1 R 17
17
Tma Eliy tqanil q'ijal
1Xitma'n t-sanjelal Dyos Eliy aj Tisb'e, toju' tx'otx' Kalaad, te Akab' kjalu: ¡Lu Qman Dyos nka'yin, nchin ajb'ene' te, kxe'l nma'ne' teya ja'lo, lay tzaj jb'al ex lay kub' ta'l che'w kyoju' jte' ab'q'i tzul tzmaxi'j ajnmanteye'! chij.
2Qu'mtzun tzaj tma'n Qman Dyos te Eliy:
3Lalun kub' tena tza'lu, kutxi'ya tzmax tjawetzq'ij, ex ewana ttzi tal a' kyerit toj tjawetzq'ij teju' nin a' Jordan. 4Atzu' b'a'n tk'wan a'ya ti'ju' tal a' ex matxi' txinma'ne' kyeju' joj tu'n tpon kyiq'i'n twaya, chi Dyos.
5Tb'inchatzu'n Eliy kse'n tchaq' Qman Dyos te, xi' najal ttzi tal a' Kyerit toj tjawetzq'ij te nin a' Jordan. 6Intoq pon q'i'n twa ex tchi' kyu'n joj te prim ex te qale. Atoqtzu' nk'wana' ti'ju' tal a'. 7Atzu'n tal a' naqjte'x q'ij ten ex kub' tzqij, qu'n mixtoqti' jb'al nkub' toju' tx'otx' lu.
Pon Eliy tjaju' qya aj Sarepta kyimni tchmil
8Tzajtzun tma'n Qman Dyos te Eliy:
9Kutxi'ya toju' nintnam Sarepta toj Sidon, ex kutkyaja najal atzu'. Matxi' txinma'ne' te jun qya kyimni tchmil najli atzu' tu'n txitq'o'n twaya, chij.
10Xi'tzu'n Eliy Sarepta. Tetzunj tpon ttzi nintnam, til jun qya kyimni tchmil intoq jyon t-si. Xittxko'n ex xitma'n te:
—B'inchama xtalb'il q'intz ch'i'n nk'wa'ye' a' toj jun b'itidor, chij.
11Xi'toqtzu'n t-xi'ju' qya q'ilte tej t-xittxko'n jumajtl ex xitma'n te:
—B'inchama xtalb'il, tuk'i'lxi' ch'i'n nwaye' q'intza, chij.
12Atzunte qya xittzaq'we'n te:
—Majx lu Qman Dyos, mixpeti'xwe' nwa b'incha'n. Naq jun tal jot warine' ati toj jun ẍoq' ex ch'i'n aseyt toj jun xar, machin tzaje' jyol jun tqan nsiye' tu'n tkub' nb'inchane' te jun nwaye' tuk'i'l wale'. O'kxtzuntl qwaju'ye', ktzunlo qokyimeltze' tu'n we'yaj, chij.
13Atzunte Eliy xitma'n te:
—Lalun xob'a, kuxtxi'ya b'inchalteju' matxi' tmaya. Naq o'kx nejtl b'inchama jun nmuqine' b'o's tu'n ch'i'n tarina ati ex q'intza, b'inchan ku'tzuntla teya ex te tala.
14Qu'n matma Qman Dyos, lay kub'aju' arin toju' t-ẍoq'a exu' aseyt toju' t-xara tzmaxi'j ajttzaj tq'o'n Qman Dyos jb'al tib'aju' tx'otx', chij.
15Xi'tzu'n qya kyimni tchmil b'inchalte kse'nxju' xitma'n Eliy te. Tentzun kywatz tuk'i'lju' tal ex Eliy toj b'a'npun q'ij. 16Mixti' kub'aju' arin toju' ẍoq' exju' aseyt toj xar, kse'nx ojetoq tma Qman Dyos toj ttzi Eliy.
17Tb'ajlenxi'tzun jte' q'ij tzaj yab'il ti'j talju' qya kyimni tchmil, majx ichimnixi'x, expe' mixti'tl xewti. 18Xi'tzun tma'n qya kyimni tchmil te Eliy:
—¿Titi' woklene' tuk'i'la t-sanjelal Dyos? ¿Ma matzula na'lkyeju' wile' ex tu'n tkyimu' wale'? chij.
19—Q'ontza tala tzalu, chi Eliy xittzaq'we'n te.
Ex eltiq'i'n toj tq'ob'ju' qya, jaxtiq'i'n toju' ja janajla'toq ex kub' tkuẍb'a'n twi' tkuẍb'il.
20Kub'santzuntz te Qman Dyos tuk'i'l tq'ojq'ojel twi' kuw:
Taye, nman Dyos. ¿Ma ikx ktzajel tq'o'na k'ixk'oj ti'ju' qya kyimni tchmil lu, ju' najliqin jte' q'ije' toj tja, tu'n tkyimju' tal tu'na? chij.
21Yajxi'tzuntl oxmaj kub' tjoqb'a'ntib' tib'aju' k'wal ex na'n Dyos tuk'i'l tq'ojq'ojel twi': Nman Dyos, ¡b'inchama xtalb'il q'ontz jumajtla tchwinqlalju' k'wal lu! chij.
22Tzaj tb'i'n Qman Dyos tkub'sb'il Eliy, ex anjtzti'ju' k'wal tu'n. 23Textzu'n kmoj jawtiq'i'n Eliy k'wal, ku'tz tiq'intzuntz toju' ja kub'l ex xitq'o'n teju' ttxu, xitma'n te:
—¡Ka'yintza, itz'te' tala! chij.
24Xi'tzun ttzaq'we'n qya te:
—Matxitzun kane toj nwitze' ja'lo axxi'x te Dyos najb'ena'ta, ex a ntma'na ax intma'n Qman Dyos, chij.
Currently Selected:
1 R 17: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999