Jo Ibru 12
12
Pwony pa Rwot
1Doŋ kit macalo watye ki lwak caden mapol ma rom meno ma orumowa woko dyere, myero koŋ doŋ wabolu gin mogo mapek-gu woko ducu, ki bal ma maro tweyowa woko likiŋ, wek wariŋu doŋ ŋwec pyem ma tye i nyimwa, kun waciro bene peko ma tye iye. 2Wanenu Yecu ma en aye latel wiwa i lok kom niye, en ŋat ma ocobo niyewa kakare. Pi yomcwiny ma giketo i nyime en yam ociro yatariya, kun ocayo lewic ma giketo i kome; ento kombeddi doŋ obedo piny i kabedo me deyo yo tuŋ acuc me komker pa Lubaŋa.
3Wubed ki tam i kome, ki kit ma en ociro kwede adagadaga marac twatwal ki bot lubalo, wek pe wuol, ki cwinywu pe opoti. 4I lwenywu ma wulwenyo ki bal pud peya wulwenyo wuo wa i oyo remowu. 5#Yubu 5.17; Car 3.11, 12 Nyo wiwu owil woko ce i coc ma yam gicoyo me cuko cwiny dano, ma en loko kwedwa iye macalo litinone? Ni meno,
“Latinna, pe ica pwony pa Rwot;
ka en ogoyi, pe cwinyi opoti. 6Pien Rwot pwonyo jo ma en maro,
pwodo latin acel acel ma en gamo.”
7Myero wucir matek, wek opwonywu. Lubaŋa tye ka tic kwedwu macalo litinone. Latin mene ma pe wonne pwonyo? 8Ka ce owekowu laboŋo pwonyowu macalo litinone mukene ducu, nyuto ni wun doŋ litino luk, pe litinone kikome. 9Kit meno wan watye ki wegiwa me lobo man ma yam gupwonyowa, wan bene waworogi. Pe doŋ myero wamine makato i te loc pa Wonwa me cwiny wek wabed kwo? 10Pien gin yam gupwonyowa pi kare manok mo keken i kit ma gin guneno ni ber, ento Lubaŋa pwonyowa pi konyowa, wek omi wadok jo maleŋ macalo en. 11Kit pwonnye ducu, ka pud watye iye, pe watamo obedo me yomcwiny, ento me kumo, ento i ŋeye lacen kelo kuc keken bot jo ma guyelle iye, pien noŋo doŋ gudoko jo ma kitgi atir.
Dano pe gukwer kica pa Lubaŋa
12 #
Ic 35.3
Pi meno, wutiŋ badwu mukwe-ni malo, wurye coŋwu magoro, 13#Car 4.26 wuyub yo ma tyenwu lubo ocuŋ atir, wek ŋat ma tyene oŋol pe dok tyene oputte woko liweŋ ki i waŋ mwot, ento myero ocaŋ woko acaŋa. 14Wuket tek me bedo ki kuc ki jo ducu, ki me bedo jo maleŋ; pien ŋat ma pe leŋ pe bineno Rwot. 15#Nwo 29.18 Wugwokke kun wuneno maber ni ŋat mo pe opoto ka gamo kica pa Lubaŋa. Wunen ni ŋat mo pe obedo macalo lwit yat makec ma ka otwi ci kelo ayela, dok balo jo mapol. 16#Acak 25.29-34 Wunen ni ŋat mo pe obed latim abor, nyo dano ma pe lworo Lubaŋa calo Ecau, ma yam ocato ditte me anywalli me bedo latin kayo pi cam me tyen acel keken. 17#Acak 27.30-40 Pien wuŋeyo ni, lacen ka en omito ni wonne olam gum i kome, ento wonne okwere woko, kadi bed onoŋo mito ma kok ki pig waŋe, pien en yam pe onoŋo yo me ŋut i gin ma otimo.
18 #
Nia 19.16-22; 20.18-21; Nwo 4.11, 12; 5.22-27 Pien wun pe wubino i gin ma gitwero gudo kome, ki mac ma yam olyel i wi got Cinai, ki colpiny me mutu ma ocido woko licuc, ki yamo lapiru matek, 19ki koko tum, ki dwan ŋat ma tye ka lok. Jo ma guwinyo lokke gubako doggi mada ni pe dok gimed loko botgi lok mo, 20#Nia 19.12, 13 pien gin pe gitwero ciro cik ma giketo, ni meno, “Kadi ki lee mo ka ogudo got, myero gicel ki gweŋ ginek woko.” 21#Nwo 9.19 Gin munen kunnu obedo marac twatwal ma miyo dano lworo, man omiyo Moses owaco ni, “Lworo omaka adada ma koma myel amyela.” 22Ento wun wubino i got me Cion, ki gaŋ pa Lubaŋa makwo, Jerucalem me polo, ki bot lwak lumalaika ma welgi pe kwanne ma gucokke kacel ka woro Lubaŋa. 23ki i cokke pa litino kayo ma gicoyo nyiŋgi i polo, ki bot Lubaŋa ma en laŋolkop pa dano ducu, ki bot tipo pa jo ma kitgi atir, ma doŋ gimiyo gudoko jo mabeco muteggi, 24#Acak 4.10 ki bot Yecu, layub gicikke manyen, ki bot remo ma gikiro, ma tito ki kica pi gin maber ma kato gin ma remo pa Abel otito pire.
25 #
Nia 20.22
Wugwokke pe wukwer winyo lok pa ŋat ma tye ka lok. Jo ma yam gukwero winyo lok pa ŋat mucikogi i wi lobo pe gubwot. Wan kono wabibwot niŋniŋ, ka wakwero winyo lok pa ŋat ma tye ka cikowa ki i wi polo kulu-ni? 26#Ag 2.6 I kare maca, dwane oyeŋo Iobo; ento kombeddi en ociko ni, “Odoŋ kicel, pe doŋ abiyeŋo lobo keken, ento abiyeŋo wa polo bene.” 27Lok man ni, “Odoŋ kicel,” nyuto ni, gibikwanyo gin ma yeŋŋe woko, meno ginaketa, ka gin ma pe yeŋŋe cako doŋ. 28Pi meno myero wapwoyu Lubaŋa, pien doŋ wanoŋo ker ma pe twero yeŋŋe, dok bene myero waworu Lubaŋa i yo ma twero yomo cwinye, kun bene wamiye deyo ki lworo, 29#Nwo 4.24 pien Lubaŋa-wa en aye mac ma waŋo piny.
Currently Selected:
Jo Ibru 12: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.