Jer 10
10
Witzleb'i'n ex axxi'x k'u'lb'il twitz Dyos
1Tnam Israel, b'intzju'ya ntzaj tma'n Qman Dyos teya lu. 2Chi Qman Dyos:
Lalun tz'el kykno'nju'ye' nkyb'incha'n txqantl nimaqtnam
ex lalun che xob'e' kyeju' techlal twitz kya'j
kse'n nkyb'incha'n nimaqtnam lu.
3Mixti'te' tajb'en kyokslab'lju' tnam lu.
Injaw kytx'emu'n jun xmil toj ku'j,
juntzun b'inchal tilb'ilal nkub' b'inchante tu'n taq'unb'il,
4nb'jo'k twiqo'ntzuntz tu'n saqpwaq ex q'anpwaq,
inb'aj kyklawẍi'ntzu'ntz tu'n pojb'il
tu'n lalun tzik' tz'aq.
5Naku'j xob'tzb'il pich' qekye' witzleb'
toj jun tnej awal melon;
min nb'ent kyolin,
inche'x iqa'n, qu'n min nche b'et.
Lalun che xob'e' kye,
mixna' a'loqi'j nkyb'incha'na' taq'wix mo b'a'n. Chi Qman Dyos.
6Nman Dyos, mix-alo' jun kse'n aya:
nimta toklen,
nim toklen tb'iya ex nimtipumal.
7¿Alxi'xwitlokye min xob' teya, nimaqkawil kyeju' nimaqtnam?
Atita toklen tu'n kyxob' xjal teya.
Kyxol kykyaqilju' ati kynab'l ex nimaqkawil twitz tx'otx',
mix-a'lo' jun kse'n aya.
8Kykyaqilx xnakqe',
Mixti' kynab'l.
¡Mixti'xte kynab'l k'elel ti'j jun piẍ tze!
9Naq saqpwaqqe' kywitzleb' tzajni q'i'nqe' Tarsis,
ex q'anpwaqqe' tzajni q'i'n Upas;
naq b'incha'nqe' kyu'n b'inchal tilb'ilal ex aq'unal ti'j tb'anil k'uxb'il
oksa'nk kyxb'alun morad ex kyeq,
kykyaqilx b'incha'nqe' kyu'n xjal b'a'n kyxtokyinte.
10Ate Qman Dyos axxi'x Dyos,
aju' Dyos itz', nimaqkawil tejumajx.
Majx nlu'lunju' tx'otx' ajttzaj ttx'u'jil;
lay tzik'xju' ttx'u'jil kyu'n nimaqtnam.
11(Kymanxe' aj Israel kyeju' nche niman kye txqantl dyos: Che najelkye' dyos twitz tx'otx'ju' myaye' eb'inchante kya'j ex tx'otx'; mixti'tl jun kjelten tjaq' kya'j, chechiku'ye').
B'itz Ajwalb'ilte Dyos
(Jer 51.15-19)
12Kub' tb'incha'n Qman Dyos tx'otx' tu'n tipumal;
tuk'i'l tnab'l kyaja' tkuwsa'n twitz tx'otx',
ex ximan tej tkub' tb'incha'n kya'j.
13Intinun twitz kya'j tu'n ajttzaj julin jb'al,
inche jawtiq'i'n muj tzmax mankb'il ttxa'n tx'otx',
inche ttilky'a'n q'ankyaq toj jb'al
ex netztiq'i'n kyq'iq' jak'u'na' tu'n.
14Kykyaqil xjal mixti'x b'a'n kyu'n ex mixti' kynab'l
Kyu'nx witzleb' nela' kych'ixawju' eb'inchankye:
naq tilb'ilalqe', sb'ub'lqe' ex mixti' kychwinqlal;
15mixti'x kyajb'en, ch'ixb'ajilqe'x,
che b'elt-xitu'n Qman Dyos ajkyok toj xjel.
16¡Atzunte' Dyos ajb'en Jakob' te,
ate b'inchante tkyaqilju' ati!
Jaw t-sk'o'n tnam Israel te tetzb'il.
A tb'iju': Dyos Manb'aj te tkyaqil ipumalj.
Yol kyxol nintnam tuk'i'lju' Sanjelal
17Nintnam, txoli'ntl ti'ja,
b'uyimqe'ya tti'xti'ya.
18Qu'n lu ntma'n Qman Dyos:
Ja'lotzun che pomel nq'o'nju'ye'
xjal najlqe' toju' tx'otx' lu najchaq.
che kb'el nq'o'ne' toj yajb'il
qla'tzuntz qama chin kyjoye'. Chij.
19¡Qab'anx nwitze' toju' xitb'il weye'!
¡Mixti' q'a'nb'ilkyeju' nk'ixb'lene'!
¡Kub'tzun nximane' qa k'ik'exju' k'ixk'oj lu wu'ne'!
20Matxi' kub' xitu'nju' nxmuje',
matxi' che b'aj laqj kykyaqilju' aqwil.
Matxi' chin kyej kykolb'ine' nk'wale';
¡oje che b'aj!
Mix-a'lo'tlte jun tu'n kyjaw tb'incha'n npache'
tu'nwt kyxi' t-slik'u'n xb'alun kyib'aj.
21Tx'yan qekye' nejenel teju' tnam lu:
min nche jyon ti'j Qman Dyos.
Qu'mtzun matxi' che k'ulb'an
matxi' che b'ajx slamj kykyaqilju' kyrit.
22¡Kyb'intzpe'ye'! ¡Lu jun tqanil!
Ktzajel jun tq'ojq'ojel xitb'il toj jun tx'otx' toj tb'a'nq'ob'kya'j
che kjel tq'o'n nimaqtnam toj Juda
naq chq'ajlajtl, naq xo'j che najal kyoj.
23Nman Dyos, b'i'n wu'ne' qa mya toj tq'ob'ju' xjal ta' tchwinqlal,
qa mya toj tq'ob' ta' jatu'n tpon b'aja'.
24Qo ttzaku'ma tojxi'x tnik'alilti'j,
mya tuk'i'l ttx'u'jila, qu'n jaku' qokub' tnajsa'na.
25B'ajsantzju'ya ttx'u'jila kyib'aju' nimaqtnam
ju' min nelkynik' teya,
kyib'aju' tnam min nxi' na'na kyu'n,
qu'n matxi' b'ajx kyb'elq'un ttanam Jakob',
majx makub' kyxitu'n
naq tik'lenxtl toju' tx'otx' kyu'n.
Currently Selected:
Jer 10: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999