Jer 16
16
Tk'am Jeremiy chaq'b'il te Qman Dyos
1Tzaj tma'n Qman Dyos weye': 2Lalun mjeya ex lalun che ten tk'wala toju' tx'otx' lu. 3Qu'n kxe'l nma'ne' teya, ayine' Dyos Manb'aj, titi' kb'ajel kyeju' k'wal che itz'jel toju' tx'otx' lu exqe' manb'aj ate' kyk'wal. 4Che kyimel tu'n kuw yab'il ex mix-alo' k'oq'el kyi'j, ex mix-alo' kb'elex mqunkye: che kjel pak'anje twitz tx'otx' kse'n txa. Kb'ajel toj kywi' tu'n q'oj ex we'yaj, ex che b'ajel ch'yo'n kyu'n k'utz ex kyu'n tojk'ul txkup.
5Ex tzaj tma'n Qman Dyos weye': Lalun tz'okxa toj jun ja janche b'isuna' xjal tij jun anmi, lalun tz'oq'a ex lalun tyek'uya k'ixk'oj toj tanmiya ti'j, qu'n mixti'tlwe' nnak'b'il, nk'u'jlalil ex tlaqb'il nk'u'j ti'ju' tnam lu. Ayine' Dyos Manb'aj nchin yolin. 6E'nimaq kyoklen ex ch'i'n kyoklen che b'ajelkyim toju' tnam lu, mix-a'lo' kmqulkye ex mix-a'lo' k'oq'el kyi'j, mix-a'lo'te tu'n tok tjuma'n ttzitk'u'j mujqa tu'n tel tjon twi' tu'n b'is kyi'j. 7Mix-a'lo'te kb'el q'onkye nimaqwan te q'uqb'ab'l kyk'u'ju' kywitze'l, expe' ti'j tkamik manb'aj mujqa txub'aj.
8Ex lalun tz'okxa toj jun ja jata' jun ninwan, tu'nwt tkub' qeya wal ex k'wal kyuk'i'l. 9Qu'n che b'el nnajsa'nwe' b'itz te ninq'ij ex tzalajb'il exqe' b'itz te mjeb'le'n toju' tnam lu, ayine' Dyos Manb'aj kyib'aj aj Israel. Kb'ajel ja'lu tojx kyq'ijlalile' ex k'okyel kyka'yi'ne'.
10Aj txitma'na nyole' lu teju' tnam, ktzajel kyxjelu'n teya: ¿tiqu'ntzun xtchaq'a' Qman Dyos taq'wix nimxi'x lu? ¿Titi'tzu'n taq'wix xqb'inchaye'? ¿Titi'tzu'n il xqb'inchaye' twitz Qman Dyos? qa chechi. 11A q'manxju'ya kye: Chi Qman Dyos kjalu: Tu'ntpajte' inkyaj kykolb'e'ne' ojtxi' kychmane' ex exi' k'ulul ex nimal kye txqantl dyos, ayintzune' inkyaj kykolb'e'ne' ex min ekyb'inchatlju' xnaq'tzb'il b'ajx nq'o'ne' kye. 12Exqetzunkye' tx'yan qexi'xtle kyekywitzju' ojtxi' kychmane', qu'n teyle junjun xkub' tpi'sa'ntib' tojxu' t-xim myab'a'n ex min nchinx kyb'i'ne'. 13Qu'mtzun che elex nljo'ne' toju' tx'otx' lu tu'n kyxi'ye' toj jun tnam min kyojtzqi'ne' ex min xkyojtzqi ojtxi' kychmane', che ajb'eltzuntze' na'tz kye txqantl dyos q'ijtl ex qonik'an, layx tzaj laqjwe' nk'u'j kyi'je'.
14Ayine' Dyos Manb'aj nchin yolin, tzultzun q'ij lay kymatle': Itz'te' Qman Dyos etzq'inkye aj Israel toj Ejipt, chechiwte', 15ate kxel kyma'ju'ye': Itz'te' Qman Dyos etzq'inkye aj Israel toju' nintnam toj tb'a'nq'ob'kya'j ex kyoj kykyaqilju' nimaqtnam jachaq b'ajxna'toq t-sputi'n, chechiku'ye'. Knb'incha'ye' tu'n tanjtzkyi'je' toju' kytx'otx'e' xinq'o'ne' kye ojtxi' kychmane'.
16Ayine' Dyos Manb'aj nchin yolin, che tzajel wiq'i'ne' txqan tzyul kyiẍ tzyulkye aj Israel, che tzajeltzun wiq'i'ne' txqan ub'al ub'alkye aj Israel ex tu'n kyb'je'x iq'i'n kyoj kykyaqilju' nimaq k'ul ex kywi'witz ex kyoj jul kywitz pik. 17Qu'n inka'yi'ne' tkyaqilju' kyb'inchb'aj, ale'x tkyaqilju' kyil layx tz'ewit nwitze'. 18Tnejelxi'x knb'incha'ye' tu'n kychjonte kamaju' kyil ex kyb'inchb'aj myab'a'n, qu'n makub' kytz'ilsa'n ntx'otx'e' kyu'n kywitzleb' taq'wixqexi'x ex kyimniqe', ex makyb'inchaju' ik'o'n wu'ne' toj tkyaqilju' tx'otx', chi Dyos.
Kub'san Jeremiy twitz Dyos
19Nman Dyos, wipumale' ex klol weye',
aya kolb'ilweye' toju' kmoj xob'ajilx;
che ul nimaqtnam twitza
che tzajelx ttxa'n tx'otx' ex kkyma' teya:
Naqx txqan dyos mya ax, mixti' kyajb'en ex mixti' kyipumal
b'aj kyej q'o'n kyeju' qmane'.
20¿Ma oktzunlo kb'antel axju' xjal b'inchalkye tdyos?
¡Mixya dyos qekye' lu!, chechiku'.
Tzaq'web'l tu'n Qman Dyos
21Qu'npena'tzun, majx kxel nyek'u'ne'
wipumale' te tkyaqil kye,
k'eleltzun kynik'tz qa a nb'iju'ye' Dyos Manb'aj, chi Dyos.
Currently Selected:
Jer 16: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999