Ez 1
1
Yek'unjtz tq'uqb'il Dyos
1-3Ayine' pale Esekyel, tk'wal B'usi, jun q'ij atintoqe' ttziju' nin a' Kyeb'ar, toj B'ab'ilon kyxolju' eb'ajxq'i'n. Minab'enx jqetu' kya'j, ex wile' Dyos toj jun naku'j witzik'. Toj tjwe'yi'n q'ij tajlal tkyaji'n xjaw teju' junaq lajoj ab'q'i (30), jwe' ab'q'i t-xilen iq'i'n nimaqkawil Joakyin toj juntl tnam. Kub' tq'o'n Qman Dyos tq'ob' toj nwi'ye'. 4Ex wile' xi'toq ttzaj jun kyq'iq' jb'al toj tb'a'nq'ob'kya'j; inetz q'aq' toj jun nin muj, kse'n xloq'lokya'j, ex ati jun spik'un nxi'x txaqun ti'jile. Ex ntz'iljne jun toj tnky'ajchaqil q'aq' kse'n k'uxb'il nqoptz'aj, 5ex ate' kyaje' naku'j wnaqqe' toj tnky'ajchaq'il. 6Teyile junjun ati kyaje' che ka'yin ex kyaje' kyxik'; 7tzinun kyi'ju' kyqan, iky kyxky'equ' kse'n kyxky'eq wakx, ex nche qoptz'aj kse'n q'ank'uxb'il tz'umin. 8-9Expe' ti'jxi'tlu' kyaje' che ka'yin ex kyajkyaj kyxik', aye' kyaje' naku'j wnaq lu ate' kyq'ob' naku'j kyq'ob' xjal kyoj kyaje' kyplajil kyjaq'ju' kyxik'. Intoq che moje kytxa'nju' kyxik'. Ajkyxib'et min nanjtzkyi'j, nche'x b'et kywitzxi'. 10A che ka'yin kyaje' ja'lu: aju' kywitzxi' kse'n ka'yin jun ichan; atzu'n toj kyb'anq'ob' kse'n ka'yin jun b'alun; atzu'n toj kynayaj kse'n ka'yin jun tman wakx; atzunju' kytze'lkyi'j kse'n ka'yin jun t'iw. 11Jawni kyq'o'n kyxik' jawtl. Kab'e' kyxik' nkymujb'ankyib', aye'tzu'n kab'e'tl najb'en te kutxb'ilte kyxmilal. 12Kykyaqilx intoq che b'et kywitzxi' ex min nanjtzkyi'j. Intoq che'x toju' tu'me'l ja nche'xa' iq'i'n tu'n tipumal Dyos. 13Ikytoq kyka'yinkju' kse'n ttxalq'aq' nche k'ant, mujqa kse'n tzaj ntilky'aj, nche'x ex nche tzaj kyxol; inxi'xtoq qoptz'aju' q'aq' ex intoq che el xloq'lokya'j ti'j. 14Intoq che'xju' naku'j wnaqqe' ex ntoq che ultel ojqel, naku'j xloq'lokya'jqe'.
15E'xinka'yi'ne' naku'j xjalqe' lu ex wile' ati jun tul twitz tx'otx' ttxlaj junjun. 16Junelniqe'ju' kyaje' tul ex tu'nju' b'inchb'enkye, intoq che qoptz'aj kse'n tb'anil ab'j. Naku'j ati juntl tul toj junjun tul. 17Intoq b'ent kyxi' b'et toj alkyexku' kykyajel plaj, ex min nxikytz'u'n kywitz tojun plajtl. 18Wile' ate'toq tzuyb'ilkyeju' tul kykyajel ex ate'toq witzb'aj kyi'jile. 19Ajkyxib'etju' naku'j wnaq, ex nche'xb'etju' tul kyuk'i'l, ex ajkyjawju' naku'j wnaq twitz tx'otx', ex nche jawju' tul. 20Intoq che'x b'etju' naku'j wnaq janche'x lmu'na' tu'n tipumal Dyos, ex intoq che jawju' tul junx kyuk'i'l, qu'n majxtoq iqi'n kyib'ju' naku'j wnaqqe' kyuk'i'lju' tul. 21Ajkyjaw yukchiju' naku'j wnaqqe', ex nche jaw yukchiju' tul, ajtzun kywe', ex nche we'ju' tul; ex ajkyjawju' naku'j wnaq twitz tx'otx', ex ntoq che jawju' tul kyuk'i'l, qu'n majxtoq iqi'n kyib'ju' naku'j wnaq kyuk'i'lju' tul. 22Tib'ajtzunju' kywi' atitoq naku'j kya'j, nqoptz'aj naku'j kristal. 23Tjaq'tzunju' naku'j kya'j nxikyslik'u'n kyxik'ju' naku'j wnaq lu tzinun, nkymujb'a'n kyib'. Ktxu'n kyxmilal kyu'n kab'e' kyxik'. 24Ex nb'iye' tq'ojq'ojel kyxik' kse'n nche b'et: kse'n tq'ojq'ojel jun nin a' matxitoq ch'iy, kse'n tq'ojq'ojel twi'ju' Nimtipumal, kse'n tq'ojq'ojel jun tnej xjal te q'oj. Ajkywe', nche kub' kyq'o'n kyxik'. 25Ex tzaj jun tq'ojq'ojel tib'ajxi' naku'j kyej tib'aj kywi'. 26Nka'yiye' jun q'uqb'il kse'n tb'anil ab'j sapiro tb'i tib'ajxi' naku'j kya'j, ex atitoq jun naku'j ichan tib'aju' naku'j q'uq'b'il. 27Atzunju' toj tk'alb'il jawtl, wile' nqoptz'aj naku'j k'uxb'il txoli'nkti'j tu'n q'aq', atzu'n k'ub'l wile' jun naku'j q'aq'. Intoq tilky'aj ti'jile 28naku'j kse'n qe'nkan ajtyek'u'ntetib' toj muj kse'n ati jb'al. Iktzu'n tyek'u'ya'tib' tajwalil Qman Dyos weye'. Atzunj nka'yinteye', nkub' mejeye' majx nkub' joqeye', nb'itzuntze' jun tq'ojq'ojel wi'yj.
Currently Selected:
Ez 1: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999