Jer 40
40
Kyejten Jeremiy tk'etz Kyedaliy
1Tzaj yolin Qman Dyos te Jeremiy, tetzlenxi' tzaqpi'n toj Rama tu'n Neb'usaradan, chaq'ul kye xq'uqil. Knet Jeremiy tu'n Neb'usaradan xmo'ntoq toj xpatx'k'uxb'il kyxolju' xjal aj Jerusalen ex aj Juda eb'ajxq'i'n B'ab'ilon.
2Xiq'i'n Jeremiy tjunajlx tu'n chaq'ul, ex xitma'n te: Tzaj tma'n Qman Dyos tu'n ttzaj tq'o'n xitb'il tib'aju' tnam lu, 3ex matb'inchaju' tzaj tma'n ja'lo. Kuwxi'x soka' lu kyeye' qu'n mache b'inchan ile' twitz Dyos ex min ẍe b'ine' te. 4Ka'yintzpe'ya, k'el npoq'i'ne' xpatx'k'uxb'il ja xmo'na'ya ja'lo. Qa tajb'ila tu'n txi'ya wuk'i'le' B'ab'ilon, kuttzaja, kxel nka'yi'na. Qatzun min tajb'ila tu'n txi'ya wuk'i'le', kutkyaja. Ati toklena ti'j tkyaqilju' tx'otx', ka'yinxa ja b'a'n tu'n tkub' tena'ya. 5Qa a tajb'ilju'ya tu'n tanjti'ja, kutanj ti'ja tk'etz Kyedaliy tk'wal Aykam ex tchman Sapan, ju' matxi' tz'ok q'o'n te kawil kyib'aju' nimaqtnam aj Juda tu'n nimaqkawil aj B'ab'ilon, ex tz'anq'ina tk'etz kyuk'i'lju' twnaqila. Kutxi'ya ja b'a'na' toj twitza, chi Neb'usaradan ju' chaq'ul, te Jeremiy. Ex xitq'o'n jun oyaj te Jeremiy ex twa, kyej tq'olb'e'ntzuntz. 6Xi' Jeremiy tk'etz Kyedaliy toj Mispa, ex najan tuk'i'l ex kyuk'i'lju' xjal e'kyajten toju' tx'otx'.
Jawkyi'nkyib' xjal ti'j Kyedaliy
(2 R 25.23-24)
7Tetzunj kyb'inteju' chaq'ul ex xjal te q'oj aj Juda ate'xtoq kyoj kojb'il qa matxitoq tz'ok q'o'n Kyedaliy tk'wal Aykam te kawil toju' tnam tu'n nimaqkawil aj B'ab'ilon, ex matxitoq che kyej tq'o'n ichan e'qya ex k'wal prowqexi'x toju' tnam toj tq'ob', ju' min eb'ajxq'i'n B'ab'ilon, 8Exi' kyuk'i'lju' kyxjal tk'etz Kyedaliy toj Mispa. Aye'jun toqju' Ismael tk'wal Netaniy, Joanan ex Jonatan tk'wal Karea, Serayiy tk'wal Tanumet, e'tk'wal Epay aj Netopa, ex Jesaniy tk'wal jun ichan aj Maakat kyuk'i'l t-xjal. 9Xi'xi'x ttziya'n Kyedaliy kye ikjalu: Lan che xob'e' tu'n kyq'onte kyib'e' tjaq' kykawb'il kaldey. Che tenkje' toju' tx'otx', kyq'om kyib'e' tjaq' tkawb'il nimaqkawil aj B'ab'ilon, b'a'n che kxe'la'tzuntze'. 10Chin kjel tenwe' Mispa, te kyxele' kywitz kaldey ajkyul tzala. Kyb'uyimkye' B'in, lob'j ex aseyt, che kjelten tzuntze' kyoju' nimaqtnam jata'qe'ye', chij kye. 11Ex kyb'i aj Juda ate'toq kyoj Moab', Amon, Edom ex kyoj txqantl tnam, qa taq'ju' nimaqkawil aj B'ab'ilon anb'il tu'n kykyajten junjun aj Juda toju' kytx'otx' ex ojetoq tz'oktq'o'n Kyedaliy te kykawil. 12B'aj anjtzun kyi'jtz toj Juda, eb'aj tzaj kyojileju' tx'otx' jachaq eb'ajxa' slamj, e'pontzuntz yek'ulkyib' te Kyedaliy toj Mispa. Ex ikxkye eb'jo'kten k'u'l txqan b'in ex lob'j nimaq kyajlal.
Jawtiq'i'ntib' Ismael ti'j Kyedaliy
13Exi' Joanan tk'wal Karea kyuk'i'lju' txqantl chaq'ul kye xjal te q'oj eb'aj kyejten kyoj kojb'il, tk'etz Kyedaliy toj Mispa, 14ex xikyma'n te ikjalu:
—¿Ma min b'i'n tu'na qa matxi' tzaj chq'o'n Ismael tk'wal Netaniy tu'n B'aalis nimaqkawil aj Amon? chechij.
Atzunte Kyedaliy min exitoksla'n. 15Ewajtzun xa'tjask'u'n Joanan te Kyedaliy kjalu:
—Q'ontza anb'il tu'n nxi'ye' b'yolte Ismael. Mix-a'lo' kb'ilte alkye xb'yonte. ¿Se'n taq'wi naq kb'el qyo'n qama kub' b'yo'na tu'n? Oklo che b'ajex slamj tzunkye xjaltz kykyaqilju' matx che b'ju'l tk'etza, exlo che b'elb'ajkye' kykyaqilju' ẍekyajten toj Juda, chij.
16Atzunte Kyedaliy xittzaq'we'n te ikjalu:
—¡Lan tb'inchaju'ya lu! Myana' axte' ntma'na ti'j Ismael, chij.
Currently Selected:
Jer 40: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999