Jer 13
13
Jun techlal tu'nju' Min njapun tyol Qman Dyos kyu'n aj Israel
1Chi Qman Dyos weye: Kutxi'ya lq'ol jun k'alb'il sed ex k'lonka tk'u'ja, ex lalun ku'x tak'sa'na toj a', chij. 2Tzajtzun nlq'o'ne' k'alb'il, kse'nx tchaq' Qman Dyos weye' ex oknk'lo'ne' nk'u'je'. 3Tzajtzun yolintl Qman Dyos weye' ex tma: 4Q'intzju'ya k'alb'il tok tu'na, ju' tloq'a, kutxi'tzuntza ttziju' nin a' Ewprates, ewankjtzuna atzu' toj tk'atxab' jun pik. Chij. 5Nxi'tzuntze' ttziju' nin a' Ewprates, xiwewa'ntzuntze', kse'nxju' tchaq' Qman Dyos weye'.
6Tb'ajlenxi'tzun b'a'npun q'ij, tzaj tma'n Qman Dyos weye': Kutxi'ya ttziju' nin a' Ewprates, ex q'intzju'ya k'alb'il xinma'ne' teya tu'n txi' tewa'na atzu', Chij. 7Nxi'tzuntze' ttziju' nin a' Ewprates, xinjyo'ne' toju' tx'otx' ex jatzwiq'i'ne' k'alb'il jaxa' wewana'ye', matxi'toq b'aj q'ayj ex mixtoqti'tl tajb'en.
8Tzajtzun yolintl Qman Dyos weye', 9ex tma: Ikytzu'n kb'ela' nxitu'ne' kyninb'ilkyib' aj Juda ex aj Jerusalen. 10Min kyajb'ilju' ntaname' b'inchal myab'a'n lu tu'n t-xikynima'n nchaq'b'ile', xi'lepchqe'ka' ti'ju' tku'x toj kyanmi. Xi' nche ajb'ena'tl ex nche k'ulun kye txqantl dyos. Ikyqe' kse'n k'alb'il lu, mixti'tl tajb'en. 11Kse'n nokjtz'et tk'u'j jun xjal tu'n k'alb'il, ikytoqtzun mujb'ab'lju' wuk'i'le' kyuk'i'lu' tnam Israel ex Juda, tu'n kyok te ntaname' ex tu'n t-xikyoli'nju' nb'iye', tu'ntzun kyok ninb'ilweye' ex ajwalilweye'. Aye'tzunkye min eb'in weye'. Ayine' Dyos Manb'aj nchin yolin, chi Dyos.
Juntl techlalju' tz'e'ysb'il Witzb'aj Tzul
12Ex q'manxa kye: Chi Dyos Manb'aj kyib'aj aj Israel: Alkyexku' xar knojel tu'n b'in, chiku'ya kye. ¿Ma miẍtzunti' b'i'n qe'qu'n qa tkyaqil xar in noj tu'n b'in? chechilo aj Israel teya. 13Atzunta tzaq'we'nxa kye: Chi Qman Dyos qa che b'el ttx'ujt-sa'n kykyaqilju' najlqe' toju' tx'otx' lu; e'nimaqkawil nche kub' qe toj tq'uqb'il Dab'i, e'pale, e'sanjelal ex kykyaqilju' najlqe' toj Jerusalen. 14Che b'ajel tpa'ntzuntz kse'n xar, jun ti'j juntl, e'manb'aj ex k'walb'aj. Lay tzaj q'aq'an tk'u'j kyi'j, layx tzaj laqj tk'u'j kyi'j. Aku' Dyos Manb'aj inq'mante, chiku'ya kye. Chij.
Q'ma'ntl te Israel
15¡Israel, matxi' yolinte Qman Dyos!
Lalun jawkynima'n kyib'e', kyb'inku'ye'.
16Kynimanktze' Qman Dyos
na'mxku' ttzaj tq'o'n qlolj
tu'n kyjawtz'aqe' toj k'ul qxopin;
na'mxku' tjaw b'entju' spik'un nche ayone' te
te qlolj t-xlekumil kamik tu'n.
17Qa min xxikyb'i'ne',
chin oq'ile' toj ewaj tu'n tpaju' nimjtib'il ati kyoje;
nim ta'l nwitze' k'elil,
qu'n jtz'o'nqe'ju' trit Qman Dyos kyu'ne'.
Tyol Qman Dyos teju' nimaqkawil
18Q'manxa te nimaqkawil ex teju' t-xu'jil:
Kukyku'tze' tib'aj q'uqb'il te kawb'il, che qeku'ye' twitz tx'otx',
matxina' ku'tz tz'aqju' kykorone' toj kywi'ye', chiku'ya kye, chi Dyos.
19Txoli'n kyi'ju' nimaqtnam toj Nekeb'
mix-a'lo' kb'entel tik'x.
Kykyaqilju' aj Juda exni q'i'nqe'
majx eb'je'xq'i'n toju' tx'otx'.
20Kyka'yinxi'xpe'ye'
luqe' ajq'oj che ul toj tb'a'nq'ob'kya'j
¿Jata' jun ch'laj rit xinq'o'ne' tu'n txi' tka'yina,
aju' jun ch'laj rit ntnima'n tib'a ti'j?
Tqanil qa k'elex q'i'n Israel toj juntl tnam
21¿Ti'tzu'n ktma'ya Jerusalen aj tkawinjtza
kyu'n xjal eb'aj t-xnaq'tza'na?
Tzul k'ixk'oj ti'ja
kse'n k'ixk'oj ti'j jun qya ajtitz'ji tal.
22Tiqu'ntzun saja' lu wi'je' qa chija,
ati tu'n tkane' toj twitza qa tu'nju' nim tila;
¡Qu'mtzun makub' ẍb'iqb'a'na
ex makub'yaju'na!
23¿Ma jakutzun ch'exb'en ka'yin jun xjal q'eq twinqil?
¿Ma jakutzun b'ent tel tiq'i'n jun leopa'rt tchinaq'il ti'j?
Ikxtzunkyeju'ye' naq'liqe'tle' ti'ju' myab'a'n
lay b'ent kyb'inchanteju'ye' b'a'n.
24Qu'mtzun che elix nslamu'ne'
kse'n tz'is njaw tiqa'n kyq'iq' toj chq'ajlaj.
25Ax teju'ya lu Israel,
atzun tajb'ilju'ya tu'n nb'inchanteye' teya
Ayine' Dyos Manb'aj nchin yolin.
Mana' tzik'nna'le' tu'na
xi' soka' qetl tk'u'ja kyi'j witzileb' mixti' kyajb'en.
26Ikxwe' majx kb'el nẍb'iqb'a'na
tu'ntzun tel tch'ixawa.
27Matxi' wile' inxi'x el b'aja ti'j, e' tajpaji'na,
exju' tchwinqlala mijsoq'x toj ajpaji'n,
exqe' tb'inchb'ena taq'wixqe'xi'x
kywi' b'us ex kyoj kojb'il.
¡Qab'anx twitza Jerusalen!
¿Ma kukx kb'el tenju'ya toju' taq'wixil? Chi Qman Dyos.
Currently Selected:
Jer 13: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999