Marako 1
1
Lok ma Jon Labatija otito
(Mat 3.1-12; Luka 3.1-18; Jon 1.19-28)
1Acakki me lok me kwena maber i kom Yecu Kricito, Wod pa Lubaŋa, 2#Mal 3.1 kit ma gicoyo kwede i buk pa lanebi Icaya ni,
“Nen, acwalo lakwenana otelo nyimi,
ma bigero yoni;
3 #
Ic 40.3
dwan dano mo ma daŋŋe ki i tim ni,
Wuger yo pa Rwot,
wutir yone ocuŋ atir.”
4Kit meno, Jon Labatija ocako nen i tim, kun tito lok ni, “Wuŋut wek wulim batija, wek Lubaŋa owek balwu.” 5Ci jo ma i lobo Judaya ducu ki jo ducu ma i gaŋ Jerucalem gucito bote. Gutuco balgi, ci en obatijagi i kulu Jordan.
6 #
2 Luker 1.8
Jon yam ruko boŋo yer kinaga, ka tweyo pyere ki del, kun camo bonyo ki moo kic ma i tim. 7En obedo ka tito lok kun wacci, “Dano mo obebino kun lubo kora ma kato an ki dit, ma an pe aromo guŋo piny ka gonyo del war tyene. 8An abatijawu ki pii, ento en bibatijawu ki Cwiny Maleŋ.”
Jon obatija Yecu
(Mat 3.13-17; Luka 3.21-22)
9I kare meno Yecu oa ki i Najaret me Galilaya obino bot Jon, ci Jon obatija en i kulu Jordan. 10Ka Yecu obea woko ki i pii, otugi neno ka polo yabbe, ki Cwiny Maleŋ ma bino kun lyanne piny macalo akuri ci opye i kome. 11#Acak 22.2; Jab 2.7; Ic 42.1; Mat 3.17; 12.18; Mar 9.7; Luka 3.22 Ci dwan ocako winnye ma a ki i polo kun wacci, “In aye i Woda ma amaro, ma cwinya yom i komi.”
Catan obito Yecu
(Mat 4.1-11; Luka 4.1-13)
12Cutcut Cwiny Maleŋ otero Yecu woko wa i tim. 13Ci obedo i tim nino pyeraŋwen; Catan ocako bite, ma onoŋo en tye kacel ki lee tim, kun lumalaika gikonye.
Yecu ocako ticce i Galilaya
(Mat 4.12-17; Luka 4.14-15; Jon 4.1-3, 43)
14I kare ma gitweyo Jon woko i mabuc, Yecu ocako bino i Galilaya kun tito lok me kwena maber ma a ki bot Lubaŋa; 15#Mat 3.2 owacci, “Kare doŋ oromo, ker pa Lubaŋa onyiko cok; wuŋut, wuye lok me kwena maber.”
Yecu olwoŋo lucik-rec aŋwen
(Mat 4.18-22; Luka 5.1-11)
16Ka Yecu onono woto rabo dog nam me Galilaya, ci oneno Cimon ki ominne Anderiya, ka gitye ka bolo obwo recgi i nam; pien gin lumak-rec. 17Yecu ocako lwoŋogi ni, “Wubin wulub kora, ci an abimiyowu wudoko lumak dano.” 18Ci cutcut gutugi weko obwogi, gulubo kore. 19Ka dok guwoto anyim manok, ci oneno Yakobo ki ominne Jon, gin awobe pa Jebedayo, ma onoŋo gitye i yeya ka lubo obwo recgi. 20En otugi lwoŋogi cut, ci giweko wongi Jebedayo odoŋ ki luticce i yeya, gucako lubo kore.
Dano ma tye ki cen marac
(Luka 4.31-37)
21Gucako cito wa i Kapernaum, ci cutcut i ceŋ cabit Yecu odonyo i kacokke, ocako pwonyogi. 22#Mat 7.28, 29 Dano guuro kit pwonnye matek, pien owonyogi macalo won twero, pe macalo lipwony-cik. 23Ci cutcut dano mo ma tye ki cen marac onen i kacokke; 24ocako daŋŋe matek ni, “Ilaro gin aŋo kwedwa kaa, in Yecu Lanajaret? Doŋ ibino ka tyekowa bo? An aŋeyi, in i dano maleŋ pa Lubaŋa.” 25Ento Yecu ojuke, kun wacce ni, “Liŋ mot, a woko ki i kome!” 26Cen marac oryeye ki koko matek, ka oa woko ki i kome. 27Dano ducu guuro matek, kun gipenye kekengi ni, “Man gin aŋo? Man aye dok kit pwony manyen bo? Nen en ka ciko wa cen maraco-gu ki twero, ci gin bene giwinyo doge.” 28Ci pire oywek oromo kabedo ducu murumo lobo Galilaya.
Yecu ocaŋo maro Cimon Petero
(Mat 8.14-15; Luka 4.38-39)
29Ci cutcut gua woko ki i kacokke, gudonyo i ot pa Petero ki Anderiya, gunywako wot ki Yakobo ki Jon. 30Maro Petero onoŋo tye ki two lyeto, obuto piny, ci cutcut gutito pire bot Yecu. 31Yecu ocito omako ciŋe otiŋe kwede malo, ci two lyeto ocaŋ woko ki i kome, ka ocako gwokogi.
Yecu ocaŋo jo mapol otyeno
(Mat 8.16-17; Luka 4.40-41)
32Otyeno ma ceŋ opoto woko, gucako kelo bote lutwo ducu ma komgi lit, ki jo ma cen marac omakogi. 33Jo ducu ma i gaŋ gucokke i doggola. 34Ci en ocaŋo lutwo mapol ma onoŋo gitye ki kwa two mapatpat, kun ryemo ki lwak cen-gu mapol; pe oye cen mo oloko, pien onoŋo giŋeye.
Yecu otiŋo wot me tito lok
(Luka 4.42-44)
35Odiko con ma piny pud col, Yecu oa malo, ci opuk ocito woko wa i kabedo ma dano pe iye, ci obedo ka lego Lubaŋa kunnu. 36Cimon ki jo ma gitye kwede gucako lubo kore; 37ka gunoŋe ci guwacce ni, “Dano ducu gitye ka yenyi.” 38En ogamo doggi ni, “Dok wakobu woko i gaŋ mukene ma tye cok ki kany, wek acitit lok kunnu bene; pien meno en aye gin mumiyo abino.” 39#Mat 4.23; 9.35 Ci Yecu ocako tiŋo wot orumo lobo Galilaya ducu, kun woto ki tito lok i kacokkegi ki ryemo cen-gu bene.
Yecu olonyo kom ladobo
(Mat 8.1-4; Luka 5.12-16)
40Ladobo mo obino bot Yecu, kun orumo coŋe piny obako doge bote, olege ni, “Ka imito, itwero lonyo koma.” 41Ci kica omako Yecu i kome, ocako ryeyo ciŋe ogudo kome, kun wacce ni, “Amito; komi olony.” 42Ci cutcut dobo ocaŋ ki i kome, kome odoko leŋ. 43Yecu ocike matek, ka ocwale kwede ocito. 44#Levi 14.1-32 Ocike ni, “Winy ba, pe icitit ki dano mo; ento ber icit ci icinyutte keni bot ajwaka pa Lubaŋa, wek imi gityer pi komi ma doŋ ocaŋ-ŋi, kit ma yam Moses ociko, wek obed lanyut botgi.” 45Ento en ocito, ocako tito lokke atyer bot lwak, ci lokke oywek. Pieno omiyo Yecu pe doŋ twero donyo i gaŋ mo ka maleŋ; ocako bedo i kabedo ma dano pe iye, ento lwak gumol gucito bote ma gua ki i kabedo ducu.
Currently Selected:
Marako 1: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.