1 R 2
2
B'ajsb'il tchaq'b'il Dab'i
1Ch'inxtoqtzun tkyim Dab'i, b'aj kyej tq'o'n chaq'b'il te Salomon kjalu: 2Ch'inxtl wik'we' twitzju' tx'otx' kse'nxkye kykyaqil xjal. Kuwxa ex tz'okxa ichanxi'x. 3Che japunxju' tchaq'b'il Qman Dyos tu'na, b'inchama tajb'il, e'tkawb'il, e'tchaq'b'il, e'tnuk'b'il kse'nx tz'ib'a'n kyoj tu'jil tkawb'il Moyses, tu'ntzun tchmetju' taq'unb'ena toj tkyaqilju' tu'me'l jaxjaku' matxa'ya. 4Ex tu'n tjapunju' ttziya Qman Dyos weye', qama txi' kyka'yi'n kyib'ju' nk'wale' ex mache b'et b'a'n twitz Qman Dyos tu'n tkyaqil kyk'u'j ex tkyaqil kyanmi, kukx kyjaw sk'o'n nimaqkawilju' kyxol nyajajile' tu'n kyok toju' q'uqb'il te kawb'il toj Israel.
5Loq'tzun b'i'n tu'na titi' tb'incha Joab' weye', ju' tal Seruya, aju' tb'incha kyi'j kab'e' nejenel kye xjal aj Israel te q'oj: ti'j Ab'ner tk'wal Ner, ex ti'j Amasa tk'wal Jeter, ju' e'kub' tb'yo'n toj tq'ijlalil nak'b'il tu'n tok tu'me'l t-xelju' chik' b'je'l qojli toj q'oj, ex oktq'o'nju' lu te npaje'. 6Qu'mtzun ximana b'a'nxi'x, ex lalun taq'a anb'il tu'n tkyim toj b'anil. 7Aye'tzu'nkye' tk'wal B'arsilay, aj Kalaad, b'inchama b'a'n kye ex q'onx jun kywaya, qu'n e'onin wi'je' tej ntoq chin ewine' twitzu' ttzika Ab'salon. 8Atzun juntl, atiju' Simi tuk'i'la, ju' tk'wal Wera tyajajil B'enjamin aj B'awurim. Atzun xjalju' tzaj txkonte toj nwiye' kuwxi'x toju' q'ij xi'toq nxi'ye' Maanaym. Yajxi'tzuntel pon k'lulweye' ttzi a' Jordan, ex ilti'j xintziya'ne' te twitz Qman Dyos tu'n lantoq kub' nb'yo'ne'. 9Lalun kub' tnajsa'na til. Atina'ta tnab'l, ka'yinxa titi' ktb'incha'ya ti'j. B'a'nxa te tu'n tkyim toj jun k'ixk'oj, chi Dab'i te Salomon.
Kyim Dab'i
(1 Cr 29.26-30)
10Kyim Dab'i ex kux mqu'n kyk'etzju' qtzan tman toju' Ninttanam Dab'i. 11Kab'naq (40) ab'q'i ten te nimaqkawil toj Israel, wuq ab'q'i kawin Eb'ron, atzun junaq oxlajoj (33) ab'q'i toj Jerusalen. 12Oktzun Salomon te nimaqkawil te t-xel Dab'i ju' tman, b'a'n tena'ju' tkawb'il.
B'ajtyajil Adoniy kyuk'i'l t-xjal
13Xi' Adoniy tal Awit, tk'etz B'et-sab'e ttxu Salomon. Xi'tzun t-xjelu'n B'et-sab'e te:
—¿Ma toj b'anil sula'ya? chij.
—Iku' —chi Adoniy. 14Ex xitma'ntl:— Ati jun nyole' teya, chij.
—Q'mantza —chi B'et-sab'e.
15Xi'tzun tma'n Adoniy te: —B'i'nta tu'n qa wetoqu'ye' kawb'il, ex kykyaqil aj Israel ntoq che ayon tu'n wokye' te nimaqkawil. Xi'tzu'n xxa' q'o'na'tlju' oklenj lu te witz'ine', qu'n ojetoq tma Qman Dyos tu'n txi' te. 16Ja'lo, naq o'kx wajb'ile' tu'n txinqani'n jun xtalb'ile' teya. Lalun t-xk'ayu'ya, chij.
—Yolina, chi B'et-sab'e xittzaq'we'n.
17Xitzun tma'n Adoniy:
—Chin kub'sale' teya tu'n txitqani'na Ab'isaj aj Sunam teju' nimaqkawil Salomon tu'n ttzaj tq'o'n te nxu'jile'. Lay kub' txk'ayi'nte' teya, chij.
18—B'a'na'tzun, chin yolile' ti'ja twitzu' nimaqkawil, chi B'et-sab'e.
19Xi'tzun B'et-sab'e yolil tuk'i'l nimaqkawil Salomon ti'j Adoniy. Jawe' nimaqkawil k'molteju' ttxu ex kub' tzipe twitz. Kub' qe jumajtl toju' tq'uqb'il ex xitma'n tu'n ttzaj iq'i'n jun q'uqb'il teju' ttxu; kub'tzun qe B'et-sab'e toj tb'a'nq'ob', 20xitma'ntzuntz te:
—Wajb'ile' tu'n txinqani'n jun xtalb'ile' teya. Chin kub'sale' teya tu'n lalun kub' t-xk'a'yu'na, chij.
—Qanintza titi' tajb'ila naw, lay kub' nxk'a'yu'nwe' teya, —chi nimaqkawil xittzaq'we'n te.
21—Q'ontza anb'il te Ab'isaj aj Sunam tu'n tok te t-xu'jilu' ttzika Adoniy, —chi B'et-sab'e.
22—¿Titiqu'n ntqani'na'ya Ab'isaj ju' aj Sunam te t-xu'jil Adoniy? ¡Naq min tzaja' tqani'ntla tu'n txinq'o'ne' kawb'il te, qu'n ana' ntzike', ex q'o'n tib'ju' pale Ab'yatar tuk'i'l ex Joab' tal Sarb'ya! chiju' nimaqkawil te ttxu.
23Tetzunj tb'aj tma'n ja'lu, ttziya nimaqkawil Salomon toj tb'i Qman Dyos: ¡Kub'xwit tz'e'ysa'n nwitze' b'a'nxi'x tu'n Dyos, qa lay tz'el tchwinqlal Adoniy tu'n tpaju' lu. 24Lu Qman Dyos nka'yin, ju' matxi' tz'okq'onweye' ex machin tkuwsaye' toj tq'uqb'ilju' nmane' Dab'i ex makyej tq'o'nju' kawb'il toj kyq'ob'ju' toj njaye', kkyimelte Adoniy ja'loxi'x! chij.
25Tchaq'tzuntz te B'enayiy tk'wal Joyada, tu'n tkub' tb'yo'n Adoniy, xi'tzuntz ex Kub' tb'yo'n. 26Atzu'n teju' pale Ab'yatar, tchaq'ju' nimaqkawil te kjalu: ¡Q'im tb'eya, kutxi'ya Anatot toju' ttx'otx'a! Ax junta ati tu'n tkyima, laytzun kub' nb'yo'na qu'n aya xi' iqanteju' tkax Qman Dyos twitzu' nmane' Dab'i, ex matxi' yajtixi'ya tuk'i'l nmane', chij. 27Ikytzu'n eltiq'i'n Salomon ju' Ab'yatar te pale twitz Qman Dyos, ikytzu'n japuna'ju' ojetoq tma Qman Dyos toj Silo kyi'ju' tk'wal Elyi.
28Ojetoq tz'oktq'o'ntib' Joab' tuk'i'l Adoniy, atzu'n tuk'i'l Ab'salon min taq'tib'; tetzunj tb'inte Joab' tqanil lu, xi' oq toju' ja xjan, ex oktklo'ntib' ti'j q'olb'eb'l. 29Xitzun q'o'n tqanil te nimaqkawil Salomon qa matxitoq pon oq Joab' toju' ja xjan, exqa matxitoq tz'ok tklo'ntib' ti'j q'olb'eb'l. Xi'tzun tchq'o'n Salomon B'enayiy tk'wal Joyada b'yolte, 30xi'tzun B'enayiytz toju' ja xjan ex xitma'n te Joab':
—Matchaq'u' nimaqkawil tu'n texa, chij.
Atzunte Joab' xittzaq'we'n:
—¡Lay chinexe'! ¡Axtzu' chin kyimela'ye' tzalu! chij.
Xi'tzun B'enayiy q'malteju' tzaq'web'l teju' nimaqkawil, xitma'n te titi' ttzaq'web'l Joab'.
31Xi'tzun ttzaq'we'n nimaqkawil te:
—Qb'inchamju' tajb'il. B'yonku'ya ex mqunku'xa, najsanku'ya il toj tja nmane', ex wi'je', tu'n kypaju' b'yojwnaqil tb'incha Joab'. 32Tib'ajxte kjela'ten tkamik tu'n Qman Dyos, qu'n mixtoqti' b'i'n tu'n nmane', tej kykub' t-xyu'n Joab' kab'e' ichan tnik'alxi'xkyi'j ex b'a'nqe'xi'x kyetwitz: aju' Ab'ner tk'wal Ner, nejenel kye xjal aj Israel te q'oj, ex ikxju' Amasa tk'wal Jeter, nejenel kye xjal aj Juda te q'oj. 33Tib'ajx Joab' kb'ela' tz'aqju' kyilil ex kyib'aju' tyajajil tejumajx. Atzunju' t-xtalb'il Qman Dyos ktenb'el kukxju' tuk'i'l Dab'i ex kyuk'i'lju' tyajajil, toju' tq'uqb'il ex kykawb'ilju' toj tja, chij.
34Xi'tzun B'enayiytz ex kub' tb'yo'n Joab'. Ku'xtzun mqu'n Joab' toju' tja toj chq'ajlaj. 35Oktzun tq'o'n nimaqkawilu' B'enayiy kynjelu' xjal te q'oj t-xel Joab', ex oktq'o'nju' pale Sadok te t-xel Ab'yatar. 36Yajxi'tzuntl tchaq' tu'n txket Simi ex xitma'n te:
—B'incha'nktza jun tjaya toj Jerusalen tu'n tnajana atzu'. Ex lalun tz'exa toj jun plajtl, 37qu'n alkye q'ij matz'ex b'eta ex matzik'x jlajina tib'aju' a' Sedron, atzun q'iju' kb'ajela', axtzuntza ati tpaja, chij.
38Xi'tzun ttzaq'we'n Simi te nimaqkawil:
—B'a'natzun, knb'incha'ye' xtchaq'a nimaqkawil, chij.
Nimtoj najan Simi toj Jerusalen. 39Tetzunj tb'aj oxe' ab'q'i, eb'je'x oq kab'e' loq'oj tmajin ex exi' najal tja Akyis tk'wal Maaka, nimaqkawiltoq toj Kat. Tetzunj tpon tqanil te Simi qa atoqtzu' ta'qe'ju' kab'e' loq'oj tmajin Kat, 40jaw tq'o'n t-xalmiju' tb'ur ex xi'tzuntz Kat, tk'etz Akyis, jyolkyeju' tmajin. Intzun anjtzku'ti'j Simi Kat kyuk'i'lju' tmajin, 41tb'i Salomon qa matxi'toq tz'ex Simi ti'jxi' Jerusalen tu'n txi' Kat, ex ljo'ntoq tanjtzti'j. 42Tchaq'tzun nimaqkawiltz tu'n t-xitxokb'aj Simi, ex xitma'n te:
—¿Ma mixtzunti' tmaya twitz Qman Dyos tu'n lalun tz'exa, ex xiwab'tzi'ne' teya, qa alkye q'ij matz'exa toj juntl najb'il, atzun q'iju' tu'n tkyima? ¿Ma mixtzunti' tzaj ttzaq'we'na qa oktoq tb'incha'ya, exqa atitoq tu'n tjapun nchaq'b'ile' tu'na? 43¿Tiqu'ntzun min xjapun tyola twitz Qman Dyos, ex min xitb'i'nju'ya nchaq'b'ile'? 44Kanlixi'x twitza titi' tb'inchaya ti'j Dab'i ju' nma'ne'. Qu'mtzun matb'incha Qman Dyos tu'n tkub' tz'aq tib'ajxa. 45Ayintzunwe' nimaqkawil kchin ky'i'wlajntzele', extzunju' tq'uqb'il Dab'i b'a'n kjela'ten tejumajx twitz Qman Dyos, chi nimaqkawil Salomon.
46Tchaq'tzun nimaqkawiltz te B'enayiy tk'wal Joyada, xi'tzun B'enayiytz ex kub' tb'yo'n Simi. Kuwixtzun tkawb'il Salomontz.
Currently Selected:
1 R 2: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999