Jo Kolocai 3
3
1 #
Jab 110.1
Macalo yam doŋ wucer kacel ki Kricito, wuket cwinywu doŋ i kom jami ma tye malo, ka ma Kricito tye iye i kabedo me deyo i ŋet Lubaŋa tuŋ acuc. 2Wuket cwinywu i kom jami ma tye malo i polo ento pe i kom jami me lobo. 3Pien yam wuto woko, ento kombeddi doŋ gikano kwowu kacel ki Kricito bot Lubaŋa. 4Ka Kricito ma en kwowa binen, wun bene wubinen kacel kwede i deyo.
Kwo macon ki kwo manyen
5Pi meno myero doŋ wunek gin ducu me lobo ma tye i iwu, ma gin aye abor, caro, mit me kom, ki par marac ma kelo lewic, ki woro me jami ma rom ki woro jogi. 6Akemo pa Lubaŋa bino pi kit tim macalo meno i kom jo pe winyo lokke. 7I kit kwo ma yam wubedo kwede, magi aye gin tim ma onoŋo wubedo ka lubogi. 8Ento kombeddi myero doŋ wubwotgi woko ducu: kiniga, kwar cwiny, raccwiny, yet, ki loko lok mogo me lewic ma pe myero giwiny ka katti ki i dogwu. 9#Ep 4.22 Pe myero wubwolle kekenwu, pien doŋ wubwoto kwowu macon ki ticce ducu, 10#Ep 4.24; Acak 1.26 ci doŋ wuruko dano manyen ma Lacwec tye ka rocone i ŋec manyen me dwoko i calle kikome. 11Kenyo doŋ apokapoka pe iye i kin Lugrik ki Lujudaya, ŋat ma giliro ki ŋat ma pe giliro, larok ma kwiya piny mere ata ma pe ŋeyo leb, rok ma pud gudoŋ cen i kit me wi lobo, opii, ki ŋat ma doŋ lone kene, pien Kricito doŋ ocoko gin ducu dok bene tye i igi ducu.
12 #
Ep 4.2
Ento wun aye jo ma Lubaŋa doŋ oyero, jo maleŋ ma Lubaŋa maro; pi meno myero doŋ wuruk cwiny ma miyo wuparo pi can pa luwotwu, wubed ki kica, mwolo, woro ki diyo cwiny. 13#Ep 4.32 Wudi cwinywu kekenwu, ŋat acel acel odi cwinye i kom lawote, kun wutimo kica ki luwotwu i kinwu kekenwu pi balwu. Ka ŋat mo i kinwu tye ki lok mo i kom lawote, timo kica pi bal myero obed tye macalo Rwot bene ceŋ otimowu kica. 14Ento makato magi ducu, myero wubed kun wupoŋ ki mar. Pien mar keken aye tweyo jami ducu, ribogi kacel ma cobo bene maber licwic. 15Wuwek kuc pa Kricito ma yam olwoŋowu i kom acel aye olo cwinywu, ka wek doŋ wubed jo ma miyo pwoc kare ducu. 16#Ep 5.19, 20 Wuwek lok pa Kricito obed i iwu mulony, ka wupwonnye, kun wujukke bene kekenwu ki ryeko ducu ma Lubaŋa omiyowu. Dok bene ka wuwero jabuli, wer me pako Lubaŋa ki wer mogo mukene me dini, wuwer bot Lubaŋa ki pwoc i cwinywu. 17Gin ducu ma wutiyo, kadi ki i lok nyo i tic mogo, wutigi i nyiŋ Rwot Yecu, kun wumiyo pwoc bot Lubaŋa Won wok ki bote.
Kit me bedo kacel i kwo manyen
18 #
Ep 5.22; 1 Pet 3.1 Wun mon, wumine kenwu i te loc pa cogwu, pien meno aye gin ma myero i kin jo ma tye i Rwot. 19#Ep 5.25; 1 Pet 3.7 Wun co bene, wumar monwu, pe wubed ki gero i komgi. 20#Ep 6.1 Wun litino, wuwiny lunyodowu i lok ducu, pien meno aye yomo cwiny Rwot. 21#Ep 6.4 Wun wego bene, pe myero wuket kolo i kom litinowu, miyo cwinygi balle woko. 22#Ep 6.5-8 Wun lutic, myero wuwiny luditowu me lobo man i lok ducu ki cwiny acel, pe i tic ma bwolo waŋ dano keken, kun wumito wuyom cwiny dano, ento wuti i cwiny me lworo Rwot. 23Tic mo keken ma wutiyo, wuti maber ki cwinywu ducu, macalo wutiyo bot Rwot, ento pe pi dano. 24Wuŋe ni wubilimo jami ducu ma Rwot oyubo wa con pi jone macalo bakacicgi. Wun lutic pa Rwotwa Kricito. 25#Nwo 10.17; Ep 6.9 Pien latim marac mere gibicule pi gin marac ma en otimo, pien Rwot pe poko kin dano.
Currently Selected:
Jo Kolocai 3: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.