntaname';
matxi' kub'wi'je' tu'n b'is ex xob'il.
22¿Ma mixtzunloti' jun q'a'nb'il toj Kalaad?
¿Ma mixtzunloti' jun atzu' tu'n tq'anante?
¿Tiqu'ntzun mixti' nb'entju' ntaname'?
Currently Selected:
Jer 8: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999