1 R 11
11
Witzleb'in Salomon
1Expe' etk'u'jlaju' nimaqkawil Salomon txqantl qya te junxi'tl tnam ti'jxi'ju' tmyal paraon: e' aj Moab', aj Amon, aj Edom, aj Sidon ex itit; 2aye' qya e'tzaj kyoju' tnam ojetoq tma Qman Dyos qa myab'a'n tu'n kymje aj Israel kyuk'i'l, qu'n oktoq che tzpetel kyu'n tu'n kyxi'lpe kyi'ju' kydyos. Atzuntlte Salomon oklaqj kyi'j ex tmujb'atib' kyuk'i'l. 3Junk'al o'lajnaq (700) t-xu'jil ten kymyal nimaqkawilqe' ex o'lajnaq (300) tqya, tu'ntzun kypaju' qya lu txalpuja' Salomon. 4Tetzunj ttijin Salomon, kub' chukji tnab'l kyu'nju' t-xu'jil, ex k'ulun kye junxi'tl dyos, qu'n na'mtoq tq'ontetib' b'a'nxi'x te Qman Dyos, kse'nte Dab'i ju' tman. 5K'ulun Salomon teju' witzileb' Astarte, kydyos aj Sidon, ex te milkom kywitzileb' aj Amon taq'wixi'x. 6Iktzunju', taq'wixqe'xi'xju' tb'inchb'aj Salomon twitz Qman Dyos, minti' xi' lpe b'a'n ti'j Qman Dyos kse'nte Dab'i, ju' tman.
7Tojtzu'n tq'ijlalil lu, jawtb'incha'n Salomon jun ja te Kyemos, kywitzileb' aj Moab' taq'wixi'x ex te Molok kywitzileb' aj Amon taq'wixi'x, twi'ju' witz toj tjawetzq'ij te Jerusalen. 8Ex ikx tb'inchaju' kye kykyaqilju' t-xu'jil te junxi'tl tnamqe', ju' intoq xikyq'o'n sturak ex chojb'il kyeju' kydyos. 9Tzaj ttx'u'jil Qman Dyos ti'j Salomon, qu'n matxi'toq tz'el tpa'ntib' ti'j Qman Dyos, ju' kamaj kub' tyek'u'ntib' twitz 10ex ojetoq tchaq' te tu'n lalun k'ulun kywitz junxi'tl dyos. Atzunte minti' xitb'incha'n kse'nxju' tchaq' Qman Dyos te. 11Qu'mtzun tzaj tma'n Qman Dyos te Salomon:
Tu'ntzunte' xtb'inchaya lu, min xtb'inchaya yol kyejni b'entti'j exqe' kawb'il xinma'ne' teya, k'elel wiq'i'ne' kawb'il teya ex kxe'l nq'o'ne' te junju' ajb'el teya. 12Naqtzun tu'nel Dab'i, ju' tmana, lay nb'inchaye' akxku' itz'a; tetzunju' tk'wala k'elela' wiq'i'ne'. 13Laype' tz'el wiq'i'ne' kawb'il tkyaqil, kjel nq'o'ne' jun tnej kyyajajile' te, noqtu'ne'lu' tmana ex Jerusalen, ju' nintnam oje jaw nsk'o'ne', chi Dyos.
14Tb'inchatzun Qman Dyostz tu'n tjaw b'ent jun tajq'oj Salomon: aju' Adad, jun aj Edom, kyyajil nimaqkawil te Edom. 15Xi' Joab', ju' nejenel kye xjal te q'oj, mqulkyeju' e'kyim toj q'oj tej tkub'ti'j Edom tu'n Dab'i, ex eb'aj Kub' tb'yo'n kykyaqilju' ichan aj Edom; 16waqaq xjaw kyejten Joab' atzu' kyuk'i'l kykyaqilju' aj Israel, tzmaxi'j kyb'aj kykyaqilju' ichan aj Edom tu'n. 17Atzunte Adad akxtoq k'wal, xi' oq toj Ejipt kyuk'i'l junjun twnaqil ntoq che ajb'en teju' tman. 18E'etz toj Madyan ex e'pon Paran, atzuntzu' exa' kyiq'i'n junjun ichan kyuky'i'l tu'n kyajb'en kye. E'pon Ejipt ex exi' yek'ulkyib' twitz paraon, nimaqkawil toj Ejipt, atzunte paraon xitq'o'n kyja ex kywa, ex xitoyi'n kytx'otx'.
19Elb'a'n Adad toj twitz paraon, ex xitq'o'n paraon tb'alok, titz'in Tapenes ju' t-xu'jil, te t-xu'jil Adad. 20Ultzun jun talu' titz'in Tapenes tuk'i'l Adad, Wenub'at tb'i, kub' ch'isa'n k'wal lu tu'n Tapenes junx kyuky'i'lju' tal toju' tja nimaqkawil paraon. 21Tetzunj tb'inte Adad toj Ejipt qa ojetoq kyim Dab'i, ex ikx ojetoq kyim Joab', ju' nejenel kye xjal te q'oj, xitma'n Adad te paraon:
Q'ontza anb'il weye' tu'n tanjwi'je' toj ntx'otx'e', chij.
22Atzunte paraon xittzaq'we'n te:
¿Tiqu'ntzun tajb'ila'ya tu'n tanjti'ja toj ttx'otx'a? ¿Ma ati jun ti'xti' mixti' teya tzalu wuk'i'le'? chij.
Atzunte Adad xittzaq'we'n:
—Mixti' juntlwe' mixwitti' we, naq o'kx kchin kub'sale' teya tu'n tq'onteya anb'il tu'n tanjwi'je', chij.
23Expe' ikx tb'incha Qman Dyos tu'n tjaw tiq'i'ntib' Reson ti'j Salomon. Aju' Reson tk'wal Elyada, ju' oq twitzju' tajaw, ju' Adad-eser, nimaqkawil toj Sob'a. 24Ojetoq che b'ajtb'u'yi'n junjun ichan ex nejeneltoq kye jun tnej eleq'. Tej kykub' tb'yo'n Dab'i t-xjal, xi' Reson toj Damask ex ok te nimaqkawil atzu'. 25Ok ajq'oj kyi'j aj Israel tej itz'toq Salomon, ex tmujb'atib' tuk'i'lju' taq'wix in tb'inchantoq Adad, ex majxtoq ik'unqe' aj Israel tu'n. Iktzu'n oka' Resen te nimaqkawil toj Sirya.
26Ex ikx Jerob'oam tk'wal Nab'at, tyajajil Eprayin, aj Sereda, tal jun qya kyimni tchmil, Seruwa tb'i. Nimtoqpe' toklen toj tkawb'il nimaqkawil Salomon, jawtiq'i'n tib' ti'ju' nimaqkawil. 27A jawa' tiq'i'ntib' Jerob'oam ti'ju' nimaqkawil Salomon: Tej intoq tnojsa'n Salomon jul tu'n tplanset toju' Ninttanam Dab'i ju' tman ex intoq tjpu'n t-xopo'jil nintapi ti'j. 28Kuw xjal toqu' Jerob'oam ex q'o'ntib' toju' aq'untl; tetzunj tka'yinte Salomon sak' toqju' ku'xun lu, oktq'o'n te nejenel ti'j tkyaqilju' aq'untl intoq kyb'incha'n tyajajil Jse.
29Tojtzu'n tq'ijlalil lu, jun q'ij etz Jerob'oam toj Jerusalen, kyk'ulkyib' toj b'e tuk'i'l Ayiy t-sanjelal Dyos, aj Silo, toktoq jun tpinpa't ak'a'j. Kykab'ilxtoqtzun ate'qe' toj kojb'il, 30eltiq'i'n Ayiy tpinpa't ak'a'j toktoq ti'j, ex kub' t-ẍilu'n toj kab'lajoj (12) piẍ 31xitma'ntzuntz te Jerob'oam: Q'inxa lajoj piẍ teya, qu'n intma'n Qman Dyos teya:
K'elel wiq'i'ne' kawb'il te Salomon ex che kxe'lnq'o'ne' lajoj tnej tyajajil Israel teya. 32Naq jun tnej tyajajil kjel nq'o'ne' te Salomon, naq tu'nel nmajine' Dab'i ex Jerusalen, ju' nintnam oje jawnsk'o'ne' kyxolju' txqantl nimaqkytanam tnej tyajajil Israel. 33Qu'n matxi' chin eltik'u'ne' Salomon, ex matxi' tz'okten k'ulul te Astarot, kydyos aj Sidon; ex te Kyemos, kydyos aj Moab'; ex te Milkom, kydyos aj Amon. Myab'a'n qe' tb'inchb'en toj nwitze' ex min ẍejapunju' nkawb'ile' ex nchaq'b'ile' tu'n, kse'n tb'incha Dab'i, ju' tman. 34Tu'npetzu'n, lay tz'el wiq'i'ne' tkyaqilju' kawb'il te, kyjel nq'o'ne' tu'n tkawin akx itz', noq tu'nelju' nmanjine', Dab'i jaw nsk'o'ne', ex ejapun nchaq'b'ile' ex nkawb'ile' tu'n. 35Atzuntzu' k'elela' wiq'i'nju'ye' kawb'il teju' tk'wal, ex che kxe'lnq'o'ne' lajoj tnej tyajajil Israel teya. 36Naq jun tnej tyajajil Israel kjel nq'o'ne' teju' tk'wal, tu'ntzun tk'ant tq'aq' Dab'i kukxju' nwitze' toj Jerusalen, ju' nintnam jawnsk'o'ne' jatu'n tna'njtza' nb'iye'. 37K'okyel nq'o'na tu'n tkawina kyib'aj kykyaqilju' tajb'ila ex aya k'okyel te nimaqkawil toj Israel. 38Qatzun matxi tb'i'na tkyaqilju' kxe'l nma'ne' teya, tnik'alkyi'ju' tb'inchb'aja nwitze', exqa mache japun nkawb'ile' ex nchaq'b'ile' tu'na, kse'n tb'incha nmajine' Dab'i, chin tenb'ile' tuk'i'la ex knkuwsa'ye' tkawb'ila kukxju', kse'n nb'inchaye' te Dab'i: Ex kjel nq'o'ne' Israel tjaq tkawb'ila. 39Aye'tzu'n tyajajil Dab'i, kntz'e'ysa'ye' kywitz tu'n tpaju' il lu, naq o'kx mya tejumajx, chi Dyos, chiju' t-sanjelal Dyos.
40Tu'ntzun tpaj ja'lu oktilil tu'n Salomon tu'n tkub' tb'yo'n Jerob'oam; atzunte Jerob'oam xi' oq toj Ejipt, ja nkawina' sisak, axtzuntzu' kyeja' ten tzmax tej tkyim Salomon.
Kyim Salomon
(2 Cr 9.29-31)
41Xi' tz'ib'a'na' txqantl tqanil ti'j Salomon ex tnab'l, ex tkyaqilju' tb'incha, toju' tu'jil tqanil ti'j Salomon. 42Kab'naq (40) ab'q'i kawin Salomon toj Jerusalen kyib'aj kykyaqil aj Israel, 43tetzunj tkyim, ku'x mqu'n toju' Ninttanam Dab'i, ju' tman. Atl Rob'oam ju' tk'wal kyejten kawil te t-xel.
Currently Selected:
1 R 11: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999