Jo Ibru 10
10
1Cik pa Moses gire tye iye tipo keken me jami mabeco me kare me anyim, pe calgi kikome. Pi cik dano gibedo ka kelo gitum ma kitgi acel nakanaka, mwaka ki mwaka; en doŋ pe tye ki twero mo matwal me loko jo ma bino bot Lubaŋa gudok jo mabeco muteggi. 2Ka nene tye kit meno, kono gitum pe doŋ ogik woko? Kono jo ma woro Lubaŋa doŋ gilwoko balgi woko matwal, kono pe dok gimedde me bedo ki kit ŋec mo i cwinygi ni gin lubalo. 3Ento gitum magi bedo ka poyo wi dano i balgi mwaka ki mwaka. 4Pien remo twoni ki remo dyegi pe twero kwanyo bal woko wacel. 5#Jab 40.6-8 Pi lok man, i kare ma Kricito obino i lobo, en oloko ni,
“In giri pe imito gitum kadi gityer,
ento iketo koma tye. 6Ii pe obedo yom pi gitum awaŋa ki
gitum ma gityero pi bal. 7Ka doŋ awaco ni, ‘An a ene, doŋ
abino ka cobo mitini, in Lubaŋa,’
macalo yam gicoyo i koma i buk adola.” 8Mukwoŋo en oloko ni, “In pe imito gitum, kadi mot ma gityero, nyo gitum awaŋa ki gitum pi bal, cwinyi bene pe yom iye,” ma gin jami ma gityero pi cik. 9Ka dok oloko ni, “An a ene, doŋ abino ka cobo mitini.” Ojwayo mukwoŋone-ni woko wek omi ekel me aryone. 10Doŋ pi mitine meno, omiyo gilonyowa wadoko leŋ pi Yecu Kricito mumiyo kome ma ka gitum kicel keken ma otyeko lok woko ducu.
11 #
Nia 29.38
Ajwaka acel acel cuŋ i dog ticce nino ducu kun tyero kit gitum acel-lu kare ki kare ma pe tye ki twero mo matwal me kwanyo bal. 12#Jab 110.1 Ento Kricito yam otyero gitum acel keken pi bal, pi kare ducu, ka doŋ obedo piny i ŋet Lubaŋa tuŋ acuc i kabedo me deyo. 13Nia wa i kare ca en tye ka kuro nio ka gimiyo lukworre doko kom laten tyene, 14pien gitumme acel-lu omiyo jo ma en olonyogi bedo leŋ gudoko jo mabeco muteggi matwal. 15Cwiny Maleŋ bene omiyo cadenne botwa, pien ka doŋ oloko ni,
16 #
Jer 31.33
“Man aye gicikke ma abiketo ki jo
me doggola pa Icrael,
ka kare meno okato, man lok pa
Rwot:
Abiketo cikka ducu i cwinygi,
kun acoyo bedo i tamgi,” 17#Jer 31.34 ka dok omedde kun loko ni,
“Pe dok abipo i kom balgi ki timgi
maraco.” 18Ka ma weko bal tye iye, gitum mo pi
bal doŋ pe mitte.
Wanyiku cok ki Lubaŋa
19Pi meno, utmegina, wan doŋ watye ki yo me donyo i kabedo maleŋ ki tekcwiny pi remo pa Yecu. 20En oyabo botwa yo manyen, yo makwo, me donyo i ŋe boŋo kicika; yo meno aye en kome. 21Kit macalo doŋ watye ki ajwaka madit ma loyo ot pa Lubaŋa, 22#Levi 8.30; Ejek 36.25 myero doŋ wanyiku cok bot Lubaŋa ki cwiny me ada, kun niye bene doŋ odonyo matut i cwinywa, ma doŋ cwinywa leŋ, pien ŋec me gin maraco ma yam watimo doŋ gikwanyo woko, dok bene komwa doŋ gilwoko woko ki pii maleŋ. 23Wamoku matek likiŋ i gen ma watuco, laboŋo tagge atata, pien ŋat ma ocikowa-ni lagen. 24Dok bene myero watamu kit macalo watwero tugo kwede cwinywa kekenwa i mar ki i tiyo tic mabeco, 25kun pe waweko cokke kacel, kit macalo jo mogo doŋ guloko odoko kitgi-ni, ento myero wacuku cwinywa kekenwa, makatone kit macalo wuneno Nino maca doŋ tye ka nyiko cok-ki.
26Pien ka watimo bal akaka ma doŋ noŋo watyeko limo ŋec i kom lok me ada, gitum mo pe dok odoŋ ma gityero pi balwa. 27#Ic 26.11 Odoŋ kuro ŋolo kop keken kun watye ki lworo madwoŋ, ki mac mager ma bityeko dano ma gipyem ki Lubaŋa. 28#Nwo 17.6; 19.15 Dano ma pe lubo cik pa Moses gineko aneka laboŋo kica mo, ka ce lok oloye i nyim caden aryo nyo adek. 29#Nia 24.8 Doŋ wutamo ni can ma rom mene ma gibiketo i kom ŋat ma ocayo Wod pa Lubaŋa, dok ma opyedo remo me gicikke pa Lubaŋa ma gilonye kwede me bedo maleŋ, dok ma oŋalo Cwiny Maleŋ me kica pa Lubaŋa? 30#Nwo 32.35; Nwo 32.36 Pien wan waŋeyo ŋat ma oloko ni, “An aye abiculo kwor, abiculo waŋe lacen,” dok ni, “Rwot biŋolo kop i kom jone.” 31Bedo gin me lworo twatwal me poto i ciŋ Lubaŋa makwo.
32Ento koŋ doŋ wupo i kare mukato, kit ma yam wuciro kwede, kun wulwenyo ki lwak cam madwoŋ, i kare ma doŋ ceŋ pa Lubaŋa otyeko ryeny omenyowu. 33Kare mukene yam giyetowu dok giunowu i nyim lwak, kare mukene bene wuribbe ki jo ma gitimogi kit meno. 34Pien kica yam omakowu i kom mabuc, dok bene cwinywu obedo yom kadi giyako jamiwu, pien wun kikomwu onoŋo doŋ wuŋeyo ni wutye ki jami mukene mabeco makato magi, dok ma ri nakanaka. 35Pi meno pe wubwot tekcwiny woko, pien tye ki bakacic madit ma wubilimo. 36Mito wubed kun wuciro, wek omi wuti gin ma Lubaŋa mito, ci doŋ wunoŋo gin ma yam en ociko pire. 37#Kab 2.3, 4 (LXX) Macalo yam en oloko ni,
“Odoŋ kare manok mo,
ci ŋat ma bino ca bibino woko
oyotoyot ma pe bigalle.
38Doŋ danona ma kite atir bibedo
kwo pi niye;
ento ka odok woko cen,
cwinya pe bibedo yom i kome.”
39Ento wan pe watye i kin jo ma dok cen, ka girwenyo woko matwal-li; wan watye i kin jo ma gitye ki niye, ma en aye doŋ gwoko kwogi.
Currently Selected:
Jo Ibru 10: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.